Luka 15 - KILOMBENO KIHYA KIA NFUMWETU YESU KIDISITU

¹ Henyihaha balambushi boso ba milambu na balwishi, abefubwile hehi n’E, mwanda wa kumwifwakana.

² Biabia Bafadiseo na bafundji ba mikanda abaununwine’shi: Uno muntu atambula balwishi, adi n’abo.

³ E bebelele luno lukindji’shi:

⁴ Nanyi mwi n’enu e na mikoko lukama, su ashimisha umune, akutwa kuleka aya makumi kitema na kitema mu mahia a bisumanga, ēnda mu kukimba wawa ushimine mpaa na heumono’nyi?

⁵ Na heumono eutenteka ha mahampa e, kwete kusehela.

⁶ Hakufika kwe, etanyina bakūku be na bekashi n’e, ebalungula’shi: Sehelai n’ami, mwanda nahu kumona mukoko wande ushimine.

⁷ Nenulungula’shi: Kusehela mwiilu akukekala anka biabia, ahelanga mulwishi umune mwishimba, kukile makumi kitema na kitema a bantu balulame, bashyabakyebe kwilanga.

⁸ Sunga mwana mukashi kinyi e na nfalanga ya ndalama yīkumi, su ashimisha lumune’nka akutwa kōsha kimunyi, akombe, akimbi na kukokōla mu nshibo hoso hakelumwena?

⁹ Na hakelumono, aitamine balole be na bekashi n’e hamun’eshi: Sehelai nami, mwanda namono lufalanga lwa ndalama lubanshimine.

¹⁰ Nenulungula’shi: Anka biabia, kwi kusehela ku mpala kwa bamwikeilu b’Efile Mukulu ahelanga mulwishi umune mwishimba.

¹¹ N’e bakwile’shi: Muntu kampanda badi na bana b’e bana balume:

¹² Mwina balungwile nshye’shi, A ya mpe namu kiande kihindji kia ku bintu bia nkahyana. Biabia ebabābile mono ye.

¹³ Na habakile mafuku ahela, winyi mwina bakongwele bintu bioso bayile luendo lwe ku yingi nsenga yibadi kula, nyi kubakahalakeshe mono ye ku butesha.

¹⁴ Habahwile kuhana yoso, kubutukile kihuha kikata kia nsala mu yaya nsenga, biabia babangile kwikala na lukalo.

¹⁵ Bayile mu kwilamika kwi muntu a ku yaya nsenga; n’e bamutumine ku bikotela mu kudisha ngulube.

¹⁶ Badi adidi bikata kudia na kwikuta bihusu abidi ngulube: takubadi muntu a kumuha kintu, ooo.

¹⁷ Anka habeshinkile mwishimba die bakwile’shi: A bafubi ba yaiya bebungi be na biakudia bikumbane na kusubuka, n’ami nkwete kufwa nsala!

¹⁸ Nankēbo kwenda kwi yaiya, nkamulungule’shi: A yaiya, nyi mulwishe ku mpala kw’eilu na ku mpala kobe,

¹⁹ Nkimuhwandjikile kutemunwa bu mwan’obe; onalule bu umune a ku bafubi bobe.

²⁰ Henyihaha bebwele, ēnda kwi nshye. Anka habudi ki kula mbalamba nshye bamumwene, bamukwatshile lusa, bakamine lubilo, amwibambala kīha, na kumufifya ku kanwa.

²¹ Biabia mwana mulume bamulungwile’shi: Yaiya, nyi mulwishe ku mpala kw’eilu na ku meso kobe, biabia nkimuhwandjikile kutemunwa bu mwan’obe.

²² Anka nshye balungwile bahika be’shi: Tushai mutwelo ukile buwa numufwadikye; numufwadikye kakano ku munwe, na biashino ku ngwa ye.

²³ Nufishe kuno namu mwan’a ñombe mumune, numwihe, tudie boso twikale na kusehela.

²⁴ Mwanda uno mwan’ande badi mufwe, e na muwa dimo; badi mushimine, bamweka (dimo). Biabia ababangile kusehela.

²⁵ Binyibiabia mwan’e mbedi badi kwifuba: habadi kwete kufika na kwifubula hehi ku nshibo, bahushishe biombanga na masha.

²⁶ Betanyine umune a bafubi, bamwihwishe’shi: A biobio bintu nkinyi?

²⁷ Biabia bamwalulwile’shi: Mwin’obe bafiki, nshobe bamwihayila mwan’a ñombe munune, mwanda bamutambula mukumbeno na musangyela.

²⁸ Binyibiabia e badi na nsungu, batune kutwela, binyibiabia nshye batukile amwiyayila.

²⁹ Biabia bālulwile kwi nshye’shi: Tala bino bihwa bibungi bianakufubila, nki mutahilwe mulangilo wobe, sunga mbiabia nki mumone kodi obe sunga nkana ka mbushi mbiandjia kusehela na bakūku bande.

³⁰ Anka hatahafikanga uno mwan’obe, winyi bakuhwidile mono yobe na bakashi ba masandji, bomwihayila mwan’a ñombe munune.

³¹ N’e bamulungwile’shi: Mwan’ande obe we nami mafuku oso, na bioso biandji nabio nyi mbiobe.

³² Twibiatudia kusehela na kusangala, mwanda uno mwin’obe badi mufwe, e na muwa dimo, badi mushimine, bamweka.