Luka 12 - KILOMBENO KIHYA KIA NFUMWETU YESU KIDISITU

¹ Mu kiakia kihindji habadi bekoñene kibumbu kia bantu be bungi bwi moo, biabia abeashishenanga; e babangile kwakula kwi bana-be-ba-bukishi kwibedi’shi: Dimukai kitatusho kia Bafadiseo, nyi mbusesa.

² Mwanda takwi kintu kibwikilwe kishyakikabulwa; sunga kifibwe kishyakikaukibwa.

³ Binyibiabia kioso kianubakwile ’mufito, akikahushwa mwitata; na kiakia kianubākwile mu matwi mu nshibo, akikalungulwa ha misaka.

⁴ Nenulungula namu bakūku bande’shi: Tanutshinanga’bo abēha mbidi, na ku mongo tabe na kia beuku kukita dimo.

⁵ Anka nankenudimuna anudia kutshina. Nutshinei yawa e bahu kwihā, e na matalwa kwela mu Ngehena; ee! nenulungula’shi: Numutshinei ank’e.

⁶ Misodya yitano tayiulwa ku masēnki abidi su? anka takwi umune auilwa ku mpala kw’Efile Mukulu.

⁷ Anka sunga nyene ya ku mitwe yenu, ayo yoso ngiibadikwe. Binyibiabia tanutshinanga: mūlo wenu ngukile wa misodya yi bungi kinemo.

⁸ Nenulungula namu’shi: Ese muntu akantemuna ku mpala kwa bantu, Mwan’a Muntu namu akamutemuna ku mpala kwa bamwikeilu b’Efile Mukulu.

⁹ Anka yawa antunu ku mpaka kwa bantu, akatunwa namu ku mpala kwa bamwikeilu b’Efile Mukulu.

¹⁰ Ese muntu namu akesamba Mwan’a Muntu mwanda wibubi, aukamulekyelwa: anka kwi yawa asabula Kikudi-E-Selelee takale-kyelwa.

¹¹ Biabia habakenufisha ku mpala kwa bitumbwilo, na kwi bansushi, na kwi basha matalwa, tanukalakashanga ’mashimba’shi: Atukālula na minyi? atukākula kinyi?

¹² Mwanda Kikudi-E-Selelee akenulambukisha ha yawa nguba bianudia kwakula.

¹³ Biabia umune a mu kibumbu bamwambile’shi: A Mulambukishi, akula na mukwetu angabile namu bia buhyanyi.

¹⁴ E bamulungwile’shi: Obe muntu, a nanyi bantulu’mi bu nsushi, su bu mwabanyi enu?

¹⁵ Biabia e bebālulwile’shi: Dimukai, nwilame ku malaka: mwanda muwa wa muntu tawi mu bungi bwa bintu biadi n’abio, ooo.

¹⁶ Henyihaha bebēle mwele’shi: Nsenga ya muntu mpeta yibatushishe bibungi.

¹⁷ E batentekyeshe munda mwe’shi: Nkite na minyi? mwanda nki na mbalo ya kutula bikuba biande.

¹⁸ Biabia bākwile’shi: Nankakitshi bino; nankahongola bisasa bianda, nkebakishe bikile bukata; nyi mwa nkabikye bidibwa biande bioso na bintu biande namu.

¹⁹ Nankalungula eshimba diande’shi: Obe eshimba, we na bintu bibungi bibikwe ku bihwa bibungi; ikishanga, odie, otome, osehele.

²⁰ Ank’Efile Mukulu bamwambile’shi: Obe mulotakane, mu buno bufuku muwa wobe wakyebibwa, biabia bintu biolumbulwile, abikekala bi’anyi?

²¹ Anka biabia yawa ēbikila bie bineme, shī na buheta namu kw’Efile Mukulu e anka biabia.

²² Balungwile bana-be-ba-bukishi’shi: Binyibiabia nenulungula’shi: Tanukalakashanga mashimb’enu ha mwanda wa muwa wenushi; atukadi kinyi? sunga ha mwanda wa mbidi’shi: Atukafwala kinyi?

²³ Muwa ngukile bidibwa, na mbidi ngikile bifwalwa.

²⁴ Tentekyeshai bidilanana, mwanda tabikufia sunga nkuumbulā; tabi na bisasa sunga mutala: nyi Efile Mukulu ebidishā: anwe tanwi bakile tonyi buwa bukata naminyi?

²⁵ Nanyi hanudiha, ha kukalakasha mitentekyesho ye, euku kukisha kishisa kie bu centimetre makumi atano su?

²⁶ Binyibiabia su tanwiuku kukita sunga kiakia kikile buhela, a nkinyi kianukalakasha mashimba enu hamwanda w’abishala?

²⁷ Tentekyeshai bilongo bia bilawelawe mwabimenā: tabituhutā, tabiluku; anka nenulungula’shi: Sunga Solomone mu ntombo ye yoso, tabadi mufwadikwe bu kimune kia’bio.

²⁸ Binvibiabia su Efile Mukulu afwadika lubishi biabia, alo lwi mu mahia lelo, na maloba alwedibwa mwidingidingi dia kālo: a biabia kwanudi’nwe naminyi? anwe ba lukuluhilo luhela.

²⁹ Tanukimbanga bianudia kudia sunga mbianudia kutoma, sunga nkwikala na katshima munda.

³⁰ Mwanda bino bintu bioso mīlo yahanohansenga eyibikimbā: anka nshyenu euku nwi na lukalo lwa bino bintu.

³¹ Anka nkukile kukimba bufumu bw’Efile Mukulu, biabia bino bintu bioso abikenutentekyelwa.

³² Tanutshinanga’nwe lombe luhela, mwanda Nshyenu nyi mutokye mwishimba die kwinuha bufumu.

³³ Nuhanei bia nudi n’abio, nuhane bia-buntu; nwifishishe kwi’ nwe bana bene madimba ashyakakulu, kintu kineme mwiilu kishī na nfudilo, amo (namu) sunga ngifi takefubula hehi, sunga nkēshi kakulwisha kianka.

³⁴ Mwanda ahakekala kineme kienu, nyi ahakekala mashimb’enu.

³⁵ Nuanye nshibo mbifuka bienu, na matata enu ekale atembe.

³⁶ N’anwe bana mwinyi nwikale bu bantu abatengyela nfumwabo hakāluka ku bidibwa bia kubamba’shi: hakafiki, atutule bakamushitwile anka hanka.

³⁷ Mwabi kwi’ba bahika abakasañanwa na nfumwabo bakwete kumutengyela ha kufika: binyibinyi nenulungula’shi: akānya nshiho ē na mwinyi, akebashadishe ha bidibwa, akatuku kwibābila.

³⁸ Su akafiki ha nsamu ya kabidi sunga ha nsamu ya kasatu, na kwibasañana biabia, mwabi kwi baba ba bahika.

³⁹ Anka nwiukye kino’shi: Su sha nshibo badia kwiuka nguba akafiki ngifi badia kutengyela, tabadia kukumina nshibo ye kutubulwa.

⁴⁰ Binyibiabia nwikale bemane namu, mwanda Mwan’a Muntu akafiki ha nsa yanushyanumutentekyela.

⁴¹ Henyihaha Petelo bamwihwishe’shi: A Nfumwetu wakula luno lukindji kwatudi ank’atwe’nyi, su kwi boso?

⁴² Biabia Nfumwetu bambile’shi: Henyihaha nanyi mendaku a kishima na binangu, nfumwe amutulu bu mumunyi a mu nshibo mwe, kwabila bidibwa bilombane ha kihindji kiabo.

⁴³ Mwabi kwi yawa mpika akasañanwa na nfumwe hakafiki akitshi anka bino.

⁴⁴ Mbia binyibinyi nenulungula’shi: Akamutulu bu mumunyi a bintu bie bioso.

⁴⁵ Anka su yawa mpika akākula mwishimba die’shi: Nfumwami bakisha ha kufikila; biabia akabanga kukuhila bahika n’e, balume na bakashi, na kudia, na kutoma, na kukolwa:

⁴⁶ Biabia nfumu a yawa mpika akafiki h’efuku diashyamutengyela, na ha nsa yiashyeuku, biabia akamulamuna, akamuha kihindji kie na bashī bakumine.

⁴⁷ Na yawa mpika mwiukye amukyebela eshimba dia nfumwe, tamwilumbule, sunga nkukita mwiyile eshimba die, e akakuhilwa bikata.

⁴⁸ Anka yawa shī mwiukye, akitshi (bintu) bilombane na ku kuhilwa, akakuhilwa bihela. Mwanda kwi ese muhebwe bibungi, kwadi akukakyebibwa bi bungi: na kwi yawa mutudiiwe bibungi, kwadi akukatekwa bikile bungi.

⁴⁹ Nyi mufikye kwela kālo hanohansenga, nankyebe’shi, kekale hwile kutemba?

⁵⁰ Ank’ami nyi na lubatshisho lwa kubatshisha n’alo; ai ai! nemukalakashwe mpaa n’ahalukahwila

⁵¹ Anutentekyesha’shi, nyi mufwile kuha kufukama, hanohansenga? Nenulungula’shi: Ayoyo, anka kukalanana.

⁵² Mwanda mpaa na binobino, akukekala batano mu nshibo yimune, abakakalanana; basatu abaketuhishena na babidi, babidi namu abaketuhishena na basatu.

⁵³ Nshye mwana mulume aketuhishena na mwan’e, na mwan’e mulume namu aketuhishena na nshye; nyin’a mwana aketuhishena na mwan’e mukashi, na mwan’e mukashi aketuhishena na nyin’e; na nyina-mweno aketuhishena na mukashi a mwana, na mukashi a mwana aketuhishena na nyinamweno.

⁵⁴ Balungwile bantu namu’shi: Hanumono ekumbi adiyingidika kwa kuhona nguba, anwakula hanka’shi: Mpeshi a kifunko afiki, nyi anka biabia.

⁵⁵ Hanumono luhahi lwa ku Sude taluhuku anwakula’shi: Akafiki kanya kebukoho, akafikyi namu anka biabia.

⁵⁶ (Anwe) bansesa, anwiuku kutundula mpala yeilu na ya nsenga, anka a nkinyi tanushingula bia kino kihindji?

⁵⁷ Mwanda kinyi namu tanwitshibila’nwe bana bene mu lulamine mwanda wibuwa?

⁵⁸ Hoende na mwituhishyanyi n’obe ku mpala kwa mulumbudi, biabia otē ’shimba diobe mwishinda biodia kulekyelwa kwadi, tala akakukakila kwi nsushi, n’e namu akakutula ku masa a musalai, na musalai akwela mu nshibo ya lukano.

⁵⁹ Nakulungula’shi: tokakatuka mwanka, mpā na hokahu kufuta ekuta dia kunfudilo.