Luka 10 - KILOMBENO KIHYA KIA NFUMWETU YESU KIDISITU

¹ Ku nyima kwa yino myanda, Nfumwetu basangwile bangi makumi musambobidi namu, bebatumine babidi babidi ku mpala kwe, mu bibalo bioso na mu bingi bihindji biakafiki e na mwinyi.

² Binyibiabia bebalungwile’shi: Biumbulwa mbikata, anka bafubi mbahela: nutekye Nfumu a biumbulwa, atume bafubi ba kuumbula.

³ Ndai, nenutumu bu bana ba mikoko munkatshi mwa tūmishi.

⁴ Tanutwalanga edimba dia nfalanga, sung’ebofu, sunga biashino, ooo: tanwimunanga muntu mwishinda.

⁵ Mu yoso nshibo yanutwele, kwibedi’shi: Kufukama kwikale ku yino nshibo.

⁶ Su mwana mufukame e mwanka, biabia kufukama kwenu kukekale mwanka; su mwi bisumanga akukāluluka’nyi dimo kwanudi.

⁷ Mu yingi nshibo yanukekala, nudie, nutome abia bintu biabenuha; mwanda mufubi ’muhwandjikile efuto. Tanukindakananga mashibo.

⁸ Mu kioso kibalo namu kianukatwele, n’abo abenukukila, biabia diai bintu bitulwe ku mpala kwenu.

⁹ Nuhwishe basha masungu be mwanka, nwibalungule’shi: Bufumu bw’Efile Mukulu bubafiki hehi n’enu.

¹⁰ Anka mu kioso kibalo kianukatwele, n’abo tambenukukile, tukai mu misē y’akio, nwakule’shi:

¹¹ Sunga lufūfi lwa ku kibalo kienu alwitulamata, atwinukukwila’lo, sunga mbiabia nwiukye binyibinyi’shi, bufumu bw’Efile Mukulu bubafiki hehi kwanudi.

¹² Anka nenulungula’shi: Mu adi’efuku, malwa a Sodoma akekala akile kubofula he malwa a kiakia kibalo.

¹³ Mpombo kodibe Kolushine E mpombo kodibe Betesaida! mwanda bikitshino bikata bibakitshinwe mwanudi, su bibadi akukitshibwa mu Tshile na Shidona, abadia kwilanga kala, na kushāla mu bilamba bia makutu na būto.

¹⁴ Anka ahakafiki efuku dia kimu, malwa a Tshile n’ā Shidona akekala bu a bofula he malwa enu.

¹⁵ N’obe Kahaneuma bokamishibwa kwiilu, okayishibwa mu kalunganyembo.

¹⁶ Yawa enuhushā ampusha’mi; n’e ansabula, asabula yawa antumine.

¹⁷ Be makumi musambobidi abalukile na masanku’shi: A Nfumwetu, bikudibibi bibetukokyela mwishina diobe.

¹⁸ N’e bebalungwile’shi: Namwene Satana ahono kwiilu bu luhete lwa mpeshi.

¹⁹ Talai, nenuha matalwa a kwashina manyoka na tuminu, na ha bukome boso bwa mwitushikwe; binyibiabia takwi sunga nkimune akikenusakula.

²⁰ Sunga mbiabia, tanuse helanga ha uno mwanda’shi, bikudi bibi bibenukokyela; anka nusehele ha mwanda mashin’enu ngafundwe mwiilu.

²¹ Ha yawa nguba Yesu basehelele mu Kikudi (E-Selelee,) bakwile’shi: Nakutumbul’obe Yaiya a mwiilu nahashi, mwanda bofīle yino myanda kwi basha binangu na bahatulukye, bweyisokwela bana bakinga: Ee! Yaiya, mwanda biabia nyi mwiyile diobe eshimba dibuwa.

²² Bintu bioso bibamfishishwa kwi Nshyami, anka takwi sunga ngumune euku Mwana, anka Yaiya; na Yaiya namu takwi sunga ngumune amwiuku anka Mwana; na yawa, Mwana akamusokwela kwadi.

²³ Biabia bealulwile kwi bana-be-ba-bukishi, bakwile ku bukunkula’shi: Mwabi kwi meso amono bintu bianumono.

²⁴ Mwanda nenulungula’shi: Batemuki bebungi na banfumu abadi abakyebe kumona’bia bintu bianumono, anka tambebimone; na kuhusha myanda yanuhusha, anka tambeyihushe, ooo.

²⁵ Binyibiabia talai, muhatudi-a bishila bemene, bamutompele’shi: A Mulambukishi, nkite na minyi kuhyana muwa wa ikala-ika?

²⁶ E bamwambile’shi: Kifundwe na minyi mu mukanda-wa-bishila? obe obalā na minyi?

²⁷ E bālulwile’shi: Okafule Yehowa Efile Mukulu obe kifulo, mwishimba diobe dioso, na mu kikudi kiobe kioso, na mu bukome bobe boso, na mu binangu biobe bioso; na ku mwikashi n’obe bu’be na mwinyi.

²⁸ E bamulungwile’shi: Boalula binyibinyi; kita biabia okekala na muwa.

²⁹ Ank’e badi akyebe kwibingisha e na mwinyi; bakwile kwi Yesu’shi. A nanyi mwikashi n’ami?

³⁰ Biabia Yesu bālulwile’shi: Kubadi muntu bayikile ku Yelusalema, kwenda ku Yediko, bahōne mu maas’a bangifi, abamufule bilamba bie, abamusakwile, abakatukile, abamulekyele liehi kufwa.

³¹ Binyibiabia, tshiite-mwakwidi umune badi afiki ha diadi’eshinda, habamumwene bakile ha lungi luhese.

³² Biabia mwina Lefi namu anka hamune, habafikile kwanka bamutale bisumunga, bakile ha lungi luhese.

³³ Anka mwina Samadia umune habayile luendo, bafikile kwadi; habamumwene bamukwatshile lusa.

³⁴ Befubwile kwadi, bamwanyine malonda, bamuhongolwele mwanka mwimu na nfinyo, bamualiza tentekyele ha nyama ē na mwinyi, bamufishishe ku nshibo ya benyi, bamulēle.

³⁵ H’efuku dia maloba habebwele luendo, batushishe nfalanga ya ndenadi yibidi, beyihele sha nshibo, bamulungwile’shi: Omulele; na bioso okahana dimonyi, hankāluka nankakwalwisha.

³⁶ Obe ohwandjikisha’shi; A nanyi a ku baba basatu badi mwikashi a yawa bahone mu maas’a bangifi?

³⁷ E bālulwile’shi: Yawa bamufwidile lusa. Biabia Yesu bamulungwile’shi: Nda, okite hamune.

³⁸ Henyihaha bitabibakitshine, habayile abatwelele mu kingi kibalo; na mwana mukashi umune atemunwa bu Māta, batambwile Yesu mu nshibo ye.

³⁹ Badi na mukwabo mukashi atemunwa bu Madiya, badi mushale namu ku ngwā ya Yesu, badi ahusha mwanda we.

⁴⁰ Anka Māta bakambi-lwe na mwanda wa mifubo yibungi ya mu nshibo; bafikile kwadi, bamwambile’shi: A Nfumwami, tonangushena bibandekyela mwin’ande kufuba buhenka bwande? Banda kumulungula afikye akankwashye.

⁴¹ Yesu bamwālulwile’shi: Māta! Māta! obe okamba kunangushena mwanda wa myanda yibungi ayikukalakasha:

⁴² Anka kintu kimune ki lukalo, na Madiya basangwile kiakia kihindji kibuwa kishyakikamwatwa kwadi ooo.