Kibafumulwe 5 - KILOMBENO KIHYA KIA NFUMWETU YESU KIDISITU

¹ Henyihaha namwene mwiyasa dibalume dia yawa badi mushale ha luhun’a nsulu mukanda ufundwe munda na ha nyima, ulamikwe hoo na biukilo musambobidi.

² Namwene namu mwikeilu e bukome ele musase n’Eyi dikata’shi: A nanyi muhwandjikile kubūla mukanda na kulamuna biukilo biao?

³ Biabia takubadi sunga ngumune mwiilu, sunga hanohansenga, sunga mushi mwa nsenga badi mwiukye kubūla mukanda, sunga nkutala hanka.

⁴ N’ami nadilanga (mpolo) bikata mwanda takubadi muntu muhwandjikile kubūla na kubala mukanda, sunga nkutala hanka.

⁵ Henyihaha umune a ku bakulu bambile’shi: Todilanga, Ntambwe nku kisaka kia Yuda, Mushi wa Dafidi, bakambile kubūla mukanda na kulamuna biukilo biao musambobidi.

⁶ Namwene munkatshi mwa luhun’a nsulu na mwa nyama ya muwa yinanka, na munkatshi mwa bakulu, Mwan’a Mukoko mwimane, bu mubadi mwihayibwe, badi na nsengwa musambobidi na meso musambobidi, nyi m’Bikudi bi’Efile Mukulu musambobidi bibatumibwe hanohansenga hoso.

⁷ Henyihaha bafikile bātshile mukanda kwiyasa dibalume di’awa badi mushale ha luhun’a nsulu.

⁸ Habahwile kuata mukanda, nyama ya muwa yinanka, na bakulu makumi abidi na bananka bibahone hashi ku mpala kwa Mwan’a Mukoko, boso bwa’bio bibadi na nsese na malonga a nsahabu aule na malashi, ao nyi nteko ya bahatulwe-bekishila.

⁹ Abo abadi abayimbi lono luhya’shi: Obe ’muhwandjikile kuata mukanda, na kulamuna biukilo biao; mwanda boyihayibwe, bwetukudile kw’Efile Mukulu ku mase obe, mu bisaka bioso, na mu ndjimi yoso, na mu bantu boso, na mu milo yoso;

¹⁰ bwetwikasha bu banfumu na batshiite-bakwidi kw’Efile Mukulu etu; n’atwe twanakabikale hanohansenga.

¹¹ Biabia namwene, nahusha eyi dia bamwikeilu bebungi babadi befunye luhun’a nsulu na nyama ya muwa, na bakulu; na bungi bwabo bubadi binunu ekumi bifwimishe misusa binunu ekumi, nabinunubia binunu.

¹² Abākula n’eyi dikata’shi: Mwan’a Mukoko bayihayibwe ’muhwandjikile kutambula bukome, na buheta, na binangu, na ntshitshiba, na kinemo, na ntumbo na mwabi.

¹³ Biabia bihangwe bioso bi mwiilu, na bi ha nsenga, na bi mushi mwa nsenga, na bi ha mema-a-kalunga, na bintu bioso bi mwanka, nebihushishe abiakula’shi: Mwabi na kinemo, na ntumbo, na butontshi bikale kwi yawa mushale ha luhun’a nsulu, winyi Mwan’a Mukoko mpaa na kwikala-ika.

¹⁴ Henyihaha nyama ya muwa yinanka yibakwile’shi: Amena. Na bakulu makumi abidi na bananka abahone hashi, tabalangwila Yawa atala mpaa na kwikala-ika.