Kibafumulwe 22 - KILOMBENO KIHYA KIA NFUMWETU YESU KIDISITU

¹ Binyibiabia bandesheshe mwela wa mema a muwa-autala wi soo, selelee bwitalatala, autuku mu luhun’a-nsulu lw’Efile Mukulu, na lwa Mwan’a-Mukoko.

² Munkatshi mwa luhata lwa’kio na ku mpese yoso yibidiya mwela (kubadi) mutshi wa muwa-au-tala, auheya bikuba misusa ekumi na yibidi ku mweshi ku mweshi, na mabishi a mutshi abadi a kuhasha n’ao mīlo ya bantu.

³ Takukekala muloa dimonyi, ooo; anka luhun’a-nsulu lw’Efile Mukulu na lwa Mwan’a-Mukoko alukekala mwanka, na bahika be banakamufubile.

⁴ N’abo banakamone mpala ye n’Eshina die dianakekale ha mahala’bo.

⁵ Takukela bufuku dimonyi, ooo, ta be na lukalo lwa kimunyi, sunga etata dia nguba; mwanda Yehowa Efile Mukulu anakebahe etata, n’abo banakabikale mpaa na kwikala-ika.

⁶ N’e bandungwile’shi: Yino myanda ngia kishima na binyibinyi: na Yehowa Efile Mukulu a bikudi bia batemuki batumine mwikeilu mu kulesha bahika be myanda ayikyebe kukitshibwe ahayisha kihindji kihi.

⁷ Talangai, nafiki bukidi; sha mwabi yawa alama myanda yibatemukile mu uno mukanda.

⁸ N’ami Yoano nyi winyi bahushishe na kumona yino myanda. Hanahushishe na kumona, nahone mu kulangwila ku mpala kwa ngwa ya mwikeilu bandesheshe yino myanda.

⁹ Henyihaha bandungwile’shi: Ooo tokitanga biabia; ami nyi mufubi n’obe na bakwenu batemuki, n’aba abalama myanda ya uno mukanda w’Efile Mukulu; langwila Efile Mukulu.

¹⁰ Bandungwile namu’shi: Tolamikanga myanda yabatemukilwe mu uno mukanda; mwanda kihindji takidi hehi.

¹¹ Yawa shī mululame ekadidile na yishī yilulame; na yawa e butete ekashwe mbutete: na yawa ’mululame akadidile mululame; na yawa muhatulwe-e-kishila ekadidile muhatulwe-e-kishila.

¹² Talangai, nafiki lubilo; na bwedi bwande bwi n’ami kulubwila kwi muntu ese muhunda mufubo we, muntu na w’e, muntu na w’e.

¹³ Ami nyi Alefa na Omenga, mbangilo na nfudilo, a kwibedi n’a nfudilo.

¹⁴ Basha mwabi nyi mbaba abasula mitwelo yab’oshi, bekale na matalwa a ku mutshi wa muwaau-tala, na kutwela mwanka ku bibelo bia kibalo.

¹⁵ Hasha he mbwa, na basha masende, na basha lukyebanokyebano, na bantomboshi, na balangwidi ba mankishi, na boso abasehela na kudimba madimi.

¹⁶ Ami Yesu natumine mwikeilu ande kwinulungula bu kamonyi yino myanda mu bikoñeno bi’Efile. Ami nyi mushi na kekulu ka Dafidi, lwinyi luenyenyi lwa kunkyelo lwi selelee.

¹⁷ Kikudi-E-Selelee na mukashi takyebe kutwela abakula’shi: Fika. Na yawa ahusha akule ’shi: Fika. Na yawa e na nyota afikye, yawa namu e n’eshimba dia kukyeba atambule mema a muwa buana.

¹⁸ Nākula bu kamonyi kwi muntu ese ahushā myanda ya lutemuko lwa uno mukanda’shi: Su muntu akatenteka yingi myanda ha yino, Efile Mukulu akamutentekyela binyi bihuha bifundwe mu uno mukanda.

¹⁹ Na su muntu akalamuna myanda ku uno mukanda wa lutemuko, Efile Mukulu akamulamunwina kihindji kie ku mutshi wa muwa-au-tala, na ku kibalo kihatulwe-ki-kishila, na (ku) myanda yifundwe mu uno mukanda.

²⁰ Winyi e ākula bu kamonyi yino myanda amba’shi: Ee, nafiki bukidi. Amena; fika Nfumwetu Yesu.

²¹ Bu-muntu bwa Nfumwetu Yesu bwikale na bahatulwebekishila boso. Amena. KUNFUDILO.