Kibafumulwe 21 - KILOMBENO KIHYA KIA NFUMWETU YESU KIDISITU

¹ Namwene eilu dihya na nsenga yihya; mwanda eilu dia kwibedi na nsenga ya kwibedi bibakididile; takubadi namu mema-a-kalunga dimonyi.

² Ami Yoano namwene kibalo kihatulwe-ki-kishila kia Yelusalema muhya, akiiki mwiilu kw’Efile Mukulu, kilumbulwe bu mukashi ēnde mu kutwela mwilengyele mulund’e.

³ Nahushishe namu eyi dikata adituku mwiilu’shi: Talangai, kibombelelo ki’Efile Mukulu ki munkatshi mwa bantu, n’e akabombele munkatshi mwabo, abo banakekale bantu be, n’Efile Mukulu na mwinyi anakekale n’abo, t’Efile Mukulu abo.

⁴ E anakakumune mpolo yoso ku meso abo; takukekala lufu dimonyi, sunga mālo, sunga nkudila, su mitanyo dimonyi, ooo; mwanda bintu bia kwibedi bibakididile.

⁵ Yawa ashalā ha luhun’a-nsulu bambile’shi: Talangai, bia mpangula bintu bioso ta mbihya. Bambile’shi: Funda, mwanda yino myanda yi kishima na ya binyibinyi.

⁶ E bandungwile’shi: Takuhwanga. Ami nyi Alefa na Omenga, mbangilo na nfudilo. Nankah’e na nyota ku nsulo ya mema a muwa buana.

⁷ Yawa akambila anakahyane bino bintu, n’ami nankekala kwadi bw’Efile Mukulu e, e namu akekala kwandji’mi bu ande mwana.

⁸ Anka basha moo, na bashī bukumine, na be butete, na bantomboshi, na basha lukyebanokyebano, na basha masende, na balangwidi ba mankishi, na basha madimi boso, abakabungilwe mwishiba aditembe kālo na soufre; luno nyilufulwa kabidi.

⁹ Henyihaha kubafikile umune a ku bamwikeilu musambobidi, badi na bihulu musambobidi, bi munemene na bihuha musambobidi bia nfudilo; bākwile n’ami’shi: Fwa kuno, nkuleshe mwana mukashi takyebe kutwela, nyi mpian’a Mwan’a-Mukoko.

¹⁰ Henyihaha bantwadile mu Kikudi-E-Selelee ku ngulu mukata mula, bandesheshe kinyi kibalo kihatulwe-ki-kishila, Yelusalema, ayiki mwiilu kw’Efile Mukulu,

¹¹ ki na ntumbo y’Efile Mukulu: etata dia’kio dibadi bwibwe dikilekile kinemo, bwibwe dia jaspe di selelee bwitalatala;

¹² kibadi na lubumbu lukata lwi bula; kibadi na bibi ekumi na bibidi, na bamwikeilu ekumi na babidi bemane ku bibi; na mashina afundwe hanka, nyi nga bisaka bia bena Isalele ekumi na bibidi;

¹³ ku tunduka bibi bisatu, ku Node bibi bisatu, ku Sude bibi bisatu, na ku hon’a nguba bibi bisatu.

¹⁴ Na lubumbu lwa kibalo lubadi na bibangilo ekumi na bibidi; na mashina a batumibwa ekumi na babidi ba Mwan’a Mukoko hanka.

¹⁵ Na yawa bakwile n’ami badi n’elengye dia nsahabu dia kuhima n’adio kibalo, na bibi bia’kio, na lubumbu lwa’kio.

¹⁶ Kibalo namu kibadi mpese yinanka yi mosomoso, mbula bwa’kio na mbukata mpamune: e bahimine kibalo n’elengye, kilomètres hehi binunu bibidi na nkama yinanka. Bula bwa’kio na bukata, na bula bwa mwiilu bwi hamune.

¹⁷ Henyihaha bahimine lubumbu lwa’kio, mètres makumi musambobidi na mwanda (mulombene) kihwandjikisho kia muntu, nyi nkwambashi, kwa mwikeilu.

¹⁸ Na bibakwa bia lubumbu (bibadi) bia jaspe. Kibalo (ki na mwinyi kibadi) kia kilonda kia nsahabu ki soo, bu kelobe ke soo.

¹⁹ Bibangilo bia lubumbu lwa kibalo bibalengyelwe na mabwe aneme e bihaso na bihaso. Kibangilo kia kwibedi kibadi kia jaspe, kia kabidi nkia saphir, kia kasatu nkia calcedoine, kia kananka nkia l’emeruade,

²⁰ kia katano sardonyx, kia kasamombo nkia sardoine; nkia musambobidi nkia chrysolithe, kia mwanda nkia beryl, kia kitema nkia topaze, ki’ekumi nkia chrysoprase, ki’ekumi na kimune nkia l’hyacinthe, ki’ekumi na bibidi nkia l’amethyste.

²¹ Na bibi ekumi na bibidi bibadi perles ekumi na yibidi; ku kioso kibi kubadi perle umune; na luhata lwa kibalo lubadi lwa kilonda kia nsahabu ki soo, bu kelobe ke soo.

²² Nkimwimumone ntempelo; mwanda Yehowa Efile Mukulu Shabukomeboso, na Mwan’a-Mukoko nyi ntempelo ya’kio.

²³ Kinyi kibalo takī na lukalo lwa nguba, sunga ndwa mweshi bia kumunyika mwanka; mwanda ntumbo y’Efile Mukulu yibekimunyikile, na kimunyi kia’kio nyi Mwan’a-Mukoko.

²⁴ Na mīlo y’aba bahande banakatambukye kwitata dia’kio; na banfumu ba ha nsenga banakafishe ntumbo y’abo mwanka.

²⁵ Bibi bia’kio tabianashitwe sunga mpahela mu kanya, (mwandā’kwa takwi bufuku):

²⁶ Banakafishe ntumbo na kinemo bia mīlo ya bantu mwanka.

²⁷ Tamukatwele kia kushula, sunga mpahelahela, sunga yawa akitshi ya butete, sunga madimi, ooo; anka’ba bafundjibwe mu mukanda wa muwa wa Mwan’a-Mukoko.