Kibafumulwe 19 - KILOMBENO KIHYA KIA NFUMWETU YESU KIDISITU

¹ Ku nyima kwa yino myanda nahushishe eyi dikata dia kibumbu kikata mwiilu’shi: Aleluya! Kihandjilo na ntumbo na kinemo, na bukome, nyi mbi’Efile Mukulu etu:

² mwanda kitshibilo kie kia kimu nyi nkia binyibinyi na kululama; mwanda batshibile kimu kia winyi mukashi-sha-lusandji, winyi balwishishe hanohansenga na lukyebanokyebano lwe, bōbwele mase a bahika be kwiyasa die.

³ Mususa wa kabidi abakwile’shi: Aleluya! na mwishi we ubebwele mpaa na kwikala-ika.

⁴ Biabia bakulu makumi abidi na bananka na nyama ya muwa yinanka bibahone hashi, tabalangwile Efile Mukulu mushale ha luhun’a nsulu’shi: Amena, Aleluya!

⁵ Henyihaha eyi dibatukile mu luhun’a nsulu’shi: Tumbishai Efile Mukulu etu anwe bahika be boso, n’anwe abamutshinyi, bahela na bakata.

⁶ Nahushishe namu bu kubadi eyi dia kibumbu kikata, na bwīyi dia mema e bungi, na bwīyi dia mikungulu yikata’shi: Aleluya, mwanda Yehowa Efile Mukulu Shabukomeboso abikalā.

⁷ Tusehelei na kusangala kukata, tumuhei ntumbo, mwanda ebambo dia Mwan’a-Mukoko dibafiki, na mpian’e tahwile kwilumbula.

⁸ Kubamuhelwe’shi; efwadikye bilamba bia lin binane, bitoka na selelee; mwanda bilamba bia lin binane nyi mbikitshino bilulame bia bahatulwe bekishila.

⁹ E bandungwile’shi: Funda’shi: Basha mwabi mbaba abetanyinwa ku bidibwa bi’ebambo bia Mwan’a-Mukoko. Bandungwile namu’shi: Yino nyi myanda ya binyibinyi y’Efile Mukulu.

¹⁰ Biabia nahone hashi ku ngwa ye kumulangwila. Bandungwile’shi: Ooo, tokitanga biabia. Ami nyi mufubi n’obe, n’a bakwenu bulungudi bwa Yesu; langwila Efile Mukulu; mwanda bulungudi bwa Yesu nyi muwa wa kutemuka kwa myanda.

¹¹ Namwene mwiilu mushitukye; talangaii (kubadi) nfalasa toka; na yawa badi mutentame hanka aitaminwa bu, A Kishima, n’a Binyibinyi; atshibi kimu na kulwa ngoshi mu kululama.

¹² Meso e abadi bwidimi dia kālo, na ha mutwe he habadi bilongo bibungi; badi n’eshina difundwe dishī diukye muntu, ank’e na mwinyi.

¹³ Badi mufwale mutwelo umaminwe mase; n’eshina die nyi Mwanda w’Efile Mukulu.

¹⁴ Na mafita a mwilui abamulondele ha nfalasa yitoka, bafwale bilamba bia lin binane, bitoka selelee.

¹⁵ Mu kanwa mwe amutuku luhete lwa ngoshi lwi māshi’shi, akuhile n’alo mīlo ya bantu; anakebamune n’elanga dia kilonda; āshine ha kyengyelo kia bukyelo na nsungu y’Efile Mukulu Shabukomeboso.

¹⁶ Ha mutwelo we na h’etankanta he badi n’eshina difundwe’shi: NFUMU A BANFUMU, NA MWANANA A BAMWANANA.

¹⁷ Namwene namu mwikeilu mwimane mu nguba; bēle musase n’eyi dikata kwi tonyi toso atuhahula munkatshi mwiilu’shi: Fwai nwikongwele hamune ku kidibwa ki’Efile Mukulu mukata’shi;

¹⁸ nudie mwita wa banfumu, na mwita wa bimankinda, na mwita wa bantu bakata, na mwita wa nfalasa, na w’aba abatentama ha nyima hayo, na mwita wa (bantu) boso, baana na bahika, bahela na bakata.

¹⁹ Namwene nyama-e-bukyelo, na banfumu ba ha nsenga, na mafita’bo bekongwele hamune kulwa ngoshi na yawa mushale ha nfalasa, na ku mafita e.

²⁰ Biabia nyamae-bukyelo bakwatshilwe, na winyi mutemuki amadimi bakitshine bitundwilo ku mpala kwe, nyi bibōngwele n’abio baba abatambwile kitundwilo kia nyama-e-bukyelo, n’aba abalangudile kihwandjikisho kie. Bano babidi abedibwe abatala mwishiba dia kālo aditembe na soufre.

²¹ N’aba abashele abehayibwe na luhete lwa ngoshi lw’awa mushale ha nfalasa, lwinyi’lo lubatukile mu kanwa mwe; na tonyi toso tubekwite na mwita wabo.