Kibafumulwe 17 - KILOMBENO KIHYA KIA NFUMWETU YESU KIDISITU

¹ Kubafikile umune a bamwikeilu musambobidi badi na bihulu musambobidi, bākwile n’ami’shi: Fika kuno; nkuleshe kitshibilo kia mukashi sha lusandji ashala ha mema ebungi,

² uno nyi abakitshine n’e lukyebanokyebano kwi banfumu, na babombedi ba hanohansenga abakolweshwe na nfinyo ya lukyebanokyebano lwe.

³ Henyihaha bantwele mu Kikudi-E-Selelee mpaa na mu kabāka: Namwene mwana-mukashi mushale ha nyama-e-bukyelo monga hyū, mūle mashina a kasabu ka kukaa (Efile Mukulu), badi na mitwe musambobidi na nsengwa ekumi.

⁴ Winyi mwana mukashi badi mufwale bilamba bimongolokye, na bimonga hyō, mushingwe na nsahabu na mabwe aneme n’a perles; badi na kihulu kia nsahabu mwiyasa die kiule biakubendwa na bibutete bia lukyebanokyebano lwe;

⁵ na ha mpala he eshina difundwe’shi: KIFIBWE, BABELONE MUKATA, NYIN’A BASHA LUSANDJI BANA-BAKASHI, N’A BIAKUBENDWA BIA HANO HA NSENGA.

⁶ Namwene namu winyi mwana mukashi mukolwe na mase a bahatulwe bekishila, na mase a tumonyi twa Yesu: hanamumwene nakanyine na kukanya kwi moo.

⁷ Na mwikeilu bākwile n’ami’shi: A kiobokanyine nkinyi? Nankulungula kifībwe kia mwana-mukashi, na kia nyama-e-bukyelo yabamutwale, e na mitwe musambobidi na nsengwa ekumi.

⁸ Winyi nyama-e-bukyelo obomwene badi kala, binobino te kwanka, takyebe kwabuka luhongo lushī na nfudilo ēnde mu kulwididila. N’abo ababombela ha nsenga banakakanye, (mbaba) bashī na mashina’bo afundwe mu mukanda wa muwa wa ku mbangilo ya hanohansenga; habanakamone nyama-e-bukyelo, mwadi mwikele kwanka, te kwanka binobino, n’akafiki.

⁹ Kuno nyi na binangu bi na kalolo. Yinyi mitwe musambobidi nyi mangulu musambobidi hashale mwana-mukashi.

¹⁰ Kwi namu banfumu musambobidi; batano mbahone kala, na umune e kwanka, mungi’nyi tabandjile kufika; hanakafikye anakekale kihindji kihi.

¹¹ Winyi nyama-e-bukyelo badi kwanka kala, anka taki kwanka, e winyi nyi nga mwanda, e namu’nyi nga winyi musambobidi; ēnde mpaa na mu kulwididila.

¹² Na nsengwa ekumi yibomwene nyi banfumu ekumi, bashyababandjile kuata bufumu, ank’abatambula matalwa a bu banfumu (ku kihindji kia) nsa umune na nyama-e-bukyelo.

¹³ Bano be n’eshimba dimune, banaikahe matalwa’bo na bukome (kwi) nyama-e-bukyelo.

¹⁴ Bano banakalwe ngoshi na Mwan’a-Mukoko, na Mwan’a-Mukoko anakebakambile: mwanda e nyi Mwanana a bamwanana, na Nfumu a banfumu: n’abo be n’e mbetanyinwe, na basangudibwe, na bakishima.

¹⁵ N’e bandungwile’shi: Enyi mema obomwene hashale mukashi-sha-lusandji e bu bibumbu bia bantu, na mīlo na ba ndjimi.

¹⁶ Nsengwa ekumi yibomwene, na nyama-ebukyelo, ayo yanakashikwe mukashi-sha-lusandji, banakamwikashe musadikye, na muswa, abakadī namu mwita we, banakamuhidile na kālo.

¹⁷ Mwanda Efile Mukulu beutule mu mashimba’bo kukumbasha amukyebel’eshimba die, na kulombashena, na kuha bufumu bwabo kwi nyama-e-bukyelo mpaa n’ahakakumbana myanda yoso y’Efile Mukulu.

¹⁸ Na mwana-mukashi obomwene nyi nkinyi kibalo kikata, akibikalā hanundu ha banfumu ba ha nsenga.