Kibafumulwe 16 - KILOMBENO KIHYA KIA NFUMWETU YESU KIDISITU

¹ N’ami nahushishe eyi dikata adifu mu ntempelo, adiakula kwi bamwikeilu musambobidi’shi: Ndai nuhongole bihulu bia bukyelo bw’Efile Mukulu ha nsenga.

² Mwikeilu a kwibedi bayile, bahongolwele kihulu kie ha nsenga; biabia kubafikile elonda ditote bi moo ha bantu babadi na kitundwilo kia nyama-e-bukyelo, na he’ba abalangwila kihwandjikisho kie.

³ Henyihaha mwikeilu a kabidi bahongolwele kihulu kie mu mem’a-kalunga, abalulukile ta mase bu a (muntu) mufwe; na bintu bioso bi na muwa mu mem’a-kalunga bibafwile.

⁴ Na mwikeilu a kasatu bahongolwele kihulu kie mu ngwi na mu masulo-a-mema; abalulukile ta mase.

⁵ N’ami nahushishe mwikeilu e hanundu ha mema akula’shi: A Yehowa, obe we mululame, we kwanka binobino, bodiko kala, mwanda botshibile biabia;

⁶ mwanda abanosheshe mase a bahatulwe-bekishila na batemuki, n’obe bwebatomeshe mase (mwanda) mbahwandjikile.

⁷ Nahushishe eyi dia umune a ku kitala kia milambu’shi: Anka biabia obe Yehowa Efile Mukulu Shabukomeboso, bitshibilo biobe mbia binyibinyi na kululama.

⁸ Biabia mwikeilu a kananka bahongolwele kihulu kie ba nguba; bubamuhelwe kutatshisha bantu na kālo.

⁹ Biabia bantu abatatshishwe na kālo ke moo; n’abo abakayile eshina di’Efile Mukulu e na matalwa hanundu ha bino bihuha; tambelangye ’mashimba kumutumbisha, ooo.

¹⁰ Na mwikeilu a katano bahongolwele kihulu kie ha luhun’a nsulu lwa nyama-e-bukyelo, na bufumu bwe bubafitshishwe fututu, tabesumu ku ndjimi yabo ha mwanda wa mitanyo.

¹¹ Abakayile namu Efile Mukulu a mwiilu ha mwanda wa mitanyo yabo na malonda’bo, tambelangye ’mashimbai ku bikitshino biabo, ayoyo.

¹² Henyihaha mwikeilu a kasamombo bahongolwele kihulu kie ha mwela ukata, winyi l’Eufalate, na mema’o abaumine, biabia eshinda dilumbulwe ha mwanda wa banfumu, abafiki kutunduka.

¹³ Namwene namu bikudi bi butete bisatu bifwane bīlwa abituku mu kanwa mwa kinyoka, na mwa nyama-e-bukyelo, na mwa mutemuki a madimi;

¹⁴ mwanda abio nyi mbikudi bia biso, abifubu bitundwilo, abiende kwi banfumu ba bahanohansenga boso, ha mwanda wa kwibabungila hamune kwifita di’efuku dikata di’Efile Mukulu Shabukomeboso.

¹⁵ (Talangai, nafiki bu ngifi. Sha mwabi ngiawa atengyela, mulame bifwalwa bie’shi: Tala akatambuka muswa, n’abamono būfu bwe).

¹⁶ Biabia abebafumankeshe hamune ha mbalo ayitemunwa mwidimi dia Bena Hebelu’shi: Amangedone.

¹⁷ A musambobidi bahongolwele kihulu kie ha luwa kubatukile mu ntempelo eyi dikata ku luhun’a nsulu’shi: Takuhwanga;

¹⁸ biabia kubadi mahenyi a mpeshi, na mayi, na mikungulu; kubadi namu kutenkatenka kukata kwa nsenga kushyamwekyele bu kuno, bukata na kwa katshintshi kasha bantu abashelele hano ha nsenga.

¹⁹ Na kibalo kikata kibelamunwine hasatu, na bibalo bia Badjentaila bibahone: na Babelone mukata batentekyeshwe ku ntpala kw’Efile Mukulu kumuha kihulu kia nfinyo kia bukyelo bwa nsungu ye.

²⁰ Na bila bioso bibasukile, na mangulu tangamonwe.

²¹ Na mabwe akata a kasangu a mpeshi, (ebwe dioso) bushito bwa’dio bu kilogramme makumi ananka na yibidi, anafiki mwiilu kuhona ha bantu; na bantu banaka kee Efile Mukulu ha mwanda wa kihuha kia mabwe a mpeshi, mwanda kihuha kiao nkikilekile bukata.