Kibafumulwe 11 - KILOMBENO KIHYA KIA NFUMWETU YESU KIDISITU

¹ Kubampelwe elengye bwilanga; na umune bakwile’shi: Ebwe, ohime ntempelo y’Efile Mukulu na kitala kia milambu n’aba abalangwila mwanka.

² Anka luhoho lwa hasha ha ntempelo welulekye, tweluhimanga; mwanda’lo lubahelwe kala kwi Badjentaila, na kibalo kihatulwe-kikishila banakekiashine mushi mwa ngwa mieshi makumi ananka na yibidi.

³ Nankaha (bukome kwi) tumonyi twande tubidi, n’abo banakatemukye myanda ha mafuku kinunu na nkama yibidi na makumi asamombo bafwalwe makutu.

⁴ Bano nyi nginyi mitshi ya mpafu na bitudilo bia bimunyi bibidi bimane ku mpala kw’Efile Mukulu a hanohansenga,

⁵ su muntu akakyebe kwibamwesha malwa, kālo kanakatukye mu kanwa mwabo, kashikye beshikwene n’abo, na su muntu akakyebe kwibamwesha malwa, mu kino kihaso wakekala n’ao ngwa kwihayibwa.

⁶ Bano be na matalwa a kushita mwiilu’shi, tamunoko mpeshi mu mafuku a kutemuka kwabo; be na matalwa namu a kwalula mema ta mase, na kukuhila nsenga na bihuha bia bihaso bioso ha misusa yoso yiabakyebe.

⁷ Habahwile bulungudi bwabo, nyama-e-bukyelo atuka ku luhongo lushī na nfudilo akalu ngoshi n’abo, akebakambila, ebehe,

⁸ na bitanda biabo bianakekale mu luhata lwa kinyi kibalo kikata, kiudikwe mu kiakikudi ta mbu Sodoma na Edjihitu, mwabehayile namu Nfumwabo.

⁹ Na kunkatshi kwa bantu, na ba ku bisaka, na ba ndjimi, na mīlo banakatale bitanda biabo mpaa na ku mafuku asatu na kihindji, tabakakumina bitanda biabo kushikibwa mu bilele, ooo.

¹⁰ N’abo ababombela hanohansenga abakasehela ha mwanda w’abo, abakāsha; abaketumishena bia buntu, mwanda bano batemuki babidi abadi abasosomesha ba hanohansenga.

¹¹ Hakukila enyi mafuku asatu na kihindji, luwa lwa muwa w’Efile Mukulu ubatwele munda mwabo, abemene ha ngwa yabo; na moo ukata ubakwete baba abebamwene.

¹² N’abo abahushishe eyi dikata adifiki mwiilu, adiakula kwabadi’shi: Fikai kuno, n’abo abayile mwiilu mwikumbi; n’abeshikwene n’abo abebabandjile.

¹³ Ha yaya nsa kubadi kutenkatenka kwa nsenga, na kihindji ki’ekumi kia kibalo kibahōne; na mu kutenkatenka kwa nsenga mubehayibwe bantu binunu musambobidi; n’abo babashele abakwetwe na moo, batumbisha Efile Mukulu a mwiilu.

¹⁴ Mpombo ya kabidi yibakidi, talangai, ya kasatu ngiyiayifiki lubilo.

¹⁵ Henyihaha mwikeilu a musambobidi bōmbele; kubadi mayi akata alondo mwiilu’shi: Bufumu bwa hanohansenga ta mbwa Nfumwetu na bwa Kidisitu e; e namu akabikala mpaa na kwikala-ika.

¹⁶ Binyibiabia bakulu makumi abidi na bananka abashalā ku mpala kw’Efile Mukulu ha mpun’a nsulu y’abo, abahōne mahala’bo hashi, tabalangwile Efile Mukulu’ shi:

¹⁷ Atukutumbula obe Yehowa Efile. Mukulu, winyi Shabukomeboso; we kwanka binobino, bodi kwanka kala, mwanda bōtshile (kodi ’be na mwinyi) bukome bobe, obikala.

¹⁸ Mīlo yibadi na nsungu, nsungu yobe namu yibafikile, na kihindjikia kutshibila (myanda ya) bafwe; na kihindji kia kuha bwedi kwi bahika bobe batemuki, na kwi bahatulwe-bekishila, na kwi’ba abatshinyi eshina diobe, bahela na bakata; na kulwisha’ba abalwisha nsenga.

¹⁹ Na ntempelo y’Efile Mukulu yi mwiilu yibashitwilwe; na mu ntempelo ye mubamwenwe musheto wa kilombeno kie; kubadi mahenyi a mpeshi, na mayi, na mikungulu, na kutenkatenka kwa nsenga, na mpeshi yikata ya mabwe.