I Yoano 5 - KILOMBENO KIHYA KIA NFUMWETU YESU KIDISITU

¹ Ese muntu akumina’shi, Yesu, nyi Kidisitu e mutandwe n’Efile Mukulu; n’ese muntu e na kifulo na yawa nambutwile, afule namu winyi mutandjibwe kwadi.

² Ha uno atwiukushi, atufulu bana b’Efile Mukulu kifulo hatudi n’Efile Mukulu kifulo, na kulama milangilo ye.

³ Mwanda kino nyi nkifulo ki ’Efile Mukulu’shi, tulame milangilo ye; na milangilo ye tayi bukoho, ooo.

⁴ Mwanda kintu kioso kitandwe n’Efile Mukulu akikambilā bia hanohansenga, na kino nyi kiobesho akiobeshā bia bahanohansenga, nyi ndukuluhilo.

⁵ A nanyi aobesha bia bahanohansenga, anka yawa akumina’shi, Yesu nyi Mwan’Efile Mukulu?

⁶ Yesu Kidisitu nyi na mwinyi bafikile ha mema na mase; kushī anka’o mema, ooo, anka na mema na mase. Nyi n’Kikudi-E-Selelee namu ākula bu kamonyi, mwanda Kikudi-E-Selelee nyi nga binyibinyi.

⁷ Mwanda kwi basatu abākula bu tumonyi mwiilu, kwi Yaiya, na winyi Mwanda, na Kikudi-E-Selelee, na (bano) benyi basatu be umune.

⁸ Kwi basatu namu abākula bu tumonyi hanohansenga, kwi Kikudi-E-Selelee, na mema, na mase, na (bano) benyi basatu mbalombashene bu umune.

⁹ Su atukumina bulungudi bwa bukamonyi bwa bantu, biabia bulungudi bw’Efile Mukulu mbukile bikata; mwanda bulungudi bwa bu kamonyi bw’Efile Mukulu mbuno, bubetulungwile ha mwanda wa Mwan’e.

¹⁰ Yawa akumina ha Mwan’Efile Mukulu e na mwiukishi munda mwe; yawa shyakumina Efile Mukulu bamwikasha bu sha madimi; mwanda tamukumine bulungudi bw’Efile Mukulu’shi, bubahene Efile ha mwanda wa Mwan’e.

¹¹ Na buno mbulungudi bw’Efile Mukulu’shi, betuhele muwa wa ikala-ika, na uno muwa wi mu Mwan’e.

¹² Yawa e na Mwana e na muwa; yawa shī na Mwan’Efile Mukulu te na muwa.

¹³ Yino myanda tampwile kwinufundjila’shi, mwiukye’shi, nwi na muwa wa ikala-ika, nyi nkwanudin’we abakumina h’eshina dia Mwan’Efile Mukulu.

¹⁴ Kuno nyi kukankamana kwatudi n’ako kwadie’shi, su atumutekye kintu kioso mulombene eshimba die, (biabia) etuhushishā,

¹⁵ na su atwiuka’shi, ētuhushishā, atwiuku’shi, twi na yinyi nteko yatubamwihwishe su nkinyi su nkinyi.

¹⁶ Su muntu amono mukwabo kwete kusola mwanda kushī kwa ku lufu, (biabia) atekye, (n’Efile Mukulu) akamuha muwa ha mwanda w’aba abasola myanda yishī ya ku lufu. Kwi kusola kwa ku lufu; tañakula’shi, bibuwa atekye ha uno mwanda, ooo.

¹⁷ Yishiyilulame yoso nyi nkulwisha; kwi kusola kwa myanda kushyakufisha lufu.

¹⁸ Atwiuku’shi, muntu ese mutandjibwe kw’Efile Mukulu tasolā myanda, anka yawa mutandiibwe n’Efile Mukulu elama e na mwinyi, na yawa mubi tamukumu, ooo.

¹⁹ Atwiuku’shi, twi ba kw’Efile Mukulu, na biahanohansenga bioso mbilale mwi’wa mubi.

²⁰ Atwiuku namu’shi. Mwan’Efile Mukulu bafikile, betuhele kishingulwilo’shi, twiukye yawa sha binyibinyi, n’atwe twi mwandie nyi a binyibinyi, munda mwa Mwan’e Yesu Kidisitu. E nyi Efile Mukulu a binyibinyi na muwa wa ikala-ika.

²¹ Bana bakinga batomibwe kifulo, nwilamei ku mankishi.