I Yoano 3 - KILOMBENO KIHYA KIA NFUMWETU YESU KIDISITU

¹ Talangai mwiyile kihaso kia kifulo kibetuhele Yaiya’shi, tutemunwe bu bana b’Efile Mukulu, biabia bahanohensenga tabetwiuku, mwanda tababadi bamwiukye.

² A batomibwe kifulo, binobino twi bana b’Efile Mukulu, takwamwekyele mwa tukekela, ooo; anka’twiuku’shi, hakamweka, atukekalan’ka biadi; mwanda atukamumono mwadi mwikele.

³ Ese (muntu) e na luno lukuluhilo mwadi etosha na mwinyi, bu mwadi mutokyel’e.

⁴ Ese muntu asolo mwanda ashula bishila: mwanda kulwisha nyi nkushula kwa bishila.

⁵ N’anwe anwiuku’shi, e basokwelwe kukatusha milwisho yetu; mwadie ta mwi kulwisha.

⁶ Ese muntu ekadidila mwadie talwisha, ooo; n’ese akulwisha tamumumone, sunga nkumwiuka.

⁷ A bana bakinga batomibwe kifulo, tanudimbibwanga ku muntu; yawa akitshi kululama e mululame, bu mwadi e na mwinyi ’mululame.

⁸ Yawa asolā mwanda nyia kafilefile; mwanda kafilefile alwishā mpaa na ku mbangilo. Nyi mpa uno mwanda habasokwelwe mwan’Efile mwabadia kulwishisha bikitshino bia kafilefile.

⁹ Ese muntu ’mutandjibwe n’Efile Mukulu talwishā, ooo, mwanda lubio lwe alwikadidila munda mwe, n’e teuku kulwisha, mwanda ’mutandwe n’Efile Mukulu.

¹⁰ Nyi amu sokolwa bana b’Efile Mukulu na bana ba kafilefile: ese muntu shyakita kululama ta nga kw’Efile Mukulu, sunga ngiawa shī na mukwabo kifulo.

¹¹ Mwanda uno nyi mwanda wanubahushishe mbangilo ’shi, watudi n’ao ngwa kwifulena kifulo.

¹² Tatwikalanga bu Kana badi ā’wa mubi, bayihayile mukwabo, ooo. A bamwihayile ha mwanda kinyi? Mwanda bikitshino bie na mwinyi bibadi bibubi, a kunyi bia mukwabo nyi bibadi bilulame.

¹³ A bakwetu, tanukanyanga su bahanohansenga abenushikwa.

¹⁴ Atwiuku’shi, tatubakile mu iufu, tatudi mu muwa, mwanda twi na bakwetu kifulo. Yawa shī na bakwabo kifulo ki mu lufu.

¹⁵ Ese muntu akushikwa bakwabo nyi ntomboshi; n’anwe anwiuku’shi, takwi ntomboshi e na muwa awikadidila munda mwe, sunga ngumune.

¹⁶ Ha uno mwanda nyi hatushingula kifulo, mwand’e betutudile muwa we; watudi n’ao namu ngwa kutula miuwa yetu ha mwanda wa bakwetu.

¹⁷ Anka muntu ese e na biakwikala na muwa bia bahanohansenga, amono namu mukwabo e na lukalo lwa’bio, na kumushitshi’eshimba die dia lusa, a kifulo ki’Efile Mukulu nkikadidile munda mwe na minyi?

¹⁸ Bana bakinga bande batomibwe kifulo, tatwikalanga na kifulo kia kwīyi, sunga nkia kwidimi, ooo, anka mu bikitshino na biabinyibinyi.

¹⁹ Ha uno mwanda atwiuku’shi, twi ba ku biabinyibinyi, na kukanyisha mashimb’etu ku mpala kwe;

²⁰ mwanda su eshimba dietu tadituhīsha, Efile Mukulu ’mukile eshimba dietu bukata, e mwiukye namu myanda yoso.

²¹ A batomibwe kifulo, su eshimba dietu tadituhīsha, biabia twi na kukankamana ku mpala kw’Efile Mukulu;

²² na bioso biatutekye atwibitembula kwadi, mwanda atulama milangilo ye, na kukita bintu abisehesha eshimba die.

²³ Uno nyi mulangilo we’shi, bibuwai tukumine mwishina dia Mwan’e Yesu Kidisitu, na kutomeshena kifulo, mubetuhelele mulangilo.

²⁴ Yawa alama milangilo ye mwikale mwadie, n’e (namu) mwadie. Ha uno mwanda atwiuku’shi, e mwikale munda mwetu ha Kikudi-E-Selelee abetuhele.