I Temote 5 - KILOMBENO KIHYA KIA NFUMWETU YESU KIDISITU

¹ Tosashilanga mukulu (a bikoñeno bi’Efile), ooo, anka omusendele bu nshyobe; na bansongwalume namu (anka) bu bakwenu.

² Bakashi bakulu namu (anka) bu banyin’obe, bansongwakashi namu (anka) bu bankashān’obe na buselelee bw’eshimba.

³ Nemeka bakashi-ba-bafwe bafudile binyibinyi.

⁴ Anka su mukashi-a mufwe e na bana sunga mbekulu, (bibuwa) abo babadile kwambula mwa kuleshesha kasendeleshi kwa-bo, na kuloka banambutwile (babo); mwanda uno mwibuwa, ngukuminwe namu ku mpala kw’Efile Mukulu.

⁵ Anka yawa mukashi-a-mufwe mufudile binyibinyi, mulekībwe ’nyi bisumanga, mukuluhile mw’Efile Mukulu, na kunyiñamena mu miyayo na nteko bufuku na kanya.

⁶ Anka yawa mutwelelele mu bisehelwa bia hanohansenga bahu kufwa e kiatala.

⁷ Yino myanda webakayikile’shi, bekale bashī bakutohekwa.

⁸ Su nanyi su nanyi shyafumbulā bia (kuha) b’e, na bikilekile kwi ba mu nshibo ye, yawa batunyinyina lukuminu, bakilekile shimukumine bubi.

⁹ Mukashi-amufwe tabadikwanga ha mukanda shyakumbeshe bihwa makumi asamombo, e, (namu,) badi anka mukashi a mulume umunenka,

¹⁰ mutumbishibwe ku bikitshino bilumbulukye; muhwe kukusha bana, na kulela benyi, na kutumpa ngwa ya balumunwe-bakishila, na kukwashia basha bishiotshi na kusasakata mu mifubo yoso yilumbulukye.

¹¹ Anka bakashi-babafwe bakulu be binyibiabia webatune, mwanda’bo habakabanga kwenda na kukimba bishī biyile mu Kidisitu, abakanyiñamena kwibakilwa;

¹² be na kuhīshībwa ha mwanda wa kusumbula lukumino lwabo lubedi.

¹³ Nyi habāmbilwe namu ehampa, na kukindakana bisumanga ku nshibo ku nshibo; tandjia’nka ehampa, ooo, anka mba mbalakanyi namu na kukalakala, na kwisamba’nka myanda yishī yihwandjikile.

¹⁴ Nyi kiankyebel’ami’shi: Bakashiba-bafwe bakulu be binyibiabia bebakilwe, batande bana, balwēshe ku mashibo abo, tabahananga bia kusābulusha kwi mushikwanyi, ooo.

¹⁵ Mwanda bamo tabahwile kwikumbila kwi Satana.

¹⁶ Su kwi muntu mukumine su mwana-mulume su mwana mukashi e na bakashi-ba-bafwe, ekale na kwibakwashianga e na mwinyi, na kikoñeno ki’Efile takinemenwanga na bushito, ooo, biakidia kukwashia baba bakashi-ba-bafwe bafudile binyibinyi.

¹⁷ Bakulu (ba bikoñeno bi’Efile) abalelana bibuwa batemunwe bu bahwandjikile kukishakisha kinemo, tokiokwamba kwi’bo abatuhwita mu Mwanda (w’Efile) na lulambukisho.

¹⁸ Mwanda kibafundjilwe’shi: Toanyanga ku kanwa kwa ñombe asoholā ngano, mwanda mutuhwitshi mu mifubo ’muhwandjikile bwedi bwe.

¹⁹ Tokuminanga kwimukisha Mukulu-(a-bikoñeno bi’Efile) anka su ku mpala kwa tumonyi tubidi su ntusatu.

²⁰ Abo abalwisha webasashile ku mpala kwa boso, biabia (namu) bangi abakatshinyi.

²¹ Nakukayikila ku mpala kw’Efile Mukulu na Kidisitu Yesu, na kwa bamwikeilu, benyi abasangwilwe’shi, olame yino myanda kushī kwamba’shi: Au hau, au hau, kita bioso bishī bikilene.

²² Tobatukilanga kutenteka maasa ha muntu, ooo, sunga nkutwela mu milwisho ya bangi bantu; welame selelee.

²³ Tokitomanga’nkā’o mema, otome na tufinyo tuhela ha mwanda wa munda mobe, na mikumbo yobe ya misusa na misusa.

²⁴ Milwisho ya bamo bantu ayimweka hatoka, ayitanyinwa ku kimu, anka ya bangi ayituku kumongo.

²⁵ Anka hamune namu bikitshino bibuwa abifumbulwa kwibedi; na yaya yishī biabia tayiuku kufibwa.