I Petelo 4 - KILOMBENO KIHYA KIA NFUMWETU YESU KIDISITU

¹ Binyibiabia bu bibetufwambukidile Kidisitu mu mbidi, hamunenka anwe bana bene namu, nufwale nangunangu yintunenka; mwanda e bafwambukile mu mbidi te na mwannda na milwisho dimonyi’shi,

² tanukekalanga mu kihindji kibashala kia muwa wenu mu bia ngabiabi bia bantu, anka ku abikyebe eshimba di’Efile Mukulu.

³ Mwanda akia kihindji kia kala kibakumbana kia kukitshisha bibakyebanga eshimba dia Badientaila, hatubatambukile mu bia mudioholo w’eshimba dibi, bia ngabiabi, na kukishekisha kwa kutoma nfinyo, na kubwelakana, na kwa bidibwa bia kukolwa, na kulangwila kwa ntankishi ashidikwe kishila.

⁴ Mu yinyi’yo abakanyā mwanda tanulombashena n’abo mwiyile kwinyi kukishakisha kwa kubwelakana, abakwete kwinusongyela;

⁵ abo abakalubwila yawa mwimene mwa kutshibila kimu kia’batala na kia bafwe.

⁶ Nyi mpa uno mwanda mukāndu-wibuwa ubalungwilwe na kwi bafwe, mwabadia kutshibilwa kimu mulombene bantu ba ku mbidi, anka bekale na muwa mulombene Efile Mukulu mu Kikudi.

⁷ Anka nfudilo ya bintu bioso tayidi hehi; binyibiabia nwikale n’eshimba dia bu mpila, nwikale na lubasu lwa kuteka nteko.

⁸ Anka kukila myanda yoso nwikale na kifulo kia kunyiñamana munkatshi mwa’nwe bana bene; mwanda kifulo akibwikila mituto na mituto ya milwisho.

⁹ Nwikale na kilelo kia kwilelena kushi miununo.

¹⁰ Anka bu bianubatambwile kwi ese muntu biabuntu, nwiheleshene’ bio bu bamendaku bebuwa ba bu-muntu bwa bihaso na bihaso bw’Efile Mukulu.

¹¹ Su kwiumune ākula, ākule bu mwisambilo w’Efile Mukulu; su kwi mungi’nyi alungulā y’Efile, eyikitshine mu bukome bu abuhanā Efile Mukulu’shi, Efile Mukulu atumbishibwe mu bintu bioso mu Yesu Kidisitu, kwadie kwikale ntumbo na bukome mpaa na kwikala-ika. Amena.

¹² Anwe batomibwe kifulo, tanukanyanga ha mwanda wa kutompibwa kwa kālo kwi munkatshi mwenu’shi: nkinyi kintu kibetufikila, ooo;

¹³ anka sehelai bianwibabungilwe mu kufwambuka kwa Kidisitu’shi, hanakafumbulwe ntumbo ye, nwanakasehele na muloo ukilekile namu.

¹⁴ Su anusabulwa ha mwanda w’eshina die Kidisitu, mwabi ngwenu; mwanda Kikudi kia ntumbo na ki’Efile Mukulu nkishale hanudi; ku luhese lwabo abamwakwila bibubi, anka ku luhese lwenu atumbishibwe ntumbo.

¹⁵ Anka takwikalanga sunga ngumune kwikala bu ntahanyi, sunga bu ngifi, sunga mbu mukitshi a yibubi, sunga nga kwilamika mu myanda ya bangi, ooo;

¹⁶ anka su mwina Kidisitu (akamono malwa) tekalanga na būfu, ooo, atumbishe Efile Mukulu ha uno mwanda.

¹⁷ Mwanda kihindji (kibafiki) kia kutshiba kimu’shi: Kibangile ku nshibo y’Efile Mukulu; na su akibangila kwatudi’ twe, kunfudilo kwa baba bashī bakokyele mukānduwibuwa w’Efile Mukulu kwi na minyi?

¹⁸ Su sha kululama akahanda hehi, a shī na bwin’Efile Mukulu na mulwishi mbi kunyi?

¹⁹ Binyibiabia, abo abamonā malwa amukyebela eshimba di’Efile Mukulu, batule miuwa yabo mu kukita bibuwa kwi Muhangi a kishima.