I Petelo 2 - KILOMBENO KIHYA KIA NFUMWETU YESU KIDISITU

¹ Binyibiabia hakukasha kifita kioso, na bulamalama boso, na bunsesa boso, na biutu, na mīsambo yibubi yoso,

² bu bana bakī batoka, nwikale na kulakila mabele a biabinyibinyia Mwanda (w’Efile) ’shi, nukule n’ao mpaa na ku kihandjilo.

³ Su nubatompo’shi, Yehowa e nsha bu-muntu.

⁴ Nufikye kwadi, nyī’bwe dia muwa, dibasabulwilwe binyibinyi kwi bantu, anka kw’Efile Mukulu dibasangwilwe bu dia kinemo,

⁵ Anwe namu, bu mabwe a muwa nwibebakwe tanudi nshibo ya bia kikudi, nwi mu butshiite-bwakwidi, bwa kulambula bitahilo bia biakikudi, abikuminyibwa kw’Efile Mukulu ha Yesu Kidisitu.

⁶ Mwanda ubafundjilwe mu Bifundwe b’Efile’shi: Talai nādisha mu Siona ebwe dikata dia kibangilo di’ehaka, disangulwe, dineme; yawa akumina ha dinyi’dio, takakwatshibwa na būfu, ooo.

⁷ Biabia kwanudi’nwe bakukumina e ’muneme; anka kwi’bo bashībakumine, dinyi ebwe dibafūtulwilwe na bebaki, adio dinyi dibakitshinwe tamutwe w’ehaka;

⁸ n’ebwe dia kukokolwa, na lubwebwe lwa kukōlwa, (nyi nkwabadi’bo) abakokola ku Mwanda, mwanda be na bukolwa.

⁹ Ank’anwe nwi kihungilo kisangudibwe, mbutshiite-bwakwidi bwa bufumu, mwīlo uhatulwe-wi-kishila, bantu ba kwikala b’ē b’ē’shi, mwanudia kuleshesha bia ntumbo bia yawa benwitanyine ku mufito, mpaa na mwitata die dia kukanya;

¹⁰ anwe ha kala tanubadi bu bantu, ooo, anka binobino nwi bantu b’Efile Mukulu; tanwibafwilwe lusa, anka binobino nubafwilwa lusa.

¹¹ Anwe batomibwe kifulo nenusendela bianudi bu benyi na bu balukilo, nushila ku bia ngabiabi bia ku mbidi, abilwiyā ngoshi na kikudi;

¹² nyikashi yenu yikale yilombashene munkatshi mwa Badjentaila’shi, sunga abenwakulā bu bakitshi ba bibubi, (biabla) ha mwanda wa bikitshino bienu bibuwa biabamono, abakatumbish’Efile Mukulu mwifuku dia (kutengyela kwa) kuhosodibwa.

¹³ Nukokyelei ku milangilo yoso ya bantu ha mwanda wa Nfumwetu; sunga nkwi nfumu ’mukile bukata;

¹⁴ sunga nkwi batontshi bakata be hanundu ha boso, abatuminwe n’e kulanga abakitshi bibubi na kutumbisha abakitshi bibuwa.

¹⁵ Nyi mbiabia amukyebela eshimba di’Efile Mukulu’shi, hukukita kwa bibuwa kwenu anwiuku kuuminyisha kuhatamina kwa balotakane:

¹⁶ hamune be bu bana tabakitanga bwana bwabo bu kintudia kufya’mo bubi ooo; anka bu bahika b’Efile Mukulu.

¹⁷ Nemekai bantu boso; nwitomeshenei kifulo kia bubana; tshinai Efile Mukulu; nemekai nfumu.

¹⁸ Bafubi ba mu mashibo nukokyelei banfumwenu na kwibatshina mu bioso, kushī anka kwi bebuwa na benyi balombane, ooo, anka na kwi bahuhakane benyi,

¹⁹ Mwanda au ngwa kutosh’eshimba (di’Efile Mukulu), su akwikala muntu anyiñamana mbishiotshi, na kufwambuka kushī kumulombene, ha mwanda eshimba die di kw’Efile Mukulu.

²⁰ Mwanda kutumbula nkwa kinyi s’ōkasola mwanda, na kukuhilwa, n’anukankamena mwanka? anka su mpa kukita bibuwa na kufwambuka n’anukankamana na lwishinko mwanka, n’ao winyi wa kumtosh’eshiba di’Efile Mukulu.

²¹ Mwanda nyi ko kwinyi kwanubaitanyinwe; mwanda Kidisitu na mwinyi benufwambukile enuleka bu kileshesho bianudia kulonda mu ngwa ye.

²² E tamusole mwanda, sunga nguniune, (oso,) sunga mbulamalama busananwe mu kanwa mwe.

²³ E habakāyilwe tamukan’ē; habafwambukile tamwibālulē; anka betule e na mwinyi kwi yawa atshiba kimu mwakidi kilulamine;

²⁴ e na mwinyi batwadile milwisho yetu mu mbidi ye ha mutshi’shi, mwanda’twe twi bafwe ku milwisho, twikale abatala mpaa na ku kululama; ku mikofu ye nyi kwa tubahandjīle.

²⁵ Mwanda nubadi bu mikoko ayiende ayiendakananga, anka binobino nwibālukile kwi Mumunyi, mulamwinyi a bikudi bienu.