I Petelo 1 - KILOMBENO KIHYA KIA NFUMWETU YESU KIDISITU

¹ Petelo, mutumibwa a Yesu Kidisitu, kwi bēnyi abahalakene mosomoso mu Pontu, na Galatie, na Cappadocie, n’Asia, na mu (Bithynie),

² basangudibwe mwiyile kiukilo kibedi ki Efile Mukulu Yaiya, ha kulamunwa-kwi-selelee kwa Kikudi, mpaa na ku kikokyelo na ku kimamino kia mase a Yesu Kidisitu; bu-muntu na kufukama binufwimīsliwe.

³ Efile Mukulu Yaiya a Nfumwetu Yesu Kidisitu ahebwe mwabi, e mwiyile lusa lwe lukishekishe betutandjile diakabidi ku lukuluhilo lwa muwa, ha lusangukilo lwa Yesu Kidisitu ku lufu,

⁴ ku buhyanyi bushyabunyangā, sunga nkuslifilwa (kwa kishila), sunga nkushimina, mbwinubombeleshwe mwiilu,

⁵ kwi baba abalamibwā mu bukome bw’Efile Mukulu ha lukulu hilo ku kihandjilo, kilumbulwe kwikala kifumbulwe mu kihindji kia kunfudilo.

⁶ Nyi mwanusehela bikata, (sunga) binobino kihindji kikoto hangi nwi na mashimba e bushito mwanda wa bia kutompibwa bi bihaso na bihaso,

⁷ eshi, kutompibwa kwa lukuluhilo lwenu nkukile bikilekile kilonda kia nsahabu akilwilā kinemo, sunga nkutompibwa na kālo, alukahetshibwa ku ntumbo na kinemo ha kufumbulwa kwa Yesu Kidisitu,

⁸ winyi e anwibatome kifulo, sunga tanwibamumone, mwadi e nyi mwanukuminā, sunga tanumumono, anusehela na muloo ushyawakudibwa, wikute na ntumbo;

⁹ hakutambula nfudilo ya lukuluhilo lwenu tankihandjilo kia bikudi bienu;

¹⁰ Ha mwanda wa kinyi kihandjilo batemuki abaihushanga na kukokōla, abatemukanga ha mwanda wa bu-muntu bwa kufika kwanudi;

¹¹ abakimbanga kihindji kinyi, su kihaso kia kihindji kibafunkile Kikudi-kia-Kidisitu (kibadi) munda mwabo, hakibatemukile kwibedi kufwambuka kwa Kidisitu, na ntumbo yibakyebanga kulonda kunyima.

¹² Kwabadi’bo ubadi wibafumbwilwe’shi: tankwi’bo ba na bene, ooo, anka kwatudi’twe abafubile aya myanda ayinulungulwa kwi’bo abenulungwile mukāndu-wibuwa na Kikudi-E-Selelee batuminwe mwiilu: mu yinyi yino myanda bamwikeilu abakyebe mwilamina bashingule yanka.

¹³ Binyibiabia mwanye nshiho mu bifuka bia nangunangu yenu, nuhile, nutengyele biya mpaa na ku nfudilo mwanda wa bumuntu abukenufishishwa ha kufumbulwa kwa Yesu Kidisitu;

¹⁴ bu bana bakokyele bashyabehwandjikisha bu mwanubadi bekyele mu bia ngabiabi yenu ya kwibedi mu kuhatamina kwenu.

¹⁵ Anka mwikyele e benwitanyine ’muhatulwe-a-kishila, biabia anwe namu nwikale bahatulwe-ba-kishila mu nyikashi yenu yoso;

¹⁶ Mwanda ubafundjilwe’shi: Nwikalei bahatulwe-ba-kishila; mwanda ami nyi muhatulwe-a-kishila.

¹⁷ Na su anumwitanyina dia bu Yaiya, e atshibā kimu mulombene bikitshino bia muntu ese, bisumanga’shi, au nyi’ū, au nyi’ū, ooo, (biabia) nwikale na moo hanukisha kihindji hanukī hano ha nsenga;

¹⁸ mwanda anwiukushi, tanwibakūlwe na bintu abilwilā hamune bu nfedha na nsahabu ntulombene nyikashiya bisumanga (yianubatambwile) ku mwisambilo ubetentulushenanga bashyenu-kutu, ooo,

¹⁹ anka na mase aneme a Kidisitu, hamune bu a mwan’a mukoko shī na kilema, e anka hulwī;

²⁰ (e) mbinyibinyi badi mūkibwe kwibedi kwa ku mbangilo kwa hanohansenga, anka badi mwinwisokwele mu bihindji bia kunfudilo.

²¹ Nyi kwadi e nyi kwanukuminyinā Efile Mukulu, winyi bamusangwīle ku lufu, amuha ntumbo’shi, lukuluhilo na lutengyelo lwenu lwikale mw’Efile Mukulu.

²² Anka hanubatosha mashimb’enu mu kukokyela kwa biabinyibinyi, ku Kikudi E-Selelee mpaa na ku kifulo kishī na bulamalama kia kwi bakwenu, mwitomeshenei kifulo anwe bana bene n’eshimba di selelee dia kibobo.

²³ Nwibatandwe diakabidi, kushī ku lubio alufu, ooo, anka kwi lwinyi’lo lushyalufwiyā, ku Mwanda w’Efile Mukulu, uatala na kushadidila mpaa na ikala-ika.

²⁴ Mwanda biambidi bioso bi bu lubishi, na ntumbo y’abio yi bu tulongo twa lubishi. Lubishi alūmā, na tulongo twa’lo twakukuka;

²⁵ anka Mwanda wa Yehowa nguididile mpaa na ikala-ika. Winyi uo nyi Mwanda wa ku mukāndu wibuwa wanubalungwilwe.