I Bena Kodinda 4 - KILOMBENO KIHYA KIA NFUMWETU YESU KIDISITU

¹ Muntu etutundule bu bafubi basangulwe ba Kidisitu, na balami ba myanda yifībwe y’Efile Mukulu.

² Binyibiabia’nyi, mu balame akikyebibwā’shi, bahetshibwe na kishima.

³ Anka kwandji’mi nyi mwanda uhela bu bisumanga’shi, natshibilwe (kimu) kwanudi; sunga nkutshibilwa (kimu) kwa bangi, binyibinyi, tanyitshibila’mi na mwinyi, ooo.

⁴ (Mwanda tañuku bia kwihīsha, anka tanyibingisha ha uno, ooo) anka ampīshā nyi Nfumwetu.

⁵ Binyibiabia tanutshibanga (kimu) sunga nkihela kwibedi kwa kihindji kia Nfumwetu takiafikile, e akafisha kwitata myanda yifwame ya mufito wi fututu, na kufumbula’nyi yifībwe ya mashimba; henyihaha muntu he muntu he akekala na ntumbo ye kw’Efile Mukulu.

⁶ Anwe bakwetu ba mu Kiditisu, yino myanda nahwandjikisha’yo mu lukindji kwandji’mi, na kwi Apolosa ha mwanda wenu’shi: nwikale anwambula kwatudi, tanukambanga kutentekyesha’nka yibafundjibwe, mwanda wa kwamba’shi, tala muntu, sunga ngumune akekala na kwitatwila mungi muntu.

⁷ A nanyi bakulamun’obe todi hobe namu? A kiodi n’akio kioshī muhebwe nkinyi? A biabia, su bohelwe’kio, a kioetumbisha bu kishī kikuhebwe nkinyi?

⁸ Anka binobino tanuhwile kwikuta, tanuhwile kwikala bampeta, nubahu kumunana (bu banfumu) bwatushī’twe; aee! nadia kusehela su nubadia kumunana, biatudia kumunana n’enu namu.

⁹ Mwanda nanangushena’shi, Efile Mukulu betutulu’twe batumibwa kunfudilo, hamune na basangwilwe ku lufu; mwanda twibakitshibwe bu kileshesho kwi bahanohansenga, na kwi bamwikeilu, na kwi bantu.

¹⁰ Twi balotakane ha mwanda wa Kidisitu, ank’anwe nwi basha binangu mu Kidisitu; atwe twi batūba, ank’anwe nwi bukome; anwe nwi baneme, ank’atwe atubendjibwa.

¹¹ Mpaa na ku uno nguba twi na nsala na nyota, twi muswa, twibakuhilwe, tatwi na mbalo ya kubombela;

¹² Atutuhwita mu kufuba na maas’etu a na mwinyi, hakukaibwa atwibafwimisha mwabi, hakubingibwa atukankamanā mwanka.

¹³ Hakwedibwa miloa twibasambe; atukitshibwā bu bibutete bia bahanohansenga, twi bu bitshi bia bintu bioso, mpaa na lelo uno.

¹⁴ Nkimwinufundjile yino myanda kwinukwatshisha būfu, ooo, anka nkwinulanga bu bana bande ba kifulo.

¹⁵ Mwanda sunga nwi na balami binunu ekumi mu Kidisitu, tanwi na bashenu bebungi; mwanda mu Kidisitu Yesu nyi mu nenutandjile ku mukāndu-wi-buwa w’Efile.

¹⁶ Binyibiabia nenusendela’shi, nwikale banyifwane.

¹⁷ Ha uno mwanda nyi unatumine Temote, e winyi nyi mwan’ande a kifulo, n’a kishima mu Nfumwetu, e akenutentekyesha ngikelo yande yi mu Kidisitu mwandambukishā kosokoso mu bikoñeno bi’Efile bioso.

¹⁸ Anka bamo abetatula’shi: Takafiki’nyi kwatudi.

¹⁹ Anka, nankafiki kwanudi ahakidi kahindji kahela, su Nfumwetu akumina, biabia nankashingula kushī mīsambo, anka mbukome bw’abetatula.

²⁰ Mwanda bufumu bw’Efile Mukulu tabwi mu mīsambo, ooo, anka mu bukome.

²¹ A kianukyebe nkinyi? nfikye kwanudi na kanongye, su mu kifulo, n’eshimba dia kuhohela?