Ii Temote 2 - KILOMBENO KIHYA KIA NFUMWETU YESU KIDISITU

¹ Binyibiabia obe mwan’ande, wekale munyingye mu bumuntu bwi mu Kidisitu Yesu.

² N’ayo myanda yibohushishe kwandji’mi munkatshi mwa tumonyi twibungi, ank’ayo weyihitshikile bantu bashimate abeuku kulambukisha bangi.

³ Biabia obe oididile na kunyinga bu musalai ebuwa a Kidisitu Yesu.

⁴ Takwi musalai, sunga ngumune, akwianyina na myanda ya hano hashi, mwadia kutoshesh’eshimba di’awa bamusangwile kwikala bu musalai.

⁵ Na su muntu namu anyisha (kōbesha ku māsha), tahebwa kilongo kia mōbeshi, anka su anyisha mulombene kishila.

⁶ Mudinti atuhwita mufubo (w’efuba) wadi n’ao ngwa kutambula bi mwifuba kwibedi.

⁷ Nahgushena kinesamba, na Nfumwetu akuhe lushingulo mu myanda yoso.

⁸ Nangushena Yesu Kidisitu, e ku kekulu ka Dafidi, musangulwe ku lufu mwiyile mukāndu-wibuwa wande,

⁹ nyi mwa mwena malwa, mpa na ku nkano bu mukitshi a bubi; anka Mwanda w’Efile Mukulu tawanyibwa, ooo.

¹⁰ Biabia nyi handji mukankamene mu bintu bioso, ha mwanda wa basangudibwe b’Efile’shi, bamone kihandjilo ki mu Kidisitu Yesu na ntumbo ya ikala-ka.

¹¹ Uno mwanda ngwa binyibinyi’shi: Su tubafwile hamune n’e, twanakekale na muwa hamune n’e.

¹² Su atukankamēna (mwanka) na lwishinko, biabia twanakabikale namu hamune n’e, (anka) su atumutunu, e namu anaketutune.

¹³ Su twi bashī bashimate e ’mushimate kwikala-ka: e teuku kwitun’e na mwinyi, ooo.

¹⁴ Webatentekyeshe yino myanda, na kwibalungula biya ku mpala kwa Nfumwetu’shi, tabelanga mpaka ku myanda yishyaikwashya, ayilamunusha abeyihusha.

¹⁵ Sakaketa kwilesh’obe na mwinyi’shi: Nyi mukuminwe kw’Efile Mukulu, mufubi shi na mwa kumukwatshisha būfu, olulamishe biya Mwanda wa biabinyibinyi,

¹⁶ anka wehengye ku bia kwakulakule bwa bisumanga, bwa kushula kwa bishila; mwand’abiendā abifwimishanga ku bushī bwin’Efile;

¹⁷ na bishima biabo abikafukuka bwilonda dinyangye, kwi Hymeneusa na Filetusa;

¹⁸ abo abatuhilwa ku mwanda wa biabinyibinyi’shi, lusangukilo talubahwile kukila, biabia, abafutakasha lukumino lwa bamo.

¹⁹ Sunga mbiabia kibangilo kinyingye ki’Efile Mukulu nkimane hoo, kikayikilo ki’akio nkino’shi: Nfumwetu euku’ba ba kw’e, n’ese atemuna eshina dia Nfumwetu akatukye ku bibubi.

²⁰ Anka mwibalasa mwi bintu bishī anka bia bilonda bia nsahabu na bia nfedha, anka namu na bia mutshi, na bi’ema, bingi mbineme, bingi tambineme.

²¹ Twambengye su nanyi su nanyi akētosha selelee ku bino, akekala bu kintu kineme, mulamunwe-selelee na mulombene kukitshibwa kwi Nfumu, mulumbulwe ku mifubo yoso yilumbulukye.

²² Suka namu ngabiabi ya bunsongwalume; ank’olonde kululama, lukuluhilo, kifulo, na kufukama hamune n’aba abetanyina ha Nfumwetu n’eshimba di-selelee.

²³ Anka ohele nyihusho yilotakane na yihatamine, weukye’shi, nyi ayifisha mpaka;

²⁴ nampika a Nfumwetu wadi n’autangwa kwela mpaka, ooo; anka ekale na kasendeleshi kwi boso, mwiukye mwa kulambukisha, sha lwishinko (kwi babi)

²⁵ akalashena na kuhohela kwi ba abatuhishena; hangi su Efile Mukulu akebaha lwilango lw’eshimba lwa kwiukidila kwa biabinyibinyi;

²⁶ biabia’shi, bahosokye abo bana bene ku muteo wa kafilefile, abadi bakwatshibwe musungi kwadi e ku kia kikyeb’eshimba die.