Ii Temote 1 - KILOMBENO KIHYA KIA NFUMWETU YESU KIDISITU

¹ Paulu mutumibwa a Kidisitu Yesu amukyebel’eshimba di ’Elile Mukulu mulombene mulayilo wa muwa wi mu Kidisitu Yesu;

² kwi Temote mwan’ande mutomibwe kifulo. Bumuntu (bufikye) na lusa, na kufukama kw’Efile Mukulu Yaiya, na (kwi) Kidisitu Yesu Nfumwetu.

³ Natumbula Efile Mukulu anfubila bu banshyami-kulu n’eshimba dia munda seleleē, mwankutentekyesha mu nteko yande, kushi kuleka bufuku na kanya;

⁴ Nadidi bikata’mi shi, nkumone na meso; natentekyesha mpolo yobe mwandjia kwikele na muloo;

⁵ ha kunangushena lukumino lushī na bulamalama lwi munda mobe; lubabadidile kwibedi munda mwa nyin’obe-kulu Loisa, na mwa nyin’obe Eunise, nyi musumine’shi, lwi munda mobe namu.

⁶ Binyibiabia nyi hankutentekyesha’shi, oshisakane bwinyi buntu bw’Efile Mukulu bwi munda mobe hakutentekwa kwa maas’ande.

⁷ Mwanda Efile Mukulu tamwituhē’shimba dia kususa, anka dia bukome, na dia kifulo, na binangu bimusangelo.

⁸ Biabia twekalanga na būfu bwa bulungudi bwa Nfumwetu, sunga mbw’ami mukwatwe e; ank’obe wekale mutambudi a kihindji a bishiotshi bia mukānduwibuwa mulombene bukome bw’Efile Mukulu.

⁹ Betuhashishe, na kwitwitanyina na lwitamino luhatulwe-lwikishila; tampa mwanda wa bikitshino bietu, ooo, anka ha kut’una kw’e na mwinyi na bu-muntu, bubetuhelwe mu Kidisitu Yesu kwibedi hanohansenga tahahangilwe.

¹⁰ Anka binobino bubamweka ha kufumbulwa kwa muhashi etu Kidisitu Yesu, bahwile kushimangisha lufu, afisha muwa hatoka, na ushyaunyanga ha mukāndu wibuwa.

¹¹ Nyi hanasangwilwe bu mulungudi e Efile, na mutumibwa, na mulambukishi amīlo.

¹² Ha unomwandanyi hanfwambukila yino myanda; sunga mbiabia tankwatshishwa būfu; mwanda’mi neuku andji mukumine, na kusumina’shi, euku kulama’akia kinamubikile ku diadi’efuku.

¹³ Kamina kihwandjikisho kia bishima bilombane bibohushishe kwandji, mu lukuluhilo na kifulo ki mu Kidisitu Yesu.

¹⁴ Kiakia kintu kibuwa kibohitshikilwe, wekilame ku Kikudi-E-Selelee abombela munda mwetu.

¹⁵ Uno wewiuku’shi, boso be mu (Asie) mbamfutale, kwi Fygeluse na Helemongenese.

¹⁶ Nfumwetu afwile lusa kwi ba nshibo ya Onesefoluse; mwanda banyishishe misusa na misusa, tabadi’nyi na būfu bwa lukano lwande;

¹⁷ anka habadi mu Loma basasakete kunkimba, a’mona.

¹⁸ Nfumwetu amuhe mwadia kumwena lusa kwi Nfumwetu mu di’efuku; na mu banfubile mu bintu bibungi ku Efesesa, obe webiuku biya.