Ii Petelo 3 - KILOMBENO KIHYA KIA NFUMWETU YESU KIDISITU

¹ A batomibwe kifulo, uno nyi mukanda wa kabidi unenufundjila binobino mu yoso yibidi nanyisha binangu bienu bi selelee ha kwinutentekyesha’shi:

² nunangushene bishima bibakwile batemuki bahatulwe ba-kishila kwibedi, na wa mulangilo wa Nfumwetu Muhashi ku batumibwe benu.

³ Nwiukye uno kwibedi’shi, mu mafuku a kunfudilo akukafiki basehi bakwete kulonda ngiabiabi yabo yi na mwinyi’shi:

⁴ A winyi mulayilo wa kufika kwe wi kwi kunyi? Mwanda kasha banshyetukulu abahōne mu tulo (twa lufu,) bintu bioso bi ank’endenda mwabikela ku mbangilo kwa kihangilo.

⁵ Mwanda mbahatamīne kukyeba uno’shi: mailu abadi kwanka kala, na nsenga (namu) yibabumbilwe ’mema na yiki mu mema kwiyi di’Efile Mukulu.

⁶ Nyi kubalwishishwe n’aya nsenga yibadi kwanka kala ha kwinwa ’mema:

⁷ anka mailu e kwanka binobino, na nsenga namu mbibikilwe kālo ku dinyi eyi, mbibombeleshwe mpaa n’aha fiki efuku dia kimu na kilwīlo kia bantu bashī b’Efile Mukulu.

⁸ Anka tanuhataminanga uno mwanda umune, anwe batomibwe kifulo’shi: efuku dimune’nka kw’Efile Mukulu nyi mbu kinunu kia bihwa, na kinunu kia bihwa ki bwifuku dimune.

⁹ Nfumwetu te na kwiisha ha mwanda wa mulayilo we, hamune bamo (bantu) abahwandjikisha kuisha, ooo; anka e na kuhuñanyi kwanudi, takyebe sunga ngumune kushimina, anka’shi, boso bafikye ku kwilanga kw’eshimba.

¹⁰ Anka efuku dia Yehowa adikafiki bu ngifi, mū’dio mailu anakashimine na mikungulo yikata, na biamwiilu abikasunguluka na kālo ke moo, biabia nsenga na bikitshino bi mwanka abikahi fututu.

¹¹ Biabia ha kumona’shi, bino bintu bioso abikasunguluka, watudi n’ao ngwa kwikala bantu kinyi mu nyikashi yihatuiwe-yikishila na bwin’Efile?

¹² tukwete kutengyela na kukyeba bikata kufika kw’efuku di’Efile Mukulu, mu’dio mailu hākekala ahi kālo akasunguluka, na biamwiilu abikasunguluka na kālo ke moo?

¹³ Ank’atwe mwiyile mulayilo we atutengyela mailu ahya na nsenga yihya, mū’bio nyi amubombela kululama.

¹⁴ Biabia anwe bakuminyibwe, bia nutengyela yino myand’ayi, nusasakatei mwanudia kuhetshibwa mu kufukama, kwanushī na mabashi na kutohekwa kwadie.

¹⁵ Nuhwandjikishe kahuñanyi ka Nfumwetu nkihandjilo; bu bibenufundjile namu Paulu mukwetu mukuminyibwe mulombene binangu bibamuhelwe;

¹⁶ anka hamune namu mu mikanda ye yoso, kwete kwakula mwanka wa yino myanda; mu’yo mwi yingi myanda yi bukoho kushingulwa, yinyi’yo ayinyengwa kwi bahatumine na bashī banyingye, anka hamune bu mwabakitshina bingi Bifundwe bi’Efile, mpaa na ku kilwilo kiabo ba na bene.

¹⁷ Binyibiabia anwe batomibwe kifulo, ha kwiuka yino myanda kwibedi, dimukai, tala’nwe (namu) ha kōngolwa na kuluba kwa bebubi, anukahono ku kushimata kwenu ku na mwinyi.

¹⁸ Anka nukule mu bu-muntu na mu kiukilo kia Nfumwetu Muhashi Yesu Kidisitu. Kwadie (kwikale) ntumbo, binobino mpaa na kwikalaika. Amena.