Ii Petelo 2 - KILOMBENO KIHYA KIA NFUMWETU YESU KIDISITU

¹ Anka kubebwele namu batemuki ba madimi munkatshi mwa bantu, hamune’nka na munkatshi mwenu namu amukekala balambukishi ba madimi, abakafisha ku bufyefye myanda ya kwitolola ya kulwisha, mpaa na kutuna Nfumwetu bebaule, (biabia) abefishishishe kulwishibwa kwa kuhulumuka,

² na bebungi abakalondo bikitshino biabo bia bukitekite, ha mwanda wabo nyi ahakākwilwa bibubi mwishinda dia biabinyibinyi.

³ Na ha mwanda wa lwiso abakenudila biakwinudila na bishima bia madimi; kuhīla kwabo kwa kala, kwīsha tankwīshe, na kulwishibwa kwabo takulala-tulo, ooo

⁴ Mwanda su Efile Mukulu tamulekyele bamwikeilu abalwishishe, anka bebatakwidile mpaa na mu Tataluse, na kwibēla mu nkano ya mufito wifututu, kubikibwa kwesha kimu;

⁵ tamulekyele namu bahanohansenga ba kala, anka bahashishe Noa, a mwanda, mulungudi a kululama, bafishishe mema na mumambwe ha ba ha nsenga bashī bādi b’Efile Mukulu;

⁶ bahishishe bibalo bia Sodoma na Ngomola na kwibialula bu buto, na kwibialula bu kidimu kia kulesha baba abakekala na miuwa yabo bashī n’Efile ku mongo.

⁷ E bamañunwine Lote mululame, badi mwinyengye mwishimba ha mwikyelo w’aba babiangabiabi bashudi ba bishila.

⁸ (Mwanda yawa muntu mululame badi mubombele munkatshi mwabo, badi anyengye mwishimba (die) dilulame kwifuku n’efuku ha kumona na kuhusha bikitshino biabo bia kushula kwa bishila)

⁹ Yehowa euku mwa kuhashisha balulame ku kutompibwa, na kulama bashībalulame kumweshibwa h’efuku dia kimu;

¹⁰ anka tokiokwambā’ba abatambukila mwiyile bia ku mbidi mu lwabi lwa biko, na kusabula butontshi. Abo mbasha mbengabenga, abalondo muhunda mashimb’abo, bashyabasusu kwakula bi bubi ku bakata.

¹¹ Biosobi bamwikeilu bebakile mu katshintshi na bukome, tabafisha’kia kwibahatula n’akio kia kukana ku mpala kwa’Yehowa.

¹² Anka bano hamuneka na nyama yishī na binangu, mbatandjibwe bu nyama bisumanga ya kukwatwa na kulwishibwa, bakwete kukā mu myanda yabashyabeuku; abakehayibwa binyibinyi mu myanda yabo yinyangye.

¹³ Abakatambula bwedi bwa kuhenama, bu abo abeuhwandjikisha bu kusehela kulubīla mu kanya; ba mabashi na bilema, mbalubīle mu bia bulamalama biabo ha kudia bidibwa n’enu;

¹⁴ be na meso aule kukyebana, ashyaeuku kuleka bubi; abōngola bashī banyingye; be n’eshimba adiubila lwiso; nyi mbana bēdibwe muloa.

¹⁵ Hakuleka eshinda dilulame bēnda kungi, abalondo eshinda dia Balama, mwan’a Beole, winyi bakuminyine efuto dia myanda yihename;

¹⁶ ank’e basashilwe ha mwanda wa kusola kwe; mpunda shyakulā bākwile n’eyi dia bu muntu, balekyeshe butesha bwa mutemuki.

¹⁷ Bano nyi mishimwa yishī na mema, makumbi ahahulwa na kihahi, kufita kwa mufito nyi nkwibabikilwe.

¹⁸ Mwanda habākula myanda yikata ya kwitatula ya bisumanga, abōngola mu ngabiabi ya ku mbidi, ku bukitekite, baba bakwete kukahanda ’nka hahelahela kwi, ’ba bashale mu kuluba.

¹⁹ Hakwibalaa buluñantu, abo bana bene be bahika ba kulwishibwa, mwanda ku kiakia akikambila muntu, ku kino kinyi nyi kwadi mumunwe.

²⁰ Mwanda su habahwile kuhanda ku milwisho ya bahanohansenga ha kiukilo kia Nfumwetu Muhashi Yesu Kidisitu, abakwatwa mwanka dimonyi, na kukambilwa, (nyikashi ya) kunfudilo ngikile ya kwibedi bubi.

²¹ Mwanda ubadia kukila buwa bia bashī badi beukye eshinda dia kululama, he kwidiuka kufutala ku mulangilo uhatulwe-wi-kishila ubebahelwe.

²² Kibafikile kwabadi mwiyile winyi mwele wa binyibinyi’shi: Mbwa bālukile dimo ku kiadi mulase; na ngulube mukashi mutumpwe bālukile mu mateke.