Filemone 1 - KILOMBENO KIHYA KIA NFUMWETU YESU KIDISITU

¹ Paulu musungi wa Kidisitu Yesu, na Temote mukwetu, kwi Filemone mutomibwe kifulo kwatudi, mukwetu a kufuba n’e mifubo,

² na kwi Ahya mutomibwe kifulo kwatudi na kwi Akihusa musalai-mukwetu, na ku kikoñeno ki’Efile ki mu nshibo mobe:

³ Bu-muntu bufikye k’odi, na kufukama kw’Efile Mukulu Nshetu na Nfumwetu Yesu Kidisitu.

⁴ Natumbulā Efile Mukulu ande, nakutemunā mu nteko yande bukyelebukyele,

⁵ na kuhusha wa kīfulo na lukuluhilo biodi n’abio kwi Nfumwetu Yesu, na kwinyi kwi bahatulwe-bekishila boso’shi;

⁶ mu lwabeno lwa lukumino lobe lufikye kuobesha, mu kwiukididila kwa bintu bioso bilumbulukye bi mwanudi mu Kidisitu.

⁷ Mwanda twi na muloo ukata na kisengyelo mu kifulo kiobe, mwanda wa kutshitshimuka kwa kanya ka bahatulwe-bekishila abesangūla kodi’be mukwetu.

⁸ Henyihaha, sunga nyi musumine bikata mu Kidisitu kukulā aya yilombane,

⁹ (anka) ha mwanda wa kinyi kifulo nakilakila kwiyaya, biandji mwikale’mi uno Paulu mununu, na binobino namu (nyi) musungi wa Kidisitu Yesu.

¹⁰ Nakwiyayila ha mwanda wa bu mwan’ande Onesemusa, andji mutandjile mu bianyine biande.

¹¹ E, mu kihindji kia kala, badi oshīo kumwena, anka binobino ngakumwenwa k’odi na kwandji’mi.

¹² Yawa nyi andjia kwalusha; binyibiabia obe mutambule, e, nyi e bwīshimba diande;

¹³ andjidi’shi, ashāle n’ami na mwinyi’shi, nyi akumpiana mwadia kunfubila mu bianyino bia mukāndu-wibuwa,

¹⁴ anka tanadia nkakyeba kukita kintu kishi kilombane n’eshimba diobe; tala kikitshino kiobe kilumbulukye kiakekala bu kia kunyishwa ha bukoho, ooo, anka nkia musanku w’eshimba.

¹⁵ Mwanda hangi su binyibiabia bakatukile anka kihindji, modio kumutambwila bukyelebukyele;

¹⁶ kushī binobino bu mpika, anka kukila bu mpika, nyi mukwetu mutomeshibwe kifulo, tokiokwamba kwandjimi, anka kodi’be bi na minyi kukilakila mu bia mbidi, na mu Nfumwetu namu?

¹⁷ Binyibiabia s’ontemuna bu mwibungile n’obe, mutambule bu’mi na mwinyi.

¹⁸ Anka su mu kinyi su mu kinyi mwakutombokyela, sunga e n’obe kishio, ekitule ha mukanda wande;

¹⁹ nkakufute’bio n’ami Paulu beufundu na eyāsa diande, anka tanakulā’bia bioso biobohwile kwandji, nank’obe na mwinyi namu.

²⁰ Ee, (obe) mukwetu onkumine’mi kumwena k’odi mu Nfumwetu: sangash’eshimba diande mu Kidisitu.

²¹ Nankufundjile na kwikankamika mu lukokyelo lobe, hakwiuka biokyebe kukakita kukisha bianyisamba.

²² Anka ondumbulwile namu ha kulala; mwanda natengyela kuhebwa kwanudi ha mwanda wa nteko yenu.

²³ Ehafalasa musungi n’ami, mukwetu mu Kidisitu Yesu akwimuna;

²⁴ Mako, n’Alesetakusa na Demasa, na Luka, bakwetu ba mu niifubo namu.

²⁵ Bumuntu bwa Nfumwetu Yesu Kidisitu bwikale na kikudi kiobe Amena.