Bena Ngalatea 6 - KILOMBENO KIHYA KIA NFUMWETU YESU KIDISITU

¹ Bakwetu, su muntu basolo mwanda, anwe ba mu Kikudi-E-Selelee mwalushei winyi e biabia, n’eshimba dia kuhohela; na kwinangushena obe na mwinyi, tala obe namu okatompībwa.

² Nwitwadishene abinunemena mashito, biabia anulombasha mulangilo wa Kidisitu.

³ Su muntu ehwandjikisha’shi: Nyi mukalabale, hakī bu bisumanga, (biabia) ēdimbi e na mwinyi.

⁴ Anka (bibuwa) muntu ese atompe mufubo w’ē na mwinyi, biabia akekala na kusehela mu e na mwinyi, kushī mu mungi.

⁵ Mwanda ese muntu akatwala kimunemene ki’e na mwinyi.

⁶ Anka yawa mulambukishwe mu Mwanda w’Efile, ahane kwi winyi amulambukisha mu bintu bioso bibuwa.

⁷ Tanudimbibwanga; Efile Mukulu tabendjibwa, ooo, mwanda kioso akikunu muntu, su kinyi su kinyi, ñanka’kio kiakaumbula.

⁸ Mwanda yawa akunā ku mbidi y’e na mwinyi, akaumbula (namu) kunyanga ku mbidi; anka yawa akunā kwi Kikudi-E-Selelee, akaumbula muwa wa ikala-ika ku Kikudi-E-Selelee.

⁹ Henyi haha tatukokangai mu kukita kwa bibuwa; mwanda atukaumbula ahakakumbana kihindji, su tatuhungila.

¹⁰ Biabia mwinyi mwatukamwena mwa kukitshina, tukite bibuwa kwi bantu boso, anka tukishekishe kwi baba be mu luhoho lwa lukumino.

¹¹ Anumono mwanenufundjile mukanda ukata ku mboko yande.

¹² Bu muhūnda baba abakyebe kwitatshika mu mbidi, abo, abenukonkwela kwikala basalwe: anka mwanda wa kutshina’shi, tala twakasabulwa ha mwanda wa nkulusu ya Kidisitu.

¹³ Mwanda sunga abo bana bene mbasalwe tambalame mukanda-wa-bishila, ooo, anka abakyebe’nwe kwikala basalwe’shi, twitumbishe mu mbidi yabo.

¹⁴ Anka’mi tanyitumbisha, ooo, anka mu nkulusu ya Nfumwetu Yesu Kidisitu, nyi kubangihailwe biahanohansenga, n’ami namu kwabidi.

¹⁵ Mwanda mu Kidisitu Yesu sunga kisale, sunga nkukutwa kisale tabikitshi kintu, ñanka kihangibwa kihya.

¹⁶ Na bu muhūnda baba abatambuka na kwitonga muyile kino kishila, kufukama, na lusa, bikale he Isalele e Efile Mukulu.

¹⁷ Kubanga binobino na ku meso, muntu tankalakasha nga; mwanda’mi ha mbidi hande natwalā mikofu ya Nfumwetu Yesu.

¹⁸ Ba kwetu, bu-muntu bwa Nfumwetu Yesu Kidisitu bwikale na kikudi kienu. Amena.