Bena Ngalatea 5 - KILOMBENO KIHYA KIA NFUMWETU YESU KIDISITU

¹ Binyibiabia twimane bakankamane mu buluñantu bwatwibahosolwe kwi Kidisitu; tatwanyibwanga dimonyi ku kikūmbo kia buhika.

² Talangai, ami Paulu nākula kwanudi’ shi, su anukumina kusalwa, (biabia) Kidisitu takamona kintu kwanudi, ooo.

³ Mwanda nesamba dimonyi bu kamonyi’shi, ese muntu ’musalwe e na kishio kulonda mukanda-wabishila woso.

⁴ Kidisitu bāluluka te kwanudi’nyi kwinwe, su nanyi su nanyi mubingishibwe ku mukanda-wa-bishila; nubalamunuka ku bu-muntu (bw’Efile)

⁵ Mwanda’twe ha mwanda wa Kiudi-E-Selelee, atutengyela lukuluhilo lwa kululama kw’eshimba ha lukumino.

⁶ Mwanda mu Kidisitu Yesu sunga kisale takī mwesha kintu, sunga takwi kisale, ooo, anka lukuluhilo alukitshisha ha mwanda wa kifulo.

⁷ Nubadi anukama-lubilo bibuwa; a nanyi benubamba’shi, tanukakokyelanga biabinyibinyi?

⁸ Kuno kukonkwelwa tankufiki kw’awa benwitamine, ooo.

⁹ Kitatusho kihela akitatusha mutanda ushima.

¹⁰ Nyi mwinukuluhile mu Nfumwetu’shi, tanukekala na yingi nangunangu, ank’e enukalakasha akatwala kuhīla kwe, su nanyi su nanyi.

¹¹ N’ami bakwetu, su nkiandungula (myanda) ya kisale, a kia nkiambingilwa’nyi nkinyi? twambengye kikokoshi kia nkulusu kibalekibwa.

¹² Nankyebe’shi, benyi abenukalakasha belamune bana bene.

¹³ Mwand’anwe bakwetu nubaitanyinwe ku bulufiantu; anka tanwalulanga bulufiantu bwenu tabudi bu ha kukitshina mulombene bia mbidi; anka mu kifulo nwifubishenei.

¹⁴ Mwanda mukanda-wa-bishila woso ubakumbashwa mu mwanda umunenka, nyi anka uno’u’shi: Okafule mukwenu kifulo bu’be na mwinyi.

¹⁵ Anka su anwisumena meno na kwiminena anwe bana bene, (biabia) dimukai tala nwehwēna anwe bana bene.

¹⁶ Nākul’uno’shi: Tambukilai mu Kikudi-E-Selelee, biabia tanukakumbasha lwabi lwa bia mbidi, ooo.

¹⁷ Mwanda mbidi yi na lwabi lwa kutuhishena na Kikudi-E-Selelee, na Kikudi E-Selelee etuhishena na mbidi; abo (benyi namu) mbekutwene au hē, au hē, mwanudia kukutshilwa myanda yianukyebā kukita.

¹⁸ Anka su anukunkushibwā na Kikudi-E-Selelee (biabia) tanwi mu mukanda-wa-bishila.

¹⁹ Binyibiabia bikitshino bia mbidi mbisokolwe, nyi mbino: Masandji, bukyebanekyebane, kushūla kwa bishila, mudioholo w’eshimba dibi.

²⁰ Lulangwilo lwa mankishi, butshi, kushikwana, kwituhishena, mukau, nsungu, mpaka, kwilamunushena, kwitshibena.

²¹ Kiutu, etombo, kukolwakolwa, na kutoma matanga, na yingi yi bino; ha yinoi nenudimuna, anka mwanenudimwinyine kala’shi, abo abakitshī’yo tabakahyana bufumu bw’Efile Mukulu, ooo.

²² Ankabikuba bia Kikudi-E-Selelee nyi nkifulo, muloo, kufukama, kahuñanyi k’eshimba, kasendeleshi, buwa, lukuluhilo,

²³ kuhohela, butontshi bwa mbidi; ku yino yi bino takwi kishila ooo.

²⁴ N’abo ba Kidisitu (abawhile) kwiha mbidi ha mutshi uhingishene na ya kusuasua kw’eshimba na lwiso.

²⁵ Su twi na muwa mu Kikudi-E-Selelee, (biabia) tutambukile namu mu Kikudi-E-Selelee (na kwitonga)

²⁶ Tatwikalanga abakyebe kwitumbisha kwa bisumanga na kwikolomoshena na kwi kwatshishena kiutu.