Bena Ngalatea 4 - KILOMBENO KIHYA KIA NFUMWETU YESU KIDISITU

¹ Binyibiabia n’amba’shi, mpianyi hakī mukinga tamwilekena na mpika, sunga e nsha bintu bioso.

² E, e mushi mwa baleshi na balami mpaa n’ahakafiki kihindji kibasangwile nshye.

³ Biabia atwe namu, hatubadi tukī bakinga, tubadi ’mbuhika bwa mu bunsongwalume bwa myanda ya hanohansenga:

⁴ anka habakumbene kihindji, Efile Mukulu batumine Mwan’e, atandjibwa kwi mwana mukashi, mufikile mu mukanda-wa-bishila’shi,

⁵ akūle baba be mu mukanda-wa-bishila mwatudia kutambwila buana bwa bana (b’Efile)

⁶ Na ha mwanda nwi bana, Efile Mukulu tabatumine kikudi kia Mwan’e mu mashimb’enu, ēle musase’shi: A Ya! Yaiya!

⁷ Binyibiabia, twe mpika dimonyi, ooo, anka todi mwana; na su todi mwana, twambengye todi mpianyi e Efile Mukulu ha mwanda wa Kidisitu.

⁸ Sunga mbiabia, hanushī badi beukye Efile Mukulu, nubadi bamunwe kwi baba bashī bw’Efile Mukulu binyibinyi.

⁹ Anka binobino hanubahu kwiuka Efile Mukulu, su nkwakula’shi, nwiukībwe kw’Efile Mukulu. Henyihaha, a kianwialulwila dimonyi ku bunsongwalume bwa myanda ya butūba na ya bulanda, kwa tanukyebe’nyi kumunwa mbuhika dimonyi?

¹⁰ Anunangushena mafuku na mieshi, na bihindji na bihwa.

¹¹ (Aai)! nyi na katshima munda, ami’shi, tala mufubo wa nafubile kwanudi wekala bu wa bisumanga.

¹² Bakwetu, nenusendela’nwe nwikalebū’mi; mwanda’mi nyi bianudi; tanwibankitshine mwanda, sunga mpahela.

¹³ Anwiuku mwa nenulungwidīle mukāndu-wibuwa kwibedi mu butūba bwa mbidi;

¹⁴ nakwinyi kutompībwa kubadi mu mbidi yande tanwibekubendele, sunga nkutuna, anka nubantambwile bu mukiendji w’Efile Mukulu, anka hamune bu Kidisitu Yesu.

¹⁵ A henyihaha winyi mwabi wanubākwile wi kwi kunyi? mwanda’mi nyi kamonyi ka mwanda wenu’shi, su kubadia kukitshibwa (biabia) nubadia kutondobola meso enu, nwampa’o.

¹⁶ Henyihaha nyi mwalulukye bu mwishikwanyi n’enu, mwanda nenulungula biabinyibinyi su?

¹⁷ Abo, na kinsukunsuku kiabo abenukumu, n’ako kwinyi takwi buwa, ooo; ee tababadia kwikala n’enu mulubadi, mwanudia kwibakumina.

¹⁸ Anka kwi buwa kukumībwa mai’uku oso na kinsukunsuku mu kintu kibuwa, tañanka hankī munkatshi mwenu, ooo.

¹⁹ Bana bande bakinga bakuminyibwe, banakumbīle mitanyo hakwinutanda dimonyi, mpaa n’ahababumbidibwe Kidisitu mwanudi.

²⁰ Nyi mukahakashwe ha mwanda wa kwikala n’enu kwakwa binobino, na kwalula eyi diande, mwanda nenualashena.

²¹ Ndungulei, anwe abakyebe kwikala mu mukanda-wabishila, tanuhushā mukanda wa-bishila’nwe?

²² Mwanda ubafundjilwe’shi: Abalahama badi na bana balume babidi, umune nga mukashi mpika, mungi’nyi nga mukashi mulufiantu.

²³ Anka winyi a mukashi mpika badi mutandjilwe muyile bia ku mbidi; ank’a muluñantu (batandjilwe) ku mulayilo.

²⁴ Yino myanda yi bu lukindji, mwanda bano (banabakashi) babidi be bu bilombeno bibidi; umune batukile ku ngulu a Sinai atandjilā bana ’mbuhika, e winyi nyi Haga.

²⁵ Winyi Hagā nyi ngulu ya Sinai e mu Arabia ’muhwandjikishwe bu Yelusalema ki kī kwanka na binobino, e winyi namu e mu buhika na bana be.

²⁶ Anka Yelusalema a mwiilu nyi muluñantu, e nyinyin’etu ātwe boso.

²⁷ Mwanda ubafundjilwe’shi: Sehela obe nkunga shyatanda; Tanyika, wele musase: Obe shī musumibwe na munda wa kutanda, mwanda bana b’awa muhedibwe mbakile bana ba yawa e na mulunda e bungi.

²⁸ Anka’twe bakwetu twi bana ba mulayilo, bibadi Isaka.

²⁹ Anka bu ku kiakia kihindji, yawa badi mutandjibwe ku mbidi badi abingi winyi batandjilwe ku Kikudi-E-Selelee, nyi mbiabia mpaa na binobino.

³⁰ Sunga mbiabia, a Kifundwe-ki’Efile akiakula na minyi? Binga mukashi mpika na winyi mwan’e, mwanda mwan’a mpika takekala mpianyi na mwan’a mulufiantu, ooo.

³¹ Binyibiabia anwe bakwetu, tatwi bana ba mukashi mpika, ooo, anka twi ba mulufiantu.