Bena Ngalatea 3 - KILOMBENO KIHYA KIA NFUMWETU YESU KIDISITU

¹ Aaa! anwe bena Ngalatea balotakane! A nanyi benulwele’ shi, tanwi bianudia kukokyela biabinyibinyi, anwe baleshibwe Yesu Kidisitu ha toka ku meso kwenu, aihayibwa ha mutshi uhingishene?

² Kiankyebe kwiuka nyi nkino, ami’shi: A nubatambwile Kidudi-E-Selelee ku bikitshino bia mukanda-wa-bishila’nyi, su mpa kuhusha kwa lukumino?

³ Nyi kianubalotakēna su? Hakubanga mu Kikudi-E-Selelee, a binobino tanukumbeshe mu bia mbidi su?

⁴ Nubafwambukile mu bia bintu bibungi bisumanga su? Su bikī bu bia bisumanga.

⁵ Binyibiabia, e enuheya Kikudi-E-Selelee, n’akitā bilengyeleshi munkatshi mwenu, ebikitshina ku bikitshino bia mukanda-wa-bishila, su nyi nku kuhusha kwa lukumino?

⁶ Anka bu bibadi Abalahama mukumine Efile Mukulu, kubamuhwandjikishe bu kululama kw’eshimba.

⁷ Binyibiabia anwe nwiukye’shi: Abo ba lukuluhilo nyi mbaba bana ba Abalahama.

⁸ Na Kifundwe ki ’Efile kibabadidile kumona’shi, Efile Mukulu abingishā Badjentaila ku lukuluhilo, kibalungwile mukāndu-wibuwa kwi Abalahama kwibedi’shi: Mōdibe mīlo yoso, ayikēlwa mwabi.

⁹ Twambengye benyi be ku lukuluhilo, mbahebwe mwabi na Abalahama mushimate.

¹⁰ Mwanda boso abanemenā mu bikitshino bia mukanda-wa-bishila, abedibwa muloa, mwanda ubafundjilwe’shi: Bedibwe muloā kwi ese shyaididilā mu myanda yoso yibafundjilwe mu mukanda-wa-bishila, kwiyikita.

¹¹ Anka tauhwanga kwisokola’shi: Takwi muntu, sunga ngumune abingishibwā ku mukanda-wa-bishila ku meso kw’Efile Mukulu, ooo, mwanda balulame abakekala na muwa ha mwanda wa lukuluhilo.

¹² Na winyi mukanda-wa-bishila tangwa lukuluhilo, ooo; anka muntu eyikitshi aikala na muwa mwayidi.

¹³ Kidisitu betukudile ku muloa wa mukanda-wa-bishila, hakwitwialulwila tadi mwelwe muloa: Mwanda ubafundjibwe’shi: Edibwe muloa ese abambibwa ha mutshi;

¹⁴ eshi, mwabi wa Abalahama ufikye kwi Badjentaila ha mwanda wa Yesu Kidisitu; mwatudia kutambwile mulayilo wa Kikudi-E-Selelee ha lukuluhilo.

¹⁵ Bakwetu nesambila muyile bihikwa bia bantu; sunga kwayikala kihwano ñanka kia muntu, su kibakankamikwa, (biabia) takwi sunga ngumune akekialulusha takidi bu bisumanga, ooo, sunga nkutentekyela hanka.

¹⁶ Binyibiabia milayilo yibalayibwanga kwi Abalahama mpaa na ku lubio lwe. Tamwakule’shi: Nku mbio, bu yi kibumbu, ooo, ñanka bu ya lumune: Na ku lubio lobe, lwinyi nyi Kidisitu.

¹⁷ Uno nyi wanyisamba’mi’shi: Kinyi kihwano kibabadidile kukankamikwa kw’Efile Mukulu, mu Kidisitu. Mukanda wa bishila nyiu bafikile kumongo, kwa bihwa nkama yinanka na bihwa makumi asatu taualulusha mulayilo’shi, ngwa bisumanga, ooo.

¹⁸ Mwanda su buhyanyi mbwa ku mukandawa-bishila (twambengye) tambwa mulayilo, anka Efile Mukulu bebuhele Abalahama ku mulayilo.

¹⁹ A henyihaha mukanda-wa-bishila ngwa kinyi? Ubatentekyelwe ha mwanda wa kusola kwa myanda’shi, mpaa n’ahakafiki lubio kwi winyi balayilwe mulayilo; au namu ubalumbulwilwe kwi bamwikeilu mu mboko ya musengi.

²⁰ Talai, musengi tanga buhenka, ooo, anka Efile Mukulu ngumune.

²¹ Biabia mukanda-wa-bishila autuhishena na milayilo y’Efile Mukulu su? A lekā! Mwanda su kubadi kuhebwe mukanda-wa-kishila ubeukile kuhana muwa, biabia binyibinyi kululama kw’eshimba kubadi kwikale ku mukanda-wa-bishila.

²² Anka Kifundwe ki’Efile kibafudisha’shi: (Bantu) boso mbānka mu kuwilsha’shi, mulayilo wa ku lukumino lwa Yesu Kidisitu uhebwe kwi baba abakumina.

²³ Anka kwibedi kwa lukumino talwafikile, tubalamibwanga hamune mu mukanda-wa-bishila, tubashitshilwe ku lukumino lubakyebwanga kwikala lufumbulwe.

²⁴ Binyibiabia mukanda-wa-bishila tauhwile kufika bu mulambukishi etu akwitufisha kwi Kidisitu mwatudia kwikela babingishibwe ku lukuluhilo.

²⁵ Anka hatahafikanga lukuluhilo, tatukī ba ku mulambukishi ’nyi, ooo.

²⁶ Mwand’anwe boso nwi bana b’Efile Mukulu ku lukuluhilo mu Kidisitu Yesu.

²⁷ Mwanda anwe bebungi bitanuhwile kubatshishwa mu Kidisitu, nwibafwale Kidisitu.

²⁸ Mwadi e takwi mwina Yuda, sunga mwina Ngidiki, takwi sunga mpika, sunga muluñantu, takwi sunga mulume sunga mukashi; mwanda’nwe boso nwi bū’mune mu Kidisitu Yesu.

²⁹ Na su nwibekale ba Kidisitu, twa mbengye nwi ba ku lubio lwa Abalahama, nwi bampianyi ba muyile mulayilo.