Bena Ngalatea 2 - KILOMBENO KIHYA KIA NFUMWETU YESU KIDISITU

¹ Henyihaha habahwile bihwa ekumi na binanka, nakamine dinto’nyi ku Yelusalema na Banabasa, tubayile na Tetusa namu.

² Nakaminyine ha mwanda ubafumbwilwe kwandji; nafishishe kwabadi winyi mukāndu wibuwa wandungulā munkatshi mwa Badjentaila, anka ku bufyefye kwi baba basha ntumbo, tala su nku kinyi su nku kinyi nadia kukama lubilo, sunga ndwanakamine kalatala lwakekala bu lwa bisumanga,

³ Anka Tetusa badi n’ami, sunga badi mwina Ngidiki tamufinyikwe kusalwa, ooo.

⁴ Biabia nyi mpa mwanda wa bakwetuba madimi, abetwesheshe munkatshi mwetu (ha mwanda wa) kitadīla, ku bufyefye’shi; Twikale bampūha ku buluñantu bwabadi n’abo mu Kidisitu Yesu, mwabadi kwitufishisha mu buhika.

⁵ Kwabadi (namu) atwe tatwibebakokole, ooo, sunga nkahindji kahela; eshi biabinyibinyi bia mukāndu-wibuwa bikadidile n’enu.

⁶ Anka kwibo abadibubasha ntumbo (su badi’nyi, su badi’nyi, kwandji’mi takwi mwanda, Efile Mukulu takuminā ku mbidi ya muntu, ooo), abo benyi basha ntumbo tabe n’awa bantentekyela sunga nguntune,

⁷ anka ku lungi luhese, habamwēne biandji muhitshikwe ku mukāndu-wibuwa wakubashibasalwe, anka hamune mubahitshikilwe Petelo namu (mukāndu-wibuwa) wa kubasalwe.

⁸ Mwanda e banyishishe Petelo mu butumībwa bwa kubasalwe, nyi anka e banyisha bwande bwa ku Badjentaila,

⁹ Biabia Yakoba na Kefasa na Yoano, babatemwinwe bu bibayi, hakumona bu-muntu bunahebwa, abetukukile na Banabasa, ku maboko a balume a kihwano’shi, atwe twende kwi Badjentaila, abo namu kwi basalwe.

¹⁰ Anka abakyebanga’shi, tunangushene balanda n’au winyi nyi unankyebanga kunyingamēna kukita.

¹¹ Anka habafikile Petelo ku Anteoka, nabwēlen’e hampala mwanda e badi mutohekwe,

¹² Mwanda e badianga na Badjentaila, habadi bangi tababandjile kufika kwi Yakoba; anka kabafikile, e bakungulukile, elamuna, tatshinyi baba baku basalwe.

¹³ Na bangi ba Bayudea babakatukile n’e hamune; biabia Banabasa bakakilwe mu kubambakana kwabo.

¹⁴ Anka hanamwene’bo tabatambuka mu kululama muyile biabinyibinyi bia mukāndu-wibuwa, nākwile kwi Petelo ku mpala kwa boso’shi: A ku’nyi we mwina Yuda, twend’olondanga a muyilā Badjentaila, kushī bu Bena Yuda, a nkinyi kiolinyikā Badientaila kwikala bu Bena Yuda?

¹⁵ Atwe twi Bena Yuda muyile kihikwa kia muwa, na bashī balwishi bu Badjentaila, ooo.

¹⁶ Anka hakwiukashi, muntu takabingishibwa ku bikitshino bia mukanda-wa-bisliila, ooo, anka ku lukumino lwa mu Yesu Kidisitu, bu mwatubakuminyine mu Kidisitu Yesu, mwatudia kubingishibwa ku lukumino lwa (mu) Kidistu, kushī ku bikitshino bia mukanda-wa-bishila, ooo; mwanda ku bikitshino bia mukanda-wa-bishila takwi muntu akabingishibwa, ooo.

¹⁷ Anka su mpatukimbila kubingishibwa kwi Kidisitu, n’atwe bana bene tuhetshibwe balwishi, a biabia Kidisitu nyi bu mufubi a milwisho su? A leka, leka, tawi biabia.

¹⁸ Mwanda su naibaka dimonyi abia bintu bianasaswile nēlesha ami mwinyi bu musodi a myanda.

¹⁹ Mwanda’mi ku mukanda wa bishila tanafwile kwanka, mwandjia kwikela na muwa kw’Efile Mukulu.

²⁰ Naihaībwa ha mutshi uhingishene hamune na Kidisitu, biosobi nafala, anka tanami na mwinyi ooo, nyi ñanka Kidisitu atala mwimi; na muwa wandji n’au binobino mu mbidi, nyi mwikele n’au ku lukuluhilo lwa Mwan’Efile Mukulu banfule kifulo, behanyine namu, e na mwinyi, ha mwanda wande.

²¹ Tankumbā bu-muntu bw’Efile Mukulu ooo, mwanda su kululama kw’eshimba kubafikile ku mukanda-wa-bishila, twambengye Kidisitu bafwile bisumanga.