Bena Loma 9 - KILOMBENO KIHYA KIA NFUMWETU YESU KIDISITU

¹ Nesamba binyibinyi mu Kidisitu, tandjimbi madimi, n’eshimba diande ditoka dia munda adimpetekyela bu kamonyi mu Kikudi-E-Selelee.

² Ami’ shi, nanemenwa bi moo, na kwinyenga bukyelebukyele mwishimba diande.

³ Mwanda nakyebanga’shi ami na mwinyi nyi elwe muloa ku Kidisitu ha mwanda wa bakwetu, mulongo wande mulombene mbidi.

⁴ Abo mbena Isalele: kwabadi’bo ñanka’ko kwi buana, na ntumbo na bilombeno, na kuhebwa kwa mukanda-wa-milangilo, na mifubo y’Efile, na milayilo;

⁵ Ñanka’bo benyi ba bashetu-kulu, na kwa badi, nyi kubafikile Kidisitu mulombene mbidi ye, na mwinyi e ku nundu kwinyi kwa boso, Efile-Mukulu a mwabi wa ikala-ika. Amena.

⁶ Ta mpamun’enka kwamba’shi mwanda w’Efile-Mukulu aukwata mikankalo, ooo. Mwanda abo boso tambena Isalele ba’nka mu Isalele, ayoyo.

⁷ Sunga’ba ntwikulo twa Abalahama, wawa mwanda tawibekasha bu bana bande bana mwinyi, ooo; anka mwi’Isaka nyi amukatemwinwa kekulo kobe.

⁸ Nyi kwamba’shi: Aba bana ba ku mbidi bisumanga, tambana b’Efile-Mukulu aba, ooo; anka bana ba mwanda wa mulayilo, abo nyi abatemunwa bu twikulo.

⁹ Mwanda wa mulayilo n’au uno’shi, anka hano ahafikila kino kihindji, nyi hankafiki, na Sala akatanda mwana mulume.

¹⁰ Tanankaho kubahu, ooo, anka habaimitshishwe Lebeka kwi umune, nyi shetu-kulu Isaka.

¹¹ (Mwanda habadi bana tamba bande kutandjibwa, sunga tababadi babange kukita mwanda wibuwa sunga ngubi, biadia kushimatshisha kufuna kw’Efile-Mukulu mulombene kusangula kwe eshi, tankwa ha bikitshino ooo, anka kwadi e akwitamina),

¹² kibamwakudilwe’shi, mukulu akafubila mwin’e bu mpika.

¹³ Mwakibafundjilwe’shi; ta nafule Yakoba kifulo, anka Esau nyi mumushikwe.

¹⁴ A bino atukākula na minyi? twākule’shi, Efile tamolokye su, ooo, A leka! leka! leka!

¹⁵ Mwanda e bakwile kwi Mosesa’shi: A nkafwila lusa nyi a nkafwila lusa, a nkafulu kifulo nyi a nkafulu kifulo.

¹⁶ Binyibiabia taki kwi e kikyebe ooo, sunga kwi akukama lubilo; anka ki kw’Ifile-Mukulu akufwila lusa.

¹⁷ Mwanda Bifundwe bibamwakudile Pālo’shi; Nyi ha mwanda uno unakwibosheshe eshi, mwandjia nkuleshesha ntshitshiba yande kodibe, n’eshina diande dihalakane kosokoso hanohansenga.

¹⁸ Binyibiabia E aleshabakyebe lusa nyi badi mukyebe lusa, anka akomesha nyi akomesha bu e na mwinyi eshimba die.

¹⁹ Henyihaha okanyihushe’shi (Efile) kiahatula bantu mwanda kinyi? Nanyi akumukutshishwa amukyebel’eshimba die?

²⁰ Ooo, a n’obe nyi kampanda, akalashena n’Efile-Mukulu? A kintu kibumbwe nkiambe ekibumbu’shi, akio bombumbila bino nkinyi?

²¹ A mbūfi te na matalwa h’ema mu kubumba kibumbwe kimune kikalabale na kingi kishī kikalabale ku winyi mutanda umune su?

²² Su Efile-Mukulu badi n’eshimba diakulesha bukyelo bwe, na kwiukisha matalwa, e baididishe kutula kw’eshimba kwi moo anka ha bia bibumbwe bia bukyelo, bilumbulwe bia kukalwila.

²³ Biadia kwiukisha ntumbo ye yikambe ha bia bibumbwe bia lusa, bibalumbulwile kala ku ntumbo;

²⁴ Ñanka’twe babaitanyine, ako namo tañanka kwa mu bena Yuda ooo, anka na mu Badjentaila benyi kumune.

²⁵ Anka mubakudile mwi Hoshea, eshi; Nankebatemuna bu bantu bande abo bashī bande; n’abadi shī mukuminwe, tamukuminyibwe.

²⁶ Nyi mwa kikekela’nka biabia, anka mwa badi abakwilwa’shi, Anwe tanwi bantu bande, nyi mwabakatemwinwa na bu-bana b’Efile-Mukulu a muwa.

²⁷ Anka Esaiye namu bēle Isalele musase’shi: Sunga mbekale bana ba Isalele hamune na misengyeya ya mu mema a kalunga, abashēle abakahanda.

²⁸ Yehowa akahudisha mwanda, akeutshibisha wihi mu kululama. Mwanda Efile mukulu akakitshisha hano ha nsenga mwanda wihi.

²⁹ Anka mubakudile Esaiye kala’shi; Su ta n’e Yehowa a Sabaota ta mwitulekyele kekulo, biabia tubadi akwikala bu Sodoma, tatudi hamune bu Ngomola.

³⁰ A binyibiabia kiatukyebe kwakula nkinyi? eshi, Badjentaila bashī abalondo kululama, abafikile ha kululama, n’ako nkululama kwa ha lukumino.

³¹ Anka bena Isalele abalondā kishila kia kululama tambafikile hanka.

³² A mpa mwanda kinyi? Abo kuleyeba abakyebeleko tampa lukumino, ooo, anka ha bikitshino bia mukanda-wa-milangilo. Mwanda abakokwele kwi’bwe’dia kwibakambila.

³³ Mwakibafundjile’shi: Talangai, natulu muno mu Siona ebwe dia kwibakokosha na lubwebwe lwa kwi bakokosha, ank’awa akukumina kwadi e ta kwatshishwa būfu, ooo.