Bena Loma 8 - KILOMBENO KIHYA KIA NFUMWETU YESU KIDISITU

¹ Binyibiabia hano’nyi ta kukī kuhīshwa kwa’aba be mu Kidisitu Yesu, abende mushī mulombene mbidi anka mulombene Kikudi-E-Selelee.

² Mwanda wa kishila kia Kikudi-E-Selelee kia muwa mu Kidisitu Yesu kibandamūna ku kishila kia kulwisha na lufu.

³ Akia kibakutshilwe mukandawa-milangilo katshintshi, mwanda wa lotolo lwa mbidi, Efile-Mukulu hakutuma Mwan’e na mwinyi mu kihwandjikisho kia mbidi ya milwisho, na ha mwanda wa milwisho, bahīshishe milwisho mu mbidi.

⁴ Mwa kwakwila’shi, kululama kwa mukanda-wa-milangilo kulombashwe mwi’twe bashi abalondā ku bia ku mbidi, anka bia ku Kikudi-E-Selelee.

⁵ Aba ba ku mbidi mbatee mashimba ku bia ku mbidi, anka’bo ku Kikudi-E-Selelee be ku bia ku Kikudi-E-Selelee.

⁶ Mwanda w’eshimba dia ku mbidi ndufu, ank’eshimba dia ku Kikudi-E-Selelee ’muwa na kufukama.

⁷ Mwanda w’eshimba dia mbidi ndishikwe Efile-Mukulu, mwanda’dio ta ndia kukokyela mukanda-wa-milangilo w’Efile-Mukulu, ooo, sunga nkumona mwa kukokyela mwinyi.

⁸ Binyibiabia aba be ankamo mu bia mbidi, ta beuku kusangash’Efile-Mukulu, ooo.

⁹ Ank’anwe ta nwi mu bia mbidi, anka mu Kikudi-E-Selelee, su Kikudi-E-Selelee ki’Efile-Mukulu ki mwanudi’nwe. Su kwi muntu, su nanyi su nanyi, ashī na Kikudi-E-Selelee kia Kidisitu, biabia, ta ngee, sunga mpakotokoto henyi.

¹⁰ Na su Kidisitu e mwanudi’nwe, biabia mbidi ngifwe ha mwanda wa milwisho; anka Kikudi-E-Selelee nyi muwa ha mwanda wa kululama.

¹¹ Su Kikudi-E-Selelee ki’awa babushishe Yesu mu bafwe ekale mwanudi’nwe, biabia e babushishe Kidisitu mu bafwe, akahasula namu mbidi yenu ya lufu, ku Kikudi-E-Selelee kie e mwanudi’nwe.

¹² Binyibiabia bakwetu, twi basha mahu, ta nga ku mbidi eshi, tulonde mu bia ku mbidi, ooo.

¹³ Su anulondo bia ku mbidi, biabia anukafu; anka su anuihaa bikitshino bia ku mbidi ha mwanda wa Kikudi-E-Selelee biabia anukamono muwa.

¹⁴ Boso mwabafwimina abakunkushwa na Kikudi-E-Selelee ki’Efile-Mukulu nyi bana b’Efile baba.

¹⁵ Mwanda ta nwibatambule kikudi kia buhika bwa moo, ooo, anka nubatambwile Kikudi kia bumwana, bu bi’atudila’shi, A Yaiya! a Ya!

¹⁶ Akio kinyi Kikudi-E-Selelee akihetekyelwa kwi bikudi bietu’shi, twi bana b’Efile.

¹⁷ Su twi bana be, biabia twi bampianyi b’Efile-Mukulu na bu bampianyi balombashwe na Kidisitu; su mbinyi atufwambuka n’e’shi, mwatudia kutumbishibwa ntumbo hamune n’e.

¹⁸ Ami nahwandjikisha’shi, kufwambuka kwa kino kihindji ta nkuhwandjikile kulombana hamune na ntumbo ayikafumbwilwa mwatudi’twe ooo.

¹⁹ Bintu bioso bibahangilwe bikwete kutengyela, abitala swee akukafumbukila bana b’Efile.

²⁰ Bihangwe namu bibabofwishwe ku myanda ya bisumanga, ta nku musanku wabio’ ooo, anka ha mwanda w’e bebibofweshe mu lutengyelo.

²¹ Bihangibwe binyi abikalamunwa ku buhika bwa kunyanga, abio tambiluñantu bia mwinyi bia ntumbo yikalabale bia bana b’Efile-Mukulu.

²² Mwand’atwiuku’shi, bihangibwe biosobioso abikumbā, abio abitashintā mu busungu hamune na binobinyi.

²³ Ta ñanka’bio buhenka, ooo, anka n’atwe boso hamune, be na bia kwibedi bikuba bia Kikudi-E-Selelee, n’atwe bana bene atukumbā munda mwetu hakutengyela kuhebwa buana’shi, takikudilo kwa mbidi yetu.

²⁴ Mwanda’twe tubahanda mu lukuluhilo, anka lukuluhilo alumonwa ta ndukuluhilo, ooo; mwanda akimono muntu, akekitengyela kinyi?

²⁵ Anka su atukuluhila kiatushi atumono, biabia atwikitengyela na lwishinko lw’eshimba.

²⁶ Ñanka hamunenka, Kikudi-E-Selelee akikwashia na bī lotolo lwetu; mwanda ta twiuku sunga mwa kutekyela mwitulombene, ooo, anka Kikudi-E-Selelee akio ki na mwinyi akitusengyela na kukumba kwa kukutwa mwa kwakwila.

²⁷ Awa akutompa ’mashimba euku dinyi eshimba dia Kikudi-E-Selelee, mwanda asengyela balamunwe-bakishila mulombene akikyeb’eshimba di’Efile-Mukulu.

²⁸ Ank’atwiuku’shi, bintu biosobioso abikwashena hamune mwa kukitshina bantu be n’Efile Mukulu kifulo myanda yibuwa, anka kwi-ba bakwitanyinwa mulombene kiakyebe kie.

²⁹ Mwanda bantu bababangile kwiuka kwibedi, e namu bebasangwile kwibedi mwa kwibalombasha bu kihwandjikisho kia Mwan’e, biadi akwikala bu mwan’a mbedi munkatshi mwa bakwabo be bungi.

³⁰ Anka hangi namu, aba benyi babasangwile kala, ñanka’bo betanyine; n’abo babaitanyine, bebabingishe; aba bababingishe ñanka’bo namu babatumbishe ntumbo.

³¹ A henyihaha mwatukyebela’nyi kwakwila ha bino bintu mwi kunyi? Su Efile-Mukulu e n’etu, aketuhishena n’etu a nanyi?

³² E ta mulekyele Mwan’e na mwinyi, anka bamuhene kwatudi’twe boso, akutwe bi kunyi kwituha n’e bintu bioso, tambia-buntu anka hadi e?

³³ Akyebe kukebateula kioso kintu nanyi? su nanyi, su nanyi kwi basangulwe b’Efile-Mukulu abingishā.

³⁴ Akebahīsha a nanyi? Kidisitu Yesu bafwile, anka babushishwe ku lufu, bino tadi ku mboko yi balume y’Efile-Mukulu, tanga kwitusengyela kwanka.

³⁵ Nketulamuna na kifulo kia Kidisitu nanyi? A nkusabula su, a nkatshima munda, a nkubingwabingwa su, a munanga’nyi, su muswa, su mukanwa mwa lufu, su nduhete lwa kutahana?

³⁶ Anka hamune’nka mwakibafundjilwe’shi; Ha mwanda w’obe tutahībwe efuku dioso na bushima, tutemunwe bu mikoko ya kutahwa.

³⁷ Ayoyo, sunga mpakotokoto henyi; mu bia biosobioso tubakidi babinkome anka mwadi e bekele n’etu kifulo.

³⁸ Ami nyi mukankamikwe anka hoo’shi, sunga ndufu, sunga muwa, sunga bamwikeilu, sunga mbakata benyi, sunga mbamatalwa, sunga bintu bi hanka binobino, sungā bikafiki ku meso.

³⁹ Sunga mbula bwa mwiīlu, sunga kihangwe kingi, su nkia kinyi, su nkia kinyi, akikakutwa katshintshi ka kwitulamuna na kifulo ki’Efile-Mukulu ki mu Kidisitu Yesu Nfumwetu.