Bena Loma 5 - KILOMBENO KIHYA KIA NFUMWETU YESU KIDISITU

¹ Henyihaha biatubabingishwa ha lukumino, twi na kufukama n’Efile-Mukulu anka mu Nfumwetu Yesu Kidisitu;

² Anka mwadi e nyi mwatumwena kitwēlo mu buno bumuntu mwatwimena, mwanda wa lukumino, atwilungwila mu kukuluhila kwa ntumbo y’Efile-Mukulu.

³ Ta ñanka’ko ooo, anka’twilungwilā mu kusābulwa kwetu kwinyi, hakwiuka’shi, abia biakusābulwa abikitshishā kwishinka.

⁴ Biabia kwishinka akukitshisha bukalabwino; bukalabwino namu lukuluhilo.

⁵ Lukuluhilo namu ta lufisha bufu ooo; mwanda wa kifulo ki’Efile-Mukulu kibahongolwa ’mashimb’etu kwi Kikudi-E-Selelee kibetuhelwe.

⁶ Hatubadi ta twi na bukome, ha kihindji kinyi kilombene, Kidisitu bafwidile bashī n’Efile.

⁷ Ta kwi muntu akamba kukyeba kufwila mululame; sunga ha mwanda wa muntu e buwa bamo abakumina kumufwila.

⁸ Anka Efile-Mukulu atumbisha kifulo kie na mwinyi kwi’twe’shi, hatubadi balwishi Kidisitu betufwidile.

⁹ Binyibiabia bino hatubabingishwa ku mase e, tukahashibwa ku nsungu y’E kw’Efile-Mukulu anka hadi e.

¹⁰ Mwanda, sunga hatubadi tukibamushikwe, tubalombeshwe n’Efile-Mukulu ku lufu lwa Mwan’e, biabia kukila, hatulo mbeshwe atukahashibwa ku muwa we.

¹¹ Ta ñanka’ko ooo, anka atwilungwila mw’Ifile-Mukulu ha Nfumwetu Yesu Kidisitu hatubatambwila binobino kilombeno.

¹² Ha mwanda uno mutubatwelele kulwisha hanohansenga ku muntu umune, na lufu namu anka ha kulwisha, na biabia mubafumankene lufu kwi bantu boso, mwanda boso babalwishishe;

¹³ Aho habadi mukanda-wa-milangilo ta wamwekyele, kulwisha kubadi hanka kalā hanohansenga, anka kulwisha ta nkutemunwe ha shī mukanda-wa-milangilo.

¹⁴ Biabia kubangila kwi Adama na kufisha mpaa na ha Mosesa, lufu lubabikele bufumu ku bosoboso sunga ta mbalwisha hamune na kushula kishila kwa Adama, winyi e bu kihwandjikisho ki’awa akafiki.

¹⁵ Anka ta bi kwamba’shi, kusola kwa mwanda nyi mulombene buntu, ooo; Āho su be bungi babafwidile ha kusola kwa myanda kwa muntu’mune, kukila biabia, mbuntu bw’Efile-Mukulu na kuha kwa buntu bi ku muntu’mune, Yesu Kidisitu na mwinyi, bibakambile kukumbana kwi be bungi.

¹⁶ Ta bi hamune bu’wa balwishishe mwikele kihebwe, ooo, akia kitshibilo nkifikile ha umune ku kuhīshwa.

¹⁷ Āho su mpa kusola kwa mwanda wa muntu’mune, lufu lubabikele bufumu hadi e; kukila biabia, aba abatambula bikambe bia buntu bwa bisumanga, na kihebwa kia kululama, abakamunu mu muwa, ha umune, Yesu Kidisitu.

¹⁸ Binyibiabia kusola kwa mwanda kwa muntu’mune kubafikile kuhisha kwa bantu boso, biabia anka hamune na ha kululama kwa umune kubafikile kubingishwa kwa muwa kwa bantu boso.

¹⁹ Anka mubaikadile bukolwa bwa muntu’mune bubatemunwa be bungi bu balwishi, ñanka biabia na ha kukokyela kwa muntu’mune, be bungi abakatemunwa balulame.

²⁰ Biabia mukanda-wa-milangilo ubafikile’shi, kusola kwa mwanda kutame; anka ha-ku-batamine kulwisha, buntu bwa bisumanga namu bubakididile kutama bi moo;

²¹ eshi, mubamunyine kulwisha bu nfumu mu lufu, biabia buntu bwa bisumanga abukamuna ku kululama kwa muwa wa ikala-ika, kwi Yesu Kidisitu Nfumwetu.