Bena Loma 12 - KILOMBENO KIHYA KIA NFUMWETU YESU KIDISITU

¹ Binyibiabia anwe bakwetu nenusendela ha lusa lw’Efile-Mukulu’shi, nulubule mbidi yenu bu mulambu autala, uhatulukye, autosh’eshimba di’Efile-Mukulu, wawa nyi mwanda awiuku mashimb’enu kukita.

² Ta nwikalanga kuhwandjikishwa na bahanohansenga; anka nwikale bālulukye ha kwisambula binangu bienu’shi, nutompe akikyeb’eshimba di’Efile-Mukulu, nyi kilumbulukye, kilubilwe, na bushima bwinyi.

³ Mwanda nakula’shi, hanka ha buntu bubampelwe, kwi muntu ese e munkatshi mwenu, ami’shi; Tanwilungulanga’nwe bana bene kukila mwa kulombana kwilungula ooo, anka kwilungula, nwikal’anwilungwila n’eshimba ditūle anka mubenuabidile Efile-Mukulu anwe boso kwi muntu ese, kihimo kia lukuluhilo.

⁴ Mwanda’twe anka mwatudi bekele na biakumbidi bingi bingi ku mbidi yimunenka, na biakumbidi namu ta bi na mufubo umunenka abio bioso, ayoyo.

⁵ Mpamunenka, mwatudi bekele n’atwe benyi, mwa twibafwimine muno, twi mbidi yimunenka mu Kidisitu, n’atwe boso biatudi biakumbidi, au ku mukwabo, au ku mukwabo, atwe bana bene.

⁶ Binyibiabia hakwikala na biabuntu bi halā-halā, mulombene buntu bubetuhelwe, su nkutemuka, tutemukye mulombene kihimo kia lukuluhilo.

⁷ Su mifubo tutwelelele anka ku mifubo yetu; sunga kulambukisha namu, anka ku bulambukishi bwe.

⁸ Sunga kulanga malongo, e namu anka ku kulanga kwe: ahanā ahane musumbule’shimba; akokyeshā bantu ebakokyesha na nkutuhuta; afwilā lusa, afwile na tuseho.

⁹ Kifulo kikale kishī kia bu nsesa. Etongei bia bi bubi; lamatai bia bilumbulukye.

¹⁰ Nwikal’anwe kuminyishena na kifulo kia bu bakwenu; na kwinemekeshena namu, mungi akokyele mukwabo.

¹¹ Mu mifubo tanwikalanga na butuba; nwikale n’eshimba di kibobo, nufubile Nfumwetu ya buhika.

¹² Sehelai mu kutengyela; nwishinkei mu kusabulwa; na mufwaka, kankamanai mu luteko.

¹³ Abilai kwi balamunwe bakishila bia bashī n’abio; nwikale n’eshimba dia kulela bēnyi.

¹⁴ Ehai mwabi kwi abenubingabinga, nwibahe mwabi, tanwelanga miloa.

¹⁵ Sehelai n’aba abasehela, dilai n’aba badidi.

¹⁶ Nwikale n’eshimba dimune di au nyi bi diau anwe boso. Tanutang’eshimba mu bia kwitumbika, anka nutule mashimba kwi bi shī bia ntumbo. Tanwikalanga na binangu bia mwinwe bana bene.

¹⁷ Tanwalushanga muntu bubi dimo, su nanyi su nanyi. Tei mashimba ku bintu bilombane ku meso kwa bantu boso.

¹⁸ Su nkihwandjikile mwanka, biabia nwikale na kufukama na bantu boso.

¹⁹ Anwe bakuminyibwe! tanwiobolanga’nwe bana bene, noo, anka bambalai nsungu, mwanda nkifundweshi; Kōbola nkwande’mi na mwinyi, nankenulubwila, nyi mubakwile Yehowa.

²⁰ Binyibiabia mukushikwe su e na nsala, muhei biakudia; su e na nyota, muhei biakutoma; hakukita bino omushisakena kālo ka makala ku mutwe kwe.

²¹ Tanushindwanga na bubi, anka anwe’nyi shindai bubi ku bilumbulukye.