Bena Loma 1 - KILOMBENO KIHYA KIA NFUMWETU YESU KIDISITU

¹ Paulu mpik’a Yesu Kidisitu, baitanyinwe bu mutumibwa, mulamunwe ku mukāndu-wibuwa w’Efile Mukulu,

² (wabalayile kwibedi kwi batemuki be mu Bifundwe bilamunwe bikishila,)

³ ha mwanda wa Mwan’e Yesu Kidisitu Nfumwetu. Winyi batandjibwe ku twikulo twa Dafidi mwiyile mbidi ye;

⁴ balungwilwe bu Mwan’Efile Mukulu mu katshintshi, anka mulombene Kikudi kia kilamunwe kikishila, ku lulangukilo lwa mu lufu;

⁵ Nyi ank’ako kwadi e kwatubatambwile buntu na kutumibwa, ha mwanda wa kukokyela kwa lukumino munkatshi mwa mīlo yoso, ha mwanda w’eshina die.

⁶ Nyi anka’mo mwanudi’nwe namu nubetanyinwe bu ba Yesu Kidisitu.

⁷ Kwi boso be mu Loma, bakuminyibwe b’Efile Mukulu, betanyinwe bahatuluki-ba-kishila; buntu bwikale nenu na kufukama namu bifikye kw’Efile Mu kulu Shyetu, na kwi Nfumwetu Yesu Kidisitu.

⁸ Kwibedi, natumbula Efile Mukulu ande mu Yesu Kidisitu, ha mwanda w’anwe boso’shi, lukumino lwenu lubalungulwa hosohoso hano ha nsenga,

⁹ Mwanda Efile Mukulu e kamonyi kande, anfubila mu kikudi kiande mu mukāndu-wibuwa wa Mwan’e bia shī ampisha kwinutemuna mu nteko yande mal’uku oso;

¹⁰ hakusendela’mi’shi, hanabangile kalaa haa, ta nkutwa su nankamono luendo bino bibuwa amukyebele eshimba di’Efile Mukulu, nfikye kwakwa kwanudi.

¹¹ Mwanda nadidi kwimonena n’enu’shi, nyi nuhe kia buntu bwa ku Kikudi E Selelee’shi, nukankamane na kukankamana.

¹² N’ako n’amu kusēngibwe n’enu hamune ku lukumino lwetu, lwenu kwandji’mi, lwande kwanudi’nwe.

¹³ Tatai bakwetu, ta nkyeb’anwe nwikale bashi beuke’shi, misusa yibungi nafuna kufika kwanudi (anka nadi mubambibwe) eshi, ’mone bikuba munkatshi mwenu namu, hamunenka na munkatshi mwa bangi Badjentaila.

¹⁴ Nyi na kishio kwi Bangidiki, na kwi Basendji; na kwi basha kalolo, na kwi bashī na kalolo.

¹⁵ Nyi na kakidi kulungula mukāndu-wibuwa kwi’nwe be ku Loma namu.

¹⁶ Mwanda ntshi na būfu’mi ku mukānduwibuwa wa Kidisitu, mwanda’wo ngia katshintshi k’Efile Mukulu ka kihanjilo kwi muntu oso akakumina, kubadila kwi Bayudea na kwi Bangidiki benyi kumune.

¹⁷ Nyi anka’mo mubafumbukile kululama kw’Efile-Mukulu ku lukumino lwa ku lukumino, anka mwakibafundjilwe’shi; balulame abakamono muwa ha lukumino.

¹⁸ Mwanda nsungu y’Efile-Mukulu ngifumbukye kwiilu ha bushī bwin’Efileboso, na ha yishīyilulame ya baniu abashikīla biabinyibinyi hanka mu yishiyilulame;

¹⁹ Nyi ha mwanda w’akia kibeukishwe kw’Efile-Mukulu nkimwekye mwabadi, mwanda Efile-Mukulu nyi bebamwesha’kio.

²⁰ Mwandabintu bie bishī abimwekye ku kihangilo kia hanohasenga mbimwekyelele hatoka, bibashingulwe ku bintu bibahangibwe, nyi katshintshi ke ka ikala-ika, na Bwin’Efile-Mukulu bwe; binyibiabia ta be na mwa kwibalafianya.

²¹ Mwanda habadi beukile Efile-Mukulu ta bamutumbishe bw’Efile-Mukulu, sunga kumutumbula kwinyi, ooo; anka mu binangu biabo abalotakene, n’eshimba diabo dia kutshikama dibafitshishwa fututu.

²² Habadi belungula’shi, twina kalolo, abāluluka bu baha takane,

²³ na kwalula ntumbo y’Efile-Mukulu shīanyangā, bu nkishi mwifwane muntu a kunyanga, na bia tonyi, na bia nyama ya mikolo yinanka, na bia bintu abilandala.

²⁴ Binyibiabia Efile-Mukulu bebalekyelele mu kushūla kwa bishila, tabekitshi ku mbidi yabo abo bana bene bia būfu.

²⁵ Abālulwile bia binyibinyi bi’Efile-Mukulu bubiamadimi, tabalangwile na kufubila kihangibwe kukila Muhangi na mwinyi, e bakwatshibwe mwabi wa ikala-ika. Amena.

²⁶ Nyi ha mwanda uno ubebahanyine Efile-Mukulu ku bia kukyebakyeba kushī kinemo, mwanda bakashi babo benyi abfilulwile kwanka mwa kukitshina bia bu niuntu, ku bingi bia kukutwa kukitshibwa ku bantu.

²⁷ Biabia balume namu anka hamune, hakuleka amukitshinā bantu kwi bakashi, abenyishishe na meso-a-tone, muntu kwi muntu abo bana bene; balume na balume abekitena’bia bishī bihwandjikile na kinemo (anka kiakia kia būfu), abatambwile mwanka munda mwabo bwinyi bwedi bwa kulwisha kwabo bulombene mwanka.

²⁸ Biabahele Efile-Mukulu kwikala mu kiyukilo kiaho, Efile-Mukulu namu bebahene kwishimba dia mpuha, dia kukita’nka’yo myanda yishi yilombane mwanka;

²⁹ dia kuula ndā na yishīyilulame yoso, na lukyebanokyebano, na bubi, na lwīso, na kifita; diule ndā na kiutu, na buntahanyi, na mpaka, na bulamalama, na butshi, na kwisongishena,

³⁰ na twihu, abashikwanyi Efile-Mukulu, basha kahesha, bakwinemeka, bakwīlungula, bahangi ba bintu bibi bihya, basha bukolwa kwi’bo bebatandjile,

³¹ bashī na binangu, batshibi ba bihwano, bashī na mashimba a bu muntu, bana batah’eshimba-kunkuma, bashī na lusa;

³² Baba hakwiuka kimu ki’Efile-Mukulu’shi, abakitā bino, mbalombane lufu; anka’bo ta mbakite bianka abo bana bene, ooo, ank’abakumina mu’ba bantu abakita’bio.