Bena Kolose 3 - KILOMBENO KIHYA KIA NFUMWETU YESU KIDISITU

¹ Binyibiabia su nwibabushwe na Kidisitu, nwikal’anukyebe bintu bi mwiilu, nyi mushāle Kidisitu ku mboko yibalume y’Efile Mukulu.

² Tulai mashimb’enu ku bintu bi mwiilu, kushī ku bintu bi hanohansenga.

³ Mwanda’nwe nwi bafwe, na muwa wenu ngufībwe na Kidisitu mw’Efile Mukulu.

⁴ Ahakamweka Kidisitu e nyi muwa wetu, twambengye anwe namu anukamweka n’e mu ntumbo.

⁵ Biabia nwihei bia ku mbidi yenu bia hanohansenga; kukyebanakyebana, biko bi’eshimba, kifulo kia myanda yibūfu, kusuasua kwa yibubi, malaka namu, nyi anka lulangwilo lwa mankishi.

⁶ Ha yino myanda nyi habafikila nsungu y’Efile Mukulu ha bana babasha bukolwa.

⁷ Nyi mwanubatambukile namu kala hanubadi anukitshī’yi myanda.

⁸ Anka binobino anwe namu hulai (yino) yoso; kufunafuna, bukyelo, bubi, kukāna mulomo, mīsambo ya būfu mu kanwa mwenu.

⁹ Tanwidimbenanga, mwanda nubahu kuhula winyi muntu a kala na bikitshino bie;

¹⁰ nubahu namu kufwala (muntu) muhya, winyi musangudibwe muhya mu kiukilo kikumbane mwiyile kihwandjikisho ki’awa bamuhangile:

¹¹ amo tamwi sunga mu’ba Ngidiki sunga mu bwina Yuda, sunga mukisale, sunga mushī mukisale, sunga musendji, sunga mwina Syteana, sunga mbuhika sunga mu buana, anka Kidisitu e nyi’mbioso na mu biosobioso.

¹² Binyibiabia fwalai hamune bu basangudibwe b’Efile Mukulu, balamunwe-be-kishila na bafudibwe, (fwalai) eshimba dia lusa, kasendeleshi kwihelesha kw’eshimba, kuhohela, lwishinko;

¹³ kwihuñanyishena, na kwilekyeshena. Su (muntu) e na kimu kwi mungi, anka hamune bu mubenulekyele Kidisitu, anwe namu nukite.

¹⁴ Kunundu kwa bintu bioso (nwikale) na kifulo, akio nyi mwanyo wa kikumbesho ki’eshimba.

¹⁵ Kufukama kwa Kidisitu kwinumune ’mashitnb’enu, nyi kwanubaitanyinwe mu mbidi yimune, nwikale namu na lutumbo.

¹⁶ (Bibuwai) Mwanda wa Kidisitu ubombele mwanudi bikata mu binangu bioso, kwilambukishena na kwilañena mu ñono ya milangwilo na ñono (yingi) ya Kikudi-E-Selelee, nuyimbi na bumuntu mu mashimb’enu kwi Nfumwetu.

¹⁷ Bioso bianukitshi su mwīsambo su mu bikitshino, nukite bioso mwishina dia Nfumwetu Yesu, na kutumbula Efile Mukulu Yaiya hadi e.

¹⁸ Anwe bakashi nwikale kukokyela balunda benu, mwaudi ulombene mwi Nfumwetu.

¹⁹ (Anwe) balume, nwikala na bakashi benu kifulo, tanwikalanga n’abo būlo.

²⁰ (Anwe) bana, nwikale kukokyela banambutwile benu mu bintu bioso, mwanda uno nyi ngwa kutosh’eshimba dia Nfumwetu.

²¹ (Anwe) bayaiya, tanukolomonanga bana benu, tala bekala bōñame.

²² (Anwe) bahika (namu) nwikale kukokyela banfumwenu mu bintu bioso mwiyile bia mbidi, kushī kufubila’nka ku meso kwabo, hamune bwabakyebe kutosha mashimb’a bantu, ooo, anka (kufuba) n’eshimba dimune dia kutshina Nfumwetu.

²³ Mu bioso bianukitshi nukite’bio n’eshimba dishima anka hamune’nka bu kwi Nfumwetu, kushī bu kwi bantu ooo.

²⁴ Hakwiuka’shi, anka kwi Nfumwetu nyi kwanukatambula bwedi bwa buhyanyi; mwanda’nwe anufubila Nfumwetu Kidisitu na lunfubila.

²⁵ Anka e ashūla kishila akatambula ha mwanda wa kushūla kwe kwabakitshine, mwanda takwi ūshi nyi’u, ooo.