Bena Fidihai 4 - KILOMBENO KIHYA KIA NFUMWETU YESU KIDISITU

¹ Binyibiabia anwe bakwetu bakifulo n’abadibibwa, muloo wande, na kilongo kiande kia mōbeshi, nukankamanei mu Nfumwetu anwe bakifulo.

² Nasendela Eudiasa na Shyntyike namu hamune, ami’shi, bekale n’eshimba hamune mwi Nfumwetu.

³ Nakusendel’obe namu mukwetu a mu kikumbo kimune’shi, okwashie aba bana bakashi abafubile n’ami mu mukāndu-wibuwa, na Kelementa namu, na bakwabo bafubi n’ami, be na mashina’bo mu mukanda wa muwa.

⁴ Sehelai mwi Nfumwetu mafuku oso, dimonyi n’akula’shi: Sehelai.

⁵ Kahuñanyi kenu keukibwe kwi bantu boso.

⁶ Tanwikalanga na kukalakala su nkwa kinyi su nkwa kinyi, anka mu bintu bioso mu nteko na mu kwiyayila na mu lutumbu, nteko yenu yiukibwe kw’Efile Mukulu.

⁷ Biabia kufukama kw’Efile Mukulu akukilā binangu bioso, akukalama mashimba na binangu bienu mu Kidisitu Yesu.

⁸ Kunfudilo, (anwe) bakwetu abia bintu bioso mbia binyibinyi bioso binemekwe kinemo, bioso bilulame, bioso biselelee, bioso bilumbulukye, bioso bitumbishibwe bibuwa, su kwi buwa bukambe, su kwi ntumbo, nangushenai yino myanda.

⁹ Yinyi myanda yianwibāmbule na yianubatambwile, na yianubahushishe, na yianubahu kumona mwimi, kitai’yo, biabia Efile Mukulu a kufukama akekala n’enu.

¹⁰ Anka nasehelele bikata mwi Nfumwetu ’shi, binobino kunfudilo lubasu lwenu ha mwanda wande lubabasuka dimonyi; nyi mwinyi mwa nubadi na kunangushena, anka nubakutshilwe mwanudia kukitshina.

¹¹ Tafiakul’ami ha mwanda wa lukalo, ooo, mwanda tampwile kwambula’shi, mu mwikelo wande woso, su mu kinyi su mu kinyi, nyi na muloo.

¹² Nemūbile kufukulwa, nemūbile namu’nyi kufwimishwa. Kosokoso na mu bioso nyi mulambukishwe na mwakwīkwita, na mwakuhushisha nsala, na mwakufwimishwa, na mwakukutshilwa’bio.

¹³ Nyi na bukome bwa kukita bintu bioso kwi winyi mumpebo, nyi Kidisitu.

¹⁴ Anka nubakitshine bibuwa hakulombana nami mu bishiotshi biande.

¹⁵ A biabia anwe bena Fidihai anwiuku namu’shi, kumbangilo kwa mukāndu-wibuwa, hankatukile ku Masedonya, takubadi kikoñeno ki’Efile kilombane n’ami mu mwanda wa kuhana na kutambula, ank’anwē’ba.

¹⁶ Mwanda mwinyi mu Tesalonyika mwanubantumīne binadi n’abio lukalo, kukila mususa umune.

¹⁷ Tamwanda wa kwamba’shi, nankyebe buntu, ooo; anka nankyebe kikuba kikenufwimishe ha mwanda wenu.

¹⁸ Anka’mi nemukumbashe bioso mpaa na kufwima; nemwikute binatambwile kwi Ehafolodetusa bintu bibafikile kwanudi, bī’shiko bi mahembwe alumbulukye, bla kukuhula mashimba bikuminyibwa (bimoo,) biakusehesh’eshimba di’Efile Mukulu.

¹⁹ Anka Efile Mukulu ande akenuha bioso bia nwi n’abio lukalo, mulombene buheta bwe bwa ntumbo mu Kidisitu Yesu.

²⁰ Binyibiabia kw’Efile Mukulu etu na Yaiy’etu, ntumbo yikale kwadi mpaa na ikala-ika. Amena.

²¹ Nyimwinei balamunwe bakishila boso mu Kidisitu Yesu. Bakwetu bandji n’abo abenwimuna.

²² Balamunwebakishila boso abenwimuna (namu,) n’abo ba mu nshibo ya Kesala abakishakisha (kwinwimuna.)

²³ Bumuntu bwa Nfumwetu Yesu Kidisitu bwikale n’anwe boso. Amena.