Bena Efisesa 6 - KILOMBENO KIHYA KIA NFUMWETU YESU KIDISITU

¹ Bana (namu) kokyelai banambutwile benu mu Nfumwetu, mwand’uno nyi ntwaudi ulombene.

² Nemeka shobe na nyin’ohe unou nyi mulangilo wa kwibedi wi na mulayilo’shi,

³ Bibuwa abikanemena kodi, biabia namu obe okekala na muwa bihwa bi bungi hanohansenga.

⁴ N’anwe bayiaya (namu) tanukolomonanga bana benuku bukyelo, anka kwibakudisha mwihaso na mwilango bia Nfumwetu.

⁵ Bahika (namu) kokyelai abo be bu banfumwenu mwiyile mbidi, na moo na kususa, n’eshimba dienu dimune, hamune na kwi Kidisitu,

⁶ kushī ha mufubo wa kumonyibwa ku meso, bu baseheshi ba mashimba a bantu, ooo, anka hamune bahika ba Kidisitu abakita amukyebele Efile n’eshimba ditūle,

⁷ ku-fuba mufubo n’eshimba dibuwa hamune kwi Nfumwetu, kushī bu kwi bantu, ooo.

⁸ Hakwiuka’shi, bioso bilumbulukye abikita bantu au hē au hē, nyi anka kia kamono (dimo) kwi Nfumwetu, sunga e mpika sunga e muluñantu.

⁹ N’anwe banfumu, nwibakitshine namu bilombane, na kuhufianya mu milayilo, hakwiuka’shi, Nfumwenu’nwe boso namu e mwiilu; e namu te na’shi, au nyiū ooo.

¹⁰ Kunfudilo, bakwetu, kankamanai mu Nfumwetu, na mu bukome bw’a ntshitshiba ye.

¹¹ Fwalai ngabo yoso y’Efile Mukulu ya ngoshi’shi, numone mwa kwimena ku bia bibembo bia Sata-na.

¹² Mwanda kwishindena kwetu tankwa ku mbidi na mase, ooo, anka nkwa ku bakata be moo, na kwi basha matalwa, na kwi batontshi ba mufito wa hanohansenga, na kwi bikudi bibi bia mwiilu.

¹³ Binyibiabia eboshei ngabo yoso y’Efile Mukulu’shi, nwiukye mwa kushisamena mwifuku dia bubi, na ha kuhwa kukita bioso, shisamanai yanka na kushisamana.

¹⁴ Binyibiabia imanai na bifuka bienu bianyibwe nshiho ya biabinyibinyi, na ha kuhwa kufwala ngabo ya kulama kiadi ya kululama kw’eshimba;

¹⁵ na ngwa yenu yifwadikwe yimēne mukāndu-wibuwa wa kufukama.

¹⁶ Kukila bioso nkuata ngabo ya lukuluhilo, n’ayo yanwiuku mwa kushikīla mikyetwe yoso ya kālo ya winyi mubi

¹⁷ Nutambule namu kia kulama mutwe kia kihandjilo, na luhete lwa kalembwe lwa Kikudi (E-Selelee) alo lwinyi ndwamwanda w’Efile Mukulu.

¹⁸ Nutekye bukyelebukyele na nteko yoso na lwiyayo mu Kikudi (E Selelee,) nutengyele kwanka na mufwaka woso na lwiyayo ha mwanda wa balamunwe-bakishila boso;

¹⁹ na kwandjimi’shi, eyi dia kwakula adikampebwa biandjia kubūla mukanwa mwande na kwikankamika, ha mwanda wa kwiukisha kifībwe kia mukāndu wibuwa,

²⁰ wandji n’ao nyi mukyendji wa mu nkano’shi, nakwile mwanka na kwikankamika, mwaubampwandjikile kwakula, mwa nkitshinā. Tyikikusa mukwetu mutomibwe kifulo.

²¹ Anka’shi, nwiukye namu mwandji mwikēle, na na mufubi a kishima mwi Nfumwetu, akenūkisha myanda yoso,

²² n’e anenutumina kwanudi ha mwanda’nka uno’shi, bianudia kwiuka mwatudi bekele, biadia kwinusambisha namu mashimb’enu.

²³ Kufukama kwikale kwi bakwetu (ba mu Kidisitu) na kifulo ki na lukuluhilo, kwi Efile Mukulu Yaiya, na kwi Nfumwetu Yesu Kidisitu.

²⁴ Bu-muntu bwikale n’abo boso be na Nfumwetu Yesu Kidisitu kifulo kia kishima. Amena.