Bena Efisesa 2 - KILOMBENO KIHYA KIA NFUMWETU YESU KIDISITU

¹ N’anwe nubadi bafwe mu kusola kwa myanda na milwisho:

² nyi mwanubatambukilanga kwibedi, bu amuyilā bahanohansenga, muyile mutontshi sha matalwa a luwa, kinyi kikudi akifubā mu bana bashībakokyele;

³ nyi mwatubādi bekele namu, atwe boso kwibedi mu nyikashi ya ngabiābi yetu, nubadi anulondo mwamukyebelā bia mbidi, na bia binangu; tubadi ku butandjilo namu bana ba nsungu, hamune na bangi.

⁴ Anka Efile Mukulu e na buheta mu lusa, ha mwanda wa kifulo kie kikata ki moo, kiabetufūle n’akio,

⁵ sunga mpatubadi bafwe mu milwisho, betusangwile hamunena Kidisitu (nyiha bu-muntu ha nuhashibwā),

⁶ betubushishe hamune na kwitushadika hamune n’e amwa mwiilu mu Kidisitu Yesu’shi:

⁷ Mu bihindji bianakafikye akaleshe buheta bukilekile bwa bu-muntu bwe mu kalolo ke’ kwatudi’twe mu Kidisitu Yesu.

⁸ Mwanda nyi ku bumuntu bw’Efile kwanuhandjilā ha lukumino; n’alo lwinyi lushī lwa kwinwe bana bene, ooo, (nyi) mbuntu bw’Efile Mukulu:

⁹ kushī ha bikitshino, ooo, tala (muntu) akelungula.

¹⁰ Mwanda’twe twi bifubwanga, bihangibwe mu Kidisitu Yesu ku bikitshino bilumbulukye bibalumbulwile Efile Mukulu kwibedi’shi, tutambukile mwanka.

¹¹ Binyibiabia nangushenaī, kalakala anwe nubadi Badjentaila mu mbidi, abatemunwanga bu bashī basalwe kwi baba abatemunwanga bu basalwe ba ku mbidi kukitshibwe ku maasa’shi:

¹² ku kiakia kihindji kianubadi bashī na Kidisitu, nubadi bana beūmbo ku kulonama kwa Isalele, na bu benyi ku bilombeno bia mulayilo (w’Efile) bashī na lukuluhilo, na bisumanga Efile Mukulu hanohansenga.

¹³ Anka binobino mu Kidisitu Yesu, anwe nubadi kulakula kwibedi, nwibafishibwe hehi, ku mase a Kidisitu.

¹⁴ Mwanda e nyi kufukama kwetu babungile bibidi bu kimune, babumbwile lubumbu lwa (hankatshi hetu,)

¹⁵ bashimangishe mu mbidi ye kilamunusheno, nyi mukanda-wa-bishila wa milangilo, ahangūle babidi bekale bu muntu umune muhya, mwadi e na mwinyi ebalombashe anka hamune.

¹⁶ Mwadia kulombesha bubidi bwabo mu mbidi yimune kw’Efile Mukulu ku nkulusu, mwanda baihayile kilamunusheno kwanka.

¹⁷ E bafikile, alungula mukāndu-wibuwa wa kufukama kwi’nwe abadi kula kwi moo, na kwi (babadi) hehi

¹⁸ Mwanda hadi e atwe bubidi bwetu, twi na kitwelelo kwi Yaiya mu Kikudi-(E-Selelee.)

¹⁹ Biabia tanukī bu benyi na; bana ba maūmbo, ooo, anka tanudi banahabo na bahatulwebakishila, na ba mu luhoho lw’Efile Mukulu.

²⁰ Nwibakibwe ha kibangilo kia batumibwa na batemuki, Yesu Kidisitu na mwinyi nyī’bwe dikilekile di’ehaka.

²¹ Mwadi e nyī mwikwatenene kihidi kioso kiatēma bibuwa, akienda akikulanga, takidi bu nshibo y’Efile yilamunwe yikishila mu Nfumwetu.

²² Mwadi e anwe namu nwibakibwenene kwikala bu kibombelelo ki’Efile Mukulu ku Kikudi-(E-Selelee.)