Bena Bahebelu 8 - KILOMBENO KIHYA KIA NFUMWETU YESU KIDISITU1 Biabia kihatulwilo kiatubākwile (kino nyi) kikumbesho; Atwe twi na tshiite-mwakwidi-mukata e biabia, tahwile kushala ku mboko yibalume ya luhun’a-nsulu lwa winyi mukilekile kinemo e mwiilu; 2 mufubi e Efile a bintu bihatulwebikishila, n’a kibombelelo ki’Efile kia binyibinyi, kibaibakile Efile Mukulu, tambantu’bo, ooo. 3 Mwanda batshiite-ba-kwidi-bakata boso mbasangwilwe kulambula milambu na bitahilo; biabia uno namu wadi na’o ngwa kwikala na bia kulambula. 4 Mwanda su badi hano hansenga, (biabia) tabadia kwikala tshiite-mwakwidi sunga mpahelehela, mwanda bangi batshiite-bakwidi be kwanka abalambulā milambu mwiyile mukanda-wa-bishila: 5 abafubila kihwandjikisho na mwesheshe wa bintu bia mwiilu, mubalangilwe Mosesa kw’Efile Mukulu, habadi tadi akyebe kukita kibombelelo ki’Efile; mwanda bakwile’shi: Tala biokitshi bintu bioso mwiyile kihwandjikisho kibakuleshwe mu ngulu. 6 Anka binobino batambwile bufubi bw’Efile bukilekile buwa, ha mwanda w’e namu nyi musengi a kilombeno kikilekile kulumbuluka, yishidikwe ku milayilo yikilekile buwa. 7 Mwanda su kinyi kilombeno kia kwibedi kibadi kishī kitohekwe, (biabia) tahabadi akukyebwa kia kabidi, ooo,. 8 Anka ha kumona ya kutohekwa kwabadi, Yehowa bakwile’shi: Talai, mafuku anakafikye hankakumbasha kilombeno kihya na ba ku nshibo ya Bena Isalele, na ba ku nshibo ya Yuda: 9 kushī mwiyile kilombeno kinalombene na bashabo-kulu mu di’efuku dinebakwete ku mboko, nebakunkusha kutuka n’abo mu nsenga ya Ndjihitu; mwanda tambayididile na kilombeno kiande, ami namu nebatondele; nyi mubākwidile Yehowa. 10 Mwanda kino nyi nkilombeno kiankalombana na ba ku nshibo ya Isalele ha kukila aa mafuku; nyi mubākwidile Yehowa: Nankatulu bishila biande mu binangu biabo, na kwibifunda mu mashimb’abo; n’ami nankebekēla bw’Efile Mukulu abo, abo namu banakekale kwandji bu bantu bande. 11 Tabakelambukishena muntu na mwikashi n’e, n’ese muntu mukwabo’shi: Nwiukye Yehowa, ooo; mwanda boso abakañuku, kubangila kwi bakilekile buhela mpaa na kwi bakilekile bukata. 12 Mwanda nankekala na lusa ku kushikululama kwabo, na milwisho, na kushula kwabo kwa bishila tankebinangushena dimonyi, ooo. 13 Hakwakula’shi: Kilombeno kihya, nyi habālulwile kia kwibedi, tankikulu. Bino akiendā’ kikulanga na kununu’ha, takidi ha kushimina. |
© 1952 Alliance Biblique de la République Démocratique du Congo