Bena Bahebelu 7 - KILOMBENO KIHYA KIA NFUMWETU YESU KIDISITU

¹ Mwanda uno Meletshīsedeka, nfumu a Salema, tshiitemwakwidi e Efile Mukulu mukilekile bukata, bafumankene n’Abalahama hakwaluka ku kutukisha kwa banfumu, bamuhele mwabi.

² Abalahama namu bamwabile kia kushikisha ekumi mu bintu bioso; Kuhatula kwa kwibedi (kweshina die) nyi Nfumu a kululama, dimo Nfumu a Salema, kuhatula nyi nkwamba’shi: Nfumu a kufukama;

³ shī na nshye, na nyina, shī na ku musuku, sunga mbangilo a mafuku, sunga kunfudilo kwa muwa; anka bahwandjikishwe bu Mwan’Efile, e ashala tshiite-mwakwidi mpaa na kwikala-ika.

⁴ Bino nuhangidishe mwadi mwikēle bukata, bibahelwe kwi nshyetu-kulu Abalahama kia kushikisha ekumi kia bihaulwe na misungi;

⁵ na binyibinyi aba be ku bana ba Lefi abahebwā mufubo wa butshiite-mwakwidi, be na mulangilo wa kuata bia kushikishe ekumi kwi bantu ntulombene mukanda wabishila, kuhatula’shi, nyi nkwi bakwabo, sunga abatukile ku miongo ya Abalahama:

⁶ anka e nga musuku ushī ubadikwe kwi’bo batambwile biakushikisha ekumi kwi Abalahama, bahele mwabi kwi’wa badi na milayilo.

⁷ Takwi mpaka, muntu’hela bahebwa mwabi kwi mumukile bukata;

⁸ na binyibinyi hano bantu abafwiyā abatambula bia kushikisha ekumi, ank’akwa yawa atemunwa’shi: Nyi atala.

⁹ Biabia atwiuku mwa kwakula’shi: Lefi abalambulwa bia kushikisha ekumi, e namu, balambudile mu Abalahama bia kushikisha ekumi.

¹⁰ Mwanda e badi ki ku miongo ya nshye habafumankene na Meletshisedeka.

¹¹ Binyibiabia su mukumbeno w’eshimba ubadi ku butshiite-mwakwidi bwa Lefi, (nyi habatambudile bantu mukandawa-bishila), a nkinyi kibadi lukalo lukile lwa mungi tshiitemwakwidi kwibwaa a mulombene mulongo wa Meletshisedeka, na shī mutemunwe bu a ku mulongo wa Alona?

¹² Mwanda butshiite mwakwidi hakushintushena wabudi n’ao ngwa kushintushena namu na mukanda-wa-bishila.

¹³ Mwanda e mukumibwe na yino myanda ayisambilwa, ngakingi kisaka, kishyakituku muntu bahelwe mufubo wa ku kitala kia bitahilo.

¹⁴ Mwanda taumwekyele hatoka’shi, Nfumwetu batukile ku Yuda, ha mwanda wa kino kisaka Mosesa tamwakule mwanda wa butshiite-mwakwidi, ooo.

¹⁵ Mwanda ubakishakisha kumweka hatoka’shi, kubatuku mungi tshiitemwakwidi mwifwane Meletshisedeka,

¹⁶ e bakitshinwe, mu shī mwiyile mulangilo wa ku mbidi, ooo, anka mwiyile bukome bwa muwa ushyauhu.

¹⁷ Mwanda ubamutemunyinwe bu kamonyi’shi: Obe we tshiite-mwakwidi a ikala-ika mu mulongo wa Meletshisedeka.

¹⁸ Mwanda mbinyibinyi kwi kukūmba kwa mukanda wa milangilo ha mwanda wa butūba bwao na kutwa kwa kwiumwena kintu.

¹⁹ (Mwanda mukanda-wa-bishila taubafishanga kukumbasha kintu, sunga nkimune), anka kufisha kwa lutengyelo lukile (lubakitshishe biabia), kwa ludi nyi kwatwifubwila hehi kw’Efile Mukulu.

²⁰ Na biosobi tabakitanga kushī mutshiho: (

²¹ Mwanda’ba batshiite-bakwidi abakitshishwe kushī mutshiho; ank’e na mutshiho kwadi bamulungwile’shi: Yehowa betshihile, takāluluka’shi: Obe we tshiite-mwakwidi a ikala-ika mu mu’ongo wa Meletshisedeka:)

²² Biabia Yesu bekele bu kiee kia kilombeno kikilekile buwa.

²³ N’abo babadi butshiite-mwakwidi bebungi, mwanda wa lufu lubebakutshishwe kwikadidila mwanka.

²⁴ Ank’e uno, ha mwanda e mwiyididile ikala-ika, e na butshiite-mwakwidi bushyabwalulukā.

²⁵ Binyibiabia euku kwibahasha mpaa na ha nfudilo abefubula kw’Efile Mukulu kwadi, mwanda e nyi atala ikala-ika mu kwibasengyela.

²⁶ Biabianyi bibadi tshiite-mwakwidi-mukata ha mwanda w’atwe, muhatulwe e-kishila, shī na mwanda, shī na biko bi’eshimba, mulamunwe ku balwishi, tadi mukile mailu bukata;

²⁷ e te na lukalo kulambula bitahilo kwifuku n’efuku, bu ba batshiite-bakwidi-bakata, kwibedi kwamilwishoye, henyihaha tangia bantu, ooo. Mwandakino bekikitshine ntususa umune mpaa, habelambwil’e na mwinyi.

²⁸ Mwanda mukandawa-bishila ausangulā bantu batuba tambatshiite-bakwidi-bakata; anka mwanda wamutshiho, ubalondele mukanda wabishila, wasangula Mwana e mukumbanyinyine kwikala-ika.