Bena Bahebelu 3 - KILOMBENO KIHYA KIA NFUMWETU YESU KIDISITU

¹ Binyibiabia bakwetu bahatulwe-bekishila, bebungile n’etu ba lwitanyino lwa mwiilu, hangidishai Mutumibwa, Tshiitemwakwidi mukata a lukumino lwetu, ta ng’Yesu;

² a kishima kwi’wa bamusangwile, nyi mubayikadile Mosesa mu nshibo y’Efile Mukulu.

³ Mwanda e batemunyine kuhwandjikila ntumbo yikilekile ya Mosesa, ank’amwikelā mwibaki a nshibo mukile nshibo kinemo,

⁴ mwanda mashibo oso e na bebaki bao; anka baibakile bintu bioso ny’Efile Mukulu.

⁵ Na Mosesa badi na kishima binyibinyi mu nshibo y’Efile Mukulu yoso bu mufubi (a mu nshibo) aho nyi mpa bu kamonyi ka yaya myanda yibadi yakwakwilwa kunyima.

⁶ Anka Kidisitu nyi Mwana-mulume kunundu kwa nshibo ye; yinyi nshibonyin’atwe, su atulamata hoo ku kukankamana (kwetu) na kutumbisha kwa lutengyelo anka hoo mpaa na kunfudilo.

⁷ Binyibiabia (mubakudile Kikudi-E-Selelee’shi: Lelo, su anuhusha eyi di’e,

⁸ tanukomeshanga mashimb’enu hamune bu mu (diadia) kukolomonwa mwifuku dia kutompibwa mu kabaka,

⁹ Mubantompele banshyenu, nebashishishe, abamwene bikitshino biande bihwa makumi ananka.

¹⁰ Biabia nadi akolomonwa na kiakia kihungilo’shi: Abalubā mafuku oso ’mashimb’abo; anka tababakuminyine bihikwa biande.

¹¹ Biabia natshihile mu nsungu yande, ’shi: Su abakatwele mu kikisho kiande.)

¹² Dimukai bakwetu, tala kwekala munda mwa umune enu eshimba dibi dishyadikumina, dia kutombokyela kw’Efile Mukulu atala.

¹³ Anka nwilane kwifuku n’efuku, hadikia ditemunwa bu lelo; tala kwekala umun’enu mukomeshwe eshimba ha kōngolwa ku milwisho.

¹⁴ Mwanda’twe tatudi bebungile na Kidisitu, su atulamata ku mbangilo ya kwiukidila kwetu hoo na ku nfudilo:

¹⁵ Henyi hakudīlwe’shi: Lelo, su anuhusha eyi di’e, tanukomeshanga mashimb’enu hamune bu mu (diadia) kukolomonwa.

¹⁶ Mwanda, a mbanyi abakolomwene ha kuhusha? A tambaba boso abatukile kwi Ndjihitu na Mosesa?

¹⁷ Abafitshishwe eshimba bihwa makumi ananka na banyi? A tambaba abasōle myanda, binyi bitanda bibahōne mu kabāka?

¹⁸ A nku banyi kubatshihile’shi: tabakatwele mu kikisho kiande, tañanka kwi’ba bashī na kukumina?

¹⁹ Biabia atumono’shi: Abakutshilwe kutwela ha mwanda wa kushīkukumina.