Bena Bahebelu 13 - KILOMBENO KIHYA KIA NFUMWETU YESU KIDISITU

¹ Kifulo kia bana na bana kiyididila,

² tanuhuñanyanga kulela benyi, mwanda kwinyi’ko nyi kubalēle bamo bamwikeilu babashī bashingule.

³ Nangushenai baba be mu nkano, hamune bu’nwe bedibwe n’abo. N’abo (namu) abafwambuka mu bishiotshi, hamunenka bu’nwe namu nukianka mu bia mbidi.

⁴ Ebambo dinemekwe kwi boso, na lusala lushī lwa kushula kishila, anka basha lusandji na bulalelale Efile Mukulu akebatshibila kimu.

⁵ Nyikashi ya muwa wenu yikale yishī na lwabi lwa kwābīla mono, nwifukamishe mu’bia bintu nwi n’abio: mwanda e bakwile’shi: Ami tankakulekye, tankakufutala sunga mpahelehela,

⁶ Biabia twibasumine kwamba’shi: Yehowa nyi mukwashi ande, tankatshinyi moo ku’kia akikankitshina muntu, ooo.

⁷ Nangushenei bimankinda bienu bibenulungwile Mwanda w’Efile Mukulu; nwibelekeshei lukumino lwabo, nuhangidishei kunfudilo kwa nyikashi yabo.

⁸ Yesu Kidisitu e hamune maloba, na lelo, mpaa na kwikala-ika.

⁹ Tanutwadilwanga kosokoso na ndambukisho ya bihaso na bihaso yi bingi. Mwanda wibuwa’shi, eshimba dikankamikwe na bu-muntu (bw’Efile;) dishi na bidibwa bishyabimwenangā’bo abebilonda, ooo.

¹⁰ Atwe twi na kishikilo kia bitahilo; ku’kio abafubā ku kibombelelo-ki’Efile tabe na matalwa kudia bi’anka.

¹¹ Mwanda mbidi y’aya nyama, mase ayo abafishwanga kwi tshiite-mwakwidi mukata mu kibombelelo ki’Efile-ki-kishila ha mwanda wa milwisho, yibashīkwanga hasha ha kitulo kia mahema.

¹² Binyibiabia Yesu namu bafwambukile hasha ha kibelo, mwadia kulamuna bantu selelee na mas’ē na mwinyi.

¹³ Biabia tutukei kwadi, hasha ha kitulo kia mahema, na kukankamana kwa mu kusabulwa kwe.

¹⁴ Mwanda tatwi na kibalo akishadidila hano, anka atutengyela kinyi akikafiki.

¹⁵ Henyihaha hadi e tulambule kitahilo kia kulangwila kwi Efile Mukulu bukyelebukyele, kuhatula nyi nkwamba’shi, bikuba bia milomo ya kwisokola kwishina die.

¹⁶ Anka kukita bibuwa na kuhana biabuntu, binwilwanga’bio; mwanda mu bitahilo bi biabia nyi amusehela Efile Mukulu.

¹⁷ Kokelai bimankinda bienu, na kwibabofwila; mwanda’bo abatengyelā ku mashimb’enu, bu baba abakyebe mwa kulubwila myanda; eshi, bebikite na muloo, kushī na katshima-munda, mwanda mu kenyi’ko tanukamwenā’mo, ooo.

¹⁸ Nwitutekelei, mwanda twibasumine’shi, twi n’eshimbadia munda dibuwa, mu bintu bioso twikale n’eshimba dia mwi yile nyikashi yetu biya.

¹⁹ Anka nakamba kwinusendela kukita biabia’shi, nkālushibwe kwanudi bikilekile lubilo.

²⁰ Binyibiabia Efile Mukulu a kufukama bālwishe ku lufu nfumwetu Yesu, winyi mumunyi mukata amikoko, ku mase a kilombeno kia ikala-ika,

²¹ enukumbashe mu myanda yoso yibuwa ya kukita amukyebela eshimba die, na kukita mwanudi’nwe akia kia kusangulusha meso e, mu Yesu Kidisitu; kwadi e, nyi kwa kwikala ntumbo ya ikala-ika. Amena.

²² Nenusendela’nwe bakwetu, nukumine mwanda w’elango, mwanda nenufundjila mukanda mu bishima bihela.

²³ Nwiukei’shi, mukwetu Temote e muhosolwe; su afiki ahakidi kahindji, nankenumono.

²⁴ Nyimwinei bimankinda bienu bioso, na balamunwe bekishila boso, Be ku (Italie) abenwimuna.

²⁵ Bu-muntu bwikale n’anwe boso. Amena.