Bena Bahebelu 1 - KILOMBENO KIHYA KIA NFUMWETU YESU KIDISITU

¹ Efile Mukulu bakwile kwi bayaiya ba kala, mu bihaso na bihaso, mu bihindji na bihindji mu batemuki,

² e mu ano mafuku a kunfudilo bākwile kwatudi mu Mwan’e, winyi abasangwile bu mpyanyi a bintu bioso, kwadi e namu nyi kubahangilwe hanohansenga hoso,

³ e biadi mbadibadi ya ntumbo ye, na nkyebukilo yi’anka hamune yi a na mwinyi, na kwikasha bintu bioso ku bishima bibakwilwe mu bukome bwe, habahwile e na mwinyi kutosha milwisho yetu, bashalele ku mboko yibalume ya mukata mukilekile a’mwa mwiilu;

⁴ ha kwikashibwa bu mukilekile bamwikeilu, bahyana eshina dibakile’bo kulumbuluka.

⁵ A nku kihindji kinyi kwa tabākwile kwi sunga ngumune a bamwikeilu’shi: Obe we Mwan’ande, lelo uno nyi dianakutanda? sunga mpangi shi: Ami uno nakekala kwadi bu Nshyē, n’e (namu) akekale kwandji’mi bu ande mwana?

⁶ Dimonyi, hakufwisha Mwan’e a mbedi hanohansenga, amba’shi: Bamwikeilu boso bamulangwile;

⁷ na ha mwanda wa bamwikeilu amba’shi; e bekeshe bamwikeilu be bu bikudi, na bafubi be bwidimi dia kālo.

⁸ Anka ākula wa Mwana’shi: Obe Efile Mukulu, luhun’a-nsulu lobe ndwa ikala-ika; elanga dia bufuntu bobe nyi elanga dia kululama.

⁹ Wemufule kululama kit’ulo, oshikwa bubi, binyibiabia Efile Mukulu, Efile Mukulu obe, bahu kukubikasah na mwimu wa kusangala ukile bakwenu.

¹⁰ Dingi’shi: Obe Yehowa, ha mbangilo botudile kibangilo kia hanohansenga, na mailu e mifubo ya maas’obe:

¹¹ Abio bianakalwile; anka’obe okashala, na bino bioso bianakanunuhe bu kilamba;

¹² n’obe onokebifungye bu kinkutu, n’abio bianakālulwe: ank’obe we hamune, na bihwa biobe tabianakafudile.

¹³ Anka ha kihindji kinyi kibākwile kwi umune a bamwikeilu’shi: Shala ku mboko yande yibalume mpaa na hankālula beshikwene n’obe tankitulo kia ngwa yobe?

¹⁴ Abo boso tambikudi bia mulubo, babatuminwe kufubilā’ba abakekala bampianyi ba kihandjilo su?