ରୋମିୟ 8 - ମାପୁରୁଦି ସତ୍ ବାକ୍ୟ ପୁନି ନିୟମ୍ଆତ୍ମାଦାନ୍ ଜିବନ୍ 1 ଏମେକାର୍ କ୍ରିସ୍ତ ଜିସୁଦି ୱାଲେ ମିସାଜି ଜିନାର୍, ୱାରିଙ୍ଗ୍ଁ ମାରି ଦଣ୍ତ୍ ସିଲେତ୍ । 2 ପବିତ୍ରଆତ୍ମା ଆମା ନିୟମ୍ତାନ୍ ମାଙ୍ଗିଁ କ୍ରିସ୍ତ ଜିସୁଦି ୱାଲେ ମିସା କିଜି ନିଜେଦି ଜିବନ୍ ସିତାମାନାନ୍, ଆବେଣାନ୍ ମାଡ୍ ପାପ୍ ନି ସାନି ନିୟମ୍ତାନ୍ ମୁକ୍ଡ଼ାତି ମାନିକା । 3 ଇୟା ଲୋକା ଗୁଣ୍ ୱିଜୁ ଲିଡ଼ଲାଡ଼ା ଉଣ୍ତିଙ୍ଗ୍ଁ ମସା ସିତିମାନି ନିୟମ୍ ଆମାକା କିଦେଙ୍ଗ୍ଁ ଆଟ୍ଏତାତ୍, ମାପୁରୁ ଆକା କିତାମାନାନ୍ । ଲୋକା ଜିବନ୍ତୁ ପାପ୍ତିଙ୍ଗ୍ଁ ନାସ୍ଟୁ କିଦେଙ୍ଗ୍ଁ ଇଜି ୱାନ୍ ନିଜେଦି ମାରିସିଙ୍ଗ୍ଁ ପାପି ଲୋକୁ ୱାଜା ପକ୍ତାନ୍ ମାରି କ୍ରିସ୍ତ ଜିସୁ ପାପ୍ତି ସାକ୍ତି ନାସ୍ଟୁ କିତାମାନାନ୍ । 4 ଆଦେଙ୍ଗ୍ଁ ଇଲେଇ ମାଡ୍ ଲୋକ୍ ଗୁଣ୍ତି ଆଡ୍ଗି ତେବାଏଜି ଆତ୍ମାଦି ମାଣାନ୍ ସାଲାଜିନିକା ମାରି ତେନି ମାଣାନ୍ ମାଡ୍ ନିୟମ୍ତି ଟିକ୍ ଦାବି ପୁରା କିଜିନିକା । 5 ଏମେକାର୍ ଲୋକ୍ ଗୁଣ୍ ଇସାବ୍ତାନ୍ ପାଣି କିଜିମାନାର୍, ୱାରି ମନ୍ ଆୟା ଗୁଣ୍ତି ଆଡ୍ଗି ତେବାନାତ୍ । ମାତର୍ ଏମେକାର୍ ଆତ୍ମାଦି ମାଟା ଇସାବ୍ତାନ୍ ପାଣି କିନାର୍, ୱାରି ମନ୍ ଆତ୍ମାଦାନ୍ ସାଲାନାତ୍ । 6 ଲୋକ୍ ଗୁଣ୍ତି ଆଡ୍ଗି ତେବାତିଙ୍ଗ୍ଁ, ଦସ୍ ଆନାତ୍ ସାନିକା; ଆତ୍ମାଦି ଆଡ୍ଗି ତେବାନି ମାଣାନ୍ ଜିବନ୍ ନି ସାନ୍ତି ପୁଟ୍ନାତ୍ । 7 ନର୍ ଗୁଣ୍ତି ଆଡ୍ଗି ତେବାନି ମାଣାନ୍ ଲୋକ୍ ମାପୁରୁଦି ସାତ୍ରୁ ଆନାନ୍; ଇରିଙ୍ଗ୍ଁ ୱାନ୍ ମାପୁରୁଦି ନିୟମ୍ ମାନାଏନ୍ ୱାନ୍ ଆକା କିଦେଙ୍ଗ୍ଁ ଆଟ୍ଏନ୍ । 8 ଏମେକାର୍ ନର୍ ଗୁଣ୍ ଇସାବ୍ତାନ୍ ପାଣି କିନାର୍, ୱାର୍ ମାପୁରୁଙ୍ଗ୍ଁ ୱେଡ଼ିକା କିଦେଙ୍ଗ୍ଁ ଆଟ୍ଏର୍ । 9 ଜଦି ସତ୍ତାନ୍ ମାପୁରୁଦି ପବିତ୍ରଆତ୍ମା ମିବାନୁ ତେବାନାତ୍, ମିର୍ ମାରି ନର୍ ଗୁଣ୍ ଇସାବ୍ତାନ୍ ଜିଇଦେର୍, ମାତର୍ ଜିବନ୍ତୁ ଆତ୍ମାଦି ମାଟା ମାନାଜିନିଦେର୍ । କ୍ରିସ୍ତଦି ଆତ୍ମା ଆମାୱାନି ଲାକ୍ତୁ ସିଲେତ୍, ୱାନ୍ ଏସାଙ୍ଗ୍ଁବା ୱାନି ଲୋକ୍ ଆଦେଙ୍ଗ୍ଁ ଆଟ୍ଏନ୍ । 10 ମାତର୍ ଜଦି କ୍ରିସ୍ତ ମିବାନୁ ବାସାଜି ମାନାନ୍, ମି ମେନ୍ଧଲ୍ ପାପ୍ତୁ ନାସ୍ଟୁ ଆଦେଙ୍ଗ୍ଁ ସଲ୍ସି ମାରିଙ୍ଗ୍ଁ ବା, ଆତ୍ମା ମିଙ୍ଗିଁ ଜିବନ୍ ସିନାତ୍, ଇରିଙ୍ଗ୍ ମାପୁରୁଦି ଲାକ୍ତୁ ମିର୍ ଦାର୍ମୁତିକାର୍ ଆତିମାନିଦେର୍ । 11 ଜଦି ଜିସୁଙ୍ଗୁଁ ସାତି ମାଣାନ୍ ନିକ୍ତିମାନି ମାପୁରୁଦି ଆତ୍ମା ମିବାନୁ ମାନାତ୍, ଆର୍ତିଙ୍ଗ୍ଁ ଆୟା ଆତ୍ମାଦି ସାକାଦାନ୍ ମାପୁରୁ ମି ସାନି ମେନ୍ଦଲ୍ତିଙ୍ଗ୍ଁ ବା ଜିବନ୍ କିନାନ୍ । 12 ଆର୍ତିଙ୍ଗ୍ ଏ ତଡ଼ାନ୍କୁ ନି ତାଙ୍ଗିଁକି, ମା ପାଣି ଆଜିନାତ୍, ନର୍ ଗୁଣ୍ତି ଇସାବ୍ତାନ୍ ଜିଦେଙ୍ଗ୍ କେଏଟ୍, ଇରିଙ୍ଗ୍ଁ ଆକା କିତିଙ୍ଗ୍ଁ ମିର୍ ସାନିଦେର୍; 13 ମାତର୍ ଜଦି ଆତ୍ମାଦି ସାକାଦାନ୍ ନିଜେଦି ମେନ୍ଧଲ୍ତି ପାପ୍ ପାଣିଦିଙ୍ଗ୍ଁ ନାସ୍ଟୁ କିଜି ମାରି ପାପ୍ ପାଣି କିମାଟ୍, ଆତିଙ୍ଗ୍ଁ ମିର୍ ଜିନିଦେର୍ । 14 ଏମେକାର୍ ମାପୁରୁଦି ଆତ୍ମାଦାନ୍ ସାଲାଜିନାର୍, ୱାର୍ ମାପୁରୁଦି କଡ଼ର୍ । 15 ଇରିଙ୍ଗ୍ ମାପୁରୁ ସିତି ଆୟା ଆତ୍ମା ମିଙ୍ଗିଁ ଦାସ୍ତିମାଣାନ୍ ମୁକ୍ଡ଼ା କିତାମାନାନ୍, ମିର୍ ମାରି ତିଲାନିକା ଇନିକା ସିଲେତ୍ । ମାତର୍ ଆତ୍ମା ମିଙ୍ଗିଁ ମାପୁରୁଦି କଡ଼ର୍ ଆନି ସାରି ସିତାମାନାତ୍ । ୱାନି ସାକ୍ତି ନେସ୍ସି ମାଡ୍ ଇଲେଇ ମାପୁରୁଙ୍ଗ୍ଁ “ବୁବା” ଇଜି କୁକ୍ସିନିକା । 16 ମାପୁରୁଦି ଆତ୍ମା ମା ଲୋଇରି ଆତ୍ମାଦି ୱାଲେ ବଲୁ ମିସାକିଜି ମାଙ୍ଗିଁ ମାପୁରୁଦି କଡ଼ର୍ ଇଜି ୱେକ୍ସିନାତ୍ । 17 ଏନ୍ଦାଇରିଙ୍ଗ୍ଁ ମାଡ୍ ମାପୁରୁଦି କଡ଼ର୍, ୱାନି ଲୋକା ଉଣ୍ତିଙ୍ଗ୍ଁ ଟିକ୍ ଆର୍ସିବାଦ୍ତୁ ମାଡ୍ ମିସାନିକା । ମାରି କ୍ରିସ୍ତଦି ଉଣ୍ତିଙ୍ଗ୍ଁ ମାପୁରୁ ଆମାକା ଉଣ୍ତା କିଜି ଇଟ୍ତାମାନାନ୍, ଆବେନ୍ ବା ମା ବାଗ୍ ମାନାତ୍ । ଜଦି ମାଡ୍ ଜିସୁଦି ଦୁକ୍ବଗ୍ତି ବାଗ୍ ଆତିମାନିକା, ଆର୍ତିଙ୍ଗ୍ଁ ୱାନି ଗୌରବ୍ଦୁ ବା ମିସାନିକା । ୱାନିଦିନ୍ତି ଜାୟ୍ 18 ଆମା ଗୌରବ୍ମୟ୍ତି ୱାନିଦିନ୍ତୁ ମାଡ୍ ମିସାନିକା, ଆୟା ଇସାବ୍ତାନ୍ ଇଲେଇ ଦୁକ୍ବଗ୍ ଇନିକା ସିଲେ । ଆୟା ୱେଡ଼ାଦୁ ମାପୁରୁ ୱାନି କଡ଼ରିଙ୍ଗ୍ ତର୍ନାନ୍ । 19 ୱିଜୁ ତିଆର୍ ଆତିମାନିକେଙ୍ଗ୍ଁ ୱେଡ଼ିକାଦାନ୍ ଆୟା ମାପୁରୁଦି ଦିନ୍ତିଙ୍ଗ୍ କାପ୍କିଜି ତେବାତେମାନେ, 20 ଇରିଙ୍ଗ୍ଁ ତିଆର୍ଆତିମାନି ମାପୁରୁଦି ମାଣାନ୍ ଆନାଦୁରିଆ ପୟ୍ଜି ତାନି ବଦାଦାନ୍ ୱେର୍ଏ ଆତାମାନାତ୍ । ମାତର୍ ତାନି ଆସା ମାନାତ୍, 21 ଅର୍ଲେନ୍ ମାପୁରୁଦି କଡ଼ରି ଗୌରବ୍ଦି ମିସାଜି ୱାଦ୍ ବା ତାନି ନାସ୍ଟୁ ଆନି ଅବସ୍ତାଦାନ୍ ମୁକ୍ଡ଼ାଦେଙ୍ଗ୍ଁ ଆଟ୍ନାନ୍ । 22 ମାତର୍ ଇୟାସାନ୍ଦି ୱିଜୁ ତିଆର୍ ଜନମ୍ ସିନି କାସ୍ଟୁଦି ୱିସାମ୍ ୱାଜା ନେସ୍ତେଙ୍ଗ୍ ଆଟ୍ସିନିକା । 23 ମାଡ୍ ମାପୁରୁଦି ପାର୍ତୁମ୍ ଦାନ୍ ୱାଜା ପବିତ୍ରଆତ୍ମାଦିଙ୍ଗ୍ଁ ପୟ୍ତିମାନିକା; ଆତିଙ୍ଗ୍ବା ମାପୁରୁଦି ଇଲୁଦିଲୋକ୍ ୱାଜା ଆଜି ପୁରାଦାନ୍ ମେନ୍ଦଲ୍ତି ମୁକ୍ଡ଼ାଦେଙ୍ଗ୍ଁ ଇଜି ମାଡ୍ ବା କାପ୍କିଜି ଜିବନ୍ତୁ ଆଡ଼ାବାଜିନାପ୍ । 24 ଇରିଙ୍ଗ୍ ଆସା ଇଡ୍ନି ମାଣାନ୍ ନେ ମାଡ୍ ରକିୟା ପୟ୍ନିକା, ମାତର୍ ଆମାକା ତର୍ନାତ୍, ଆୟା ଉଣ୍ତିଙ୍ଗ୍ଁ ଆସା ଇଡ୍ନିକା ସତ୍ତାନ୍ ଆସା ସିଲେ । ଏନ୍ ଇନିକା ତର୍ନି ବିସୟ୍ ୱିଜୁ ଉଣ୍ତିଙ୍ଗ୍ଁ ଆସା କିନାନ୍ ? 25 ମାତର୍ ମାଡ୍ ଜଦି ତରାୟ୍ଆଇ ବିସୟ୍ ଉଣ୍ତିଙ୍ଗ୍ଁ ଆସା କିନିକା, ଆର୍ତିଙ୍ଗ୍ଁ ମାଙ୍ଗିଁ ସାସ୍ତାନ୍ କାପ୍କିଦେଙ୍ଗ୍ ପଡ଼ାନାତ୍ । 26 ମାରି ମାଡ୍ ସାକିସିଲିକାର୍, ମାତର୍ ପବିତ୍ରଆତ୍ମା ମାଙ୍ଗିଁ ସାକା କିନାତ୍, ଏଣ୍ତେସ୍ ପାର୍ତନା କିଦେଙ୍ଗ୍ଁ ଆନାତ୍, ଆକା ମାଡ୍ ନେସ୍ଇକା । ଆଦେଙ୍ଗ୍ଁ ପବିତ୍ରଆତ୍ମା ୱେର୍ତେଙ୍ଗ୍ଆଟ୍ଇ ବାସାଦାନ୍ ମା ଉଣ୍ତିଙ୍ଗ୍ଁ ମାପୁରୁଙ୍ଗ୍ଁ ମାଡ଼ିସ୍ କିନାତ୍ । 27 ମାପୁରୁ ଆକା ବୁଜାନାନ୍, ଇରିଙ୍ଗ୍ଁ ୱାନ୍ ମନ୍ ନେସ୍ନିକାନ୍ ମାରି ଆତ୍ମା ମାପୁରୁଦି ବଦାଦାନ୍ ୱାନି ଲୋକା ଉଣ୍ତିଙ୍ଗ୍ଁ ମାଡ଼ିସ୍ କିଜିମାନାତ୍ । 28 ଏମେକାର୍ ମାପୁରୁଦି ବଦାଦିଙ୍ଗ୍ ପୁରା କିଦେଙ୍ଗ୍ଁ ଇଜି କୁକାତାମାନାର୍ ମାରି ମାପୁରୁଙ୍ଗ୍ଁ ଜିବନ୍ନୋନାର୍, ୱାରି ଉଣ୍ତିଙ୍ଗ୍ ୱିଜୁ ବିସୟ୍ ନେଗିକା ଆନାତ୍ ମାପୁ ଇକା ନେସ୍ତାମାନାପ୍ । 29 ଏମେୱାରିଙ୍ଗ୍ଁ ମାପୁରୁ ବାସେକିତାମାନାନ୍, ୱାରିଙ୍ଗ୍ଁ ୱାନି ମାରିସିଦି ବମାୱାଜା ଆଦେଙ୍ଗ୍ଁ ଇଜି ଆଗ୍ଡ଼ିରାନ୍ ତିଆର୍ କିତାମାର୍ହାନ୍ । ଆତିଙ୍ଗ୍ଁ, ମାପୁରୁଦି ମାରିସି ୱାରି ତଡ଼ାକାମାନୁ ପାର୍ତୁମ୍ତିକାନ୍ ଆନାନ୍ 30 ଏମେକାର୍ ଇୟାୱାଜା ବାସେ ଆଜି କୁକାୟ୍ ଆତାମାନାର୍, ୱାର୍ ମାପୁରୁଦି ଲାକ୍ତୁ ଦାର୍ମୁତିକାର୍ ୱେଙ୍ଗିଁଜି ଗୌରବ୍ତିକାର୍ ଆତାମାନାର୍ । ମାପୁରୁଦି ଜିବନ୍ନୋନିକା 31 ଇୟାୱିଜୁ ମାଣ୍କୁ ମାରି ଇନିକା ୱେର୍ନିକା ? ମାପୁରୁ ଜଦି ମା ତରିନ୍, ଏନ୍ ମା ବିରୁଦ୍ ଆଦେଙ୍ଗ୍ଁ ଆଟ୍ନାନ୍ ? 32 ମାପୁରୁ ଏସାଙ୍ଗ୍ଁବା ମା ବିରୁଦ୍ ସିଲେ, ଇରିଙ୍ଗ୍ଁ ୱାନ୍ ନିଜେଦି ମାରିସିଙ୍ଗ୍ଁ ବା ରକିୟା କିଏନ୍ଣ୍ତା ମା ଉଣ୍ତିଙ୍ଗ୍ଁ ଦାନ୍ କିତାମାନାନ୍ । ଆର୍ତିଙ୍ଗ୍ଁ, ୱାନ୍ ଇନିକା ମାଙ୍ଗିଁ ୱିଜୁ ବିସୟ୍ଦାନ୍ କିଏନ୍ ନୋ ? 33 ମାପୁରୁଦି ବାସେ ଆତି ଲୋକା ବିରୁଦ୍ତାନ୍ ଏନ୍ ଦସ୍ ସିଦେଙ୍ଗ୍ ଆଟ୍ନାନ୍ ? ୱାରିଙ୍ଗ୍ଁ ଦସ୍ସିଲିକାର୍ ଇଜି ନିଜେ ମାପୁରୁ ୱେର୍ତାମାନାନ୍ । 34 ଆର୍ତିଙ୍ଗ୍ଁ ଏନ୍ ୱାରିଙ୍ଗ୍ଁ ମାରି ଦସି କିଦେଙ୍ଗ୍ ଆଟ୍ନାନ୍ ? କ୍ରିସ୍ତ ଜିସୁ ଆକା ଏସାଙ୍ଗ୍ କିଏନ୍, ଇରିଙ୍ଗ୍ଁ ୱାନ୍ ସାତି ମାଣାନ୍ ନିଙ୍ଗିଁଜି ମାପୁରୁଦି ଉଣେରି ତରିନ୍ ବାସ୍ତାମାନାନ୍ ୱାନ୍ ମା ଉଣ୍ତିଙ୍ଗ୍ ପ୍ରାର୍ଥନା କିଜିନାନ୍ । 35 ଆର୍ତିଙ୍ଗ୍ ଏନ୍ ମାଙ୍ଗିଁ କ୍ରିସ୍ତଦି ଜିବନ୍ନନି ମାଣାନ୍ ୱେର୍ଏ କିଦେଙ୍ଗ୍ଁ ଆଟ୍ନାନ୍ ? ଦୁକ୍, କାସ୍ଟୁ, ତାଡ଼ନା ମାରି କାକୁର୍ତି, ଏର୍କି, ବିପଦ୍ ମାରି ସାନିକା, ଏନ୍ ଆକା କିଦେଙ୍ଗ୍ ଆଟ୍ଏନ୍ । 36 ଏଣ୍ତେସ୍ ସାସ୍ତ୍ରଦୁ ରାସାତାମାନାତ୍, “ମି ଉଣ୍ତିଙ୍ଗ୍ଁ ମାପ୍ ୱିଜୁଦିନ୍ ସାନିକା ୱାଜା, କାତାୟ୍ଆଦେଙ୍ଗ୍ଁ ସଲ୍ସିମାନି ମେଣ୍ତାୱାଜା ମାପ୍ ୱେଙ୍ଗିତାମାନାପ୍ ।” 37 ଏନ୍ ମାଙ୍ଗିଁ ଜିବନ୍ନୋନାନ୍, ୱାନି ସାକାଦାନ୍ ମାପ୍ ଇୟାୱିଜୁ ମୁସ୍କୁ ଜିଣାତାମାନାପ୍ । 38 ନାନୁ ସତ୍ତାନ୍ ନେସ୍ତାମାନା ଜେ ୱାନି ଜିବନ୍ନୋନି ମାଣାନ୍ ଏସାଙ୍ଗ୍ ୱେର୍ଏ ଆଏଟ୍ । ସାନିକା ନୋ ଜିନିକା, ମୁସ୍କୁପୁର୍ତି ଦୁତ୍ ମାରି ମୁସ୍କୁପୁର୍ତି ଇନି ପେରିକାତ୍ ମାରି ସାକ୍ତି, ଇଲେଇ ମାରି ୱାନିଦିନ୍, 39 ମୁସ୍କୁରିକା କି ଆଡ୍ଗିରି ଇନି ବିସୟ୍ ୱିଜୁ ତିଆର୍ ଆତିମାନୁ ଇୟାୱାଜା ଇନି ବିସୟ୍ ସିଲେତ୍, ଆମାକା ପ୍ରବୁ ଜିସୁ କ୍ରିସ୍ତ ମାଣାନ୍ ତରାତି ମାପୁରୁଦି ଆୟା ଜିବନ୍ତାନ୍ ମାଙ୍ଗିଁ ୱେର୍ଏ କିଦେଙ୍ଗ୍ ଆଟ୍ଏନ୍ ! |
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020