ରୋମିୟ 12 - ମାପୁରୁଦି ସତ୍ ବାକ୍ୟ ପୁନି ନିୟମ୍ମାପୁରୁଦି ସେବାଦୁ ଜିବନ୍ 1 ଆଦେଙ୍ଗ୍ଁ ତଡ଼ାନ୍କୁ ନି ତାଙ୍ଗିଁକି, ମା ଉଣ୍ତିଙ୍ଗ୍ଁ ମାପୁରୁଦି ନାଣ୍ତ ଦୟା ଉଣ୍ତିଙ୍ଗ୍ଁ ମିଙ୍ଗିଁ ନାନୁ ବାତିଙ୍ଗ୍ ମାଲ୍ଜିନା, ମାପୁରୁମାନୁ ନିଜେଦି ମେନ୍ଦଲ୍ତିଙ୍ଗ୍ଁ ପବିତ୍ର ପୁଜା ୱାଜା ସର୍ପେ କିଦୁ । ୱାନି ସେବାଦୁ ନିଜେଦିଙ୍ଗ୍ଁ ସିଜି ୱାନିମାନୁ ସର୍ପେ ଆଦୁ । ଇକା ମାପୁରୁଦି ସତ୍ ଉପାସନା କିନିକା । 2 ମିର୍ ଇୟା ଇଲେଇତି ଦୁନିଆଦି ଇସାବ୍ତାନ୍ ବୁଲାମାଟ୍ । ମାପୁରୁ ମି ମନ୍ତିଙ୍ଗ୍ ପୁରା ପୁନିକା କିପିନ୍ ମାରି ମି ମନ୍ ପୁରା ବାଦ୍ଲେ ଆପିତ୍ । ଆତିଙ୍ଗ୍, ମାପୁରୁଦି ବଦା ଇନିକା, ୱାନି ଲାକ୍ତୁ ଏମେ ୱିଜୁ ବିସୟ୍ ସତ୍, ୱେଡ଼ିକାଦିକା ମାରି ପୁରା ନେଗିକା, ଇକା ମିର୍ ନେସ୍ତେଙ୍ଗ୍ଁ ଆଟ୍ନିଦେର୍ । 3 ମାପୁରୁ ନାଙ୍ଗିଁ ନାଣ୍ତ ଦୟା ସିତାମାନାନ୍ଆକା ମି ୱିଜେରିଙ୍ଗ୍ଁ ନାନୁ ଇଜିନା, ଏନ୍ ନିଜେଦି ଜଗ୍ୟଦି ମାଣାନ୍ ନିଜେଦିଙ୍ଗ୍ଁ ପେରିକାନ୍ ଇଜି ଅଡ଼୍ବିମାଟ୍ । ମାପୁରୁ ମିଙ୍ଗିଁ ସିତିମାନି ବିସ୍ବାସ୍ତି ଇସାବ୍ତାନ୍ ସାନ୍ତି ଆଜି ନିଜେ ବିସୟ୍ତାନ୍ ବିସାର୍ କିଦୁ । 4 ମା ମେନ୍ଦଲ୍ତୁ ଗାଦି ଆଇ ଆଇ ଜିନିସ୍କୁ ମାନେ ମାରି ୱିଜେକା ପାଣି ଅଲଗା । 5 ଆୟାୱାଜା ମାଡ୍ ଗାଦିଲୋକ୍, ମାତର୍ ୱିଜେରେ କ୍ରିସ୍ତଦି ୱାଲେ ମିସାତି ମାନିକାଆକା, ମାଡ୍ ଉନ୍ଡ୍ରେ ମେନ୍ଧଲ୍ ମାରି ମେନ୍ଦଲ୍ତି ଜିନିସ୍କା ୱାଜା ମାଡୁ ଅର୍ସେ ୱାଲେ ମିସାତି ମାନିକା । 6 ଆଦେଙ୍ଗ୍ ମା ଉଣ୍ତିଙ୍ଗ୍ଁ ମାପୁରୁଦି ଦୟା ଇସାବ୍ତାନ୍ ୱାନିମାଣାନ୍ ପୟ୍ତି ରକମ୍ତି ଆଇ ଆଇ ଦାନ୍ ସାକ୍ତିୱିଜୁ ମାଡ୍ ଟିକ୍ ଇସାବ୍ତାନ୍ କାଟେକିଦେଙ୍ଗ୍ଁ ଆଟ୍ନିକା । ମାଡ୍ ଜଦି ମାପୁରୁଦି କାବୁର୍ ପ୍ରଚାର୍ କିନି ଉଣ୍ତିଙ୍ଗ୍ଁ ଇଜି ମାପୁରୁସିତି ସାକ୍ତି ପୟ୍ତିମାନିକା, ମା ବିସ୍ବାସ୍ତି ଡାଟ୍ ଇସାବ୍ତାନ୍ ଆୟା ପାଣି କିଦେଙ୍ଗ୍ଁ ଆନାତ୍ । 7 ଜଦି ସେବା କିନି ଉଣ୍ତିଙ୍ଗ୍ଁ ଆୟା ସାକ୍ତି ପୟ୍ତିମାନିକା, ମାଡ୍ ସେବା କିଦେଙ୍ଗ୍ଁ ଆନାତ୍; ସିକିୟା ସିଦେଙ୍ଗ୍ ଇଜି ସାକ୍ତି ପୟ୍ତିମାରିଙ୍ଗ୍ଁ, ସିକିୟା ସିଦେଙ୍ଗ୍ ଆନାତ୍ । 8 ଆଇୱାରିଙ୍ଗ୍ ୱେଡ଼ିକା କିଦେଙ୍ଗ୍ଁ ଇଜି ସାକ୍ତି ପୟ୍ତିମାରିଙ୍ଗ୍ଁ, ଆକା କିଦେଙ୍ଗ୍ଁ ଆନାତ୍ । ଦାନ୍ କିଦେଙ୍ଗ୍ଁ ସାକ୍ତି ପୟ୍ତିମାନି ଲୋକ୍ ରେଆତି ମନ୍ତାନ୍ ଦାନ୍ କିପିନ୍ । ଆଇୱାରି ପାଣିଦି ଜାତୁନ୍ କିଦେଙ୍ଗ୍ଁ ଅଦିକାର୍ ପୟ୍ତିମାରିଙ୍ଗ୍ଁ ନିଜେ କାସ୍ଟୁପାଣି କିଦେଙ୍ଗ୍ ଆନାତ୍ । ଦୟା କିନି ଲୋକ୍ ୱେଡ଼ିକା ମନ୍ତାନ୍ ଦୟା କିପିନ୍ । 9 ଜିବନ୍ତି ୱାଲେ ଜିବନ୍ନୋନିକା ନେଗିକା ଆପିତ୍ । ଆମା ୱିଜୁ ସତ୍ସିଲେ; ତାନିଙ୍ଗ୍ଁ କାଡ଼୍ଦୁ, ୱିଜୁ ସତ୍ ବିସୟ୍ତୁ ଲାକ୍ତୁ ଆଦୁ । 10 କ୍ରିସ୍ଟିୟାନ୍ ତଡ଼ାନ୍ ନି ତାଙ୍ଗିଁକ୍ ୱାଜା ନିଜେନିଜେଦିଙ୍ଗ୍ ଜିବନ୍ନଦୁ ମାରି ନିଜେନିଜେଦିଙ୍ଗ୍ ସନ୍ମାନ୍ ତର୍ତେଙ୍ଗ୍ଁ ଇଜି ୱେଡ଼ିକା ଆଦୁ । 11 ୱେଡ଼ିକାଦାନ୍ ଗାଡ଼ିୟା ଆମାଟ୍, ଆତ୍ମାଦୁ ତେବାନିକା ଅଡ଼୍ବିଦୁ । ବକ୍ତିଦି ଜିବନ୍ତାନ୍ ପ୍ରବୁଦି ସେବା କିଦୁ । 12 ଡାଟ୍ ଆସା ଇଡ୍ଜି ୱେଡ଼ିକା କିଦୁ । ଦୁକ୍କାସ୍ଟୁଦି ବେଡ଼ାଦୁ ସାସ୍ ଆସ୍ତୁ । ୱିଜୁଦିନ୍ ପାର୍ତନାଦୁ ପୁରା ତେବାଦୁ । 13 କ୍ରିସ୍ତବିସ୍ବାସିରି ଦର୍କାର୍ ମାନିକା ସିଦୁ । ମାରି ୱାନି ଲୋକାଙ୍ଗ୍ଁ ସନ୍ମାନ୍ତାନ୍ କୁକ୍ତୁ । 14 ମିଙ୍ଗିଁ ଏମେକାର୍ ତାଡ଼ନା କିନାର୍, ୱାରି ନେଗି ଉଣ୍ତିଙ୍ଗ୍ ଇଜି ମାପୁରୁମାନୁ ପାର୍ତନା କିଦୁ । ୱାରିଙ୍ଗ୍ଁ ଆର୍ସିବାଦ୍ କିଦୁ, ଆନାଦୁରିଆ ସିମାଟ୍ । 15 ସୁକ୍ତାନ୍ ମାନି ଲୋକା ୱାଲେ ୱେଡ଼ିକା କିଦୁ, ଆଡ଼୍ବାନି ଲୋକା ୱାଲେ ଆଡ଼୍ବାଦୁ । 16 ୱିଜେରି ଉଣ୍ତିଙ୍ଗ୍ଁ ସାମାନ୍ ଇସାବ୍ତାନ୍ ସୁଡ଼୍ଦୁ । ଆକାର୍ ଅଡ଼୍ବିନିକା ଡ଼ିସ୍ସି ସାନ୍ତି ଇସାବ୍ତାନ୍ ତାଗ୍ଇ ପାଣିୱିଜୁଦିଙ୍ଗ୍ଁ ବା ଆସ୍ତୁ । ନିଜେଦିଙ୍ଗ୍ଁ ବୁଦିମାନିକାନ୍ ଅଡ଼୍ବିମାଟ୍ । 17 ଏନ୍ ମି ଉଣ୍ତିଙ୍ଗ୍ଁ ଅନ୍ୟାୟ୍ କିତିଙ୍ଗ୍ଁ, ମିର୍ ୱାନି ଉଣ୍ତିଙ୍ଗ୍ଁ ଅନ୍ୟାୟ୍ କିମାଟ୍ । ଆଇୱାରି ଲାକ୍ତୁ ଆମାକା ସତ୍ପାଣି, ଆକାନେ କିଦୁ । 18 ୱିଜେରି ୱାଲେ ସାନ୍ତିଦାନ୍ ବାସାଦେଙ୍ଗ୍ଁ ଇଜି ଏସ୍ତିୱାଲେ ଆଦେଙ୍ଗ୍ଁ ଆଟ୍ନାତ୍ ସେସ୍ଟା କିଦୁ । 19 ଏ ଲାଡ୍ତିକାର୍, ମିର୍ ନିଜେ ଆମାୱାନି ବିରୁଦ୍ତାନ୍ ବାଦ୍ ଅମାଟ୍ । ମାପୁରୁଦି ରିସାଦି ଲୋକ୍ ଆଦେଙ୍ଗ୍ଁ ୱାନିଙ୍ଗ୍ ଡ଼ିସ୍ସୋ ସିଦୁ । ଇରିଙ୍ଗ୍ ସାସ୍ତ୍ରଦୁ ରାସାତାମାନାତ୍, “ପ୍ରବୁ ଇନାନ୍, ମାପ୍ ପ୍ରତିସଦ୍ ଅନାପ୍ । ମାପ୍ ଦଣ୍ତ୍ ସିନାପ୍ ।” 20 ତାନିବାଦ୍ଲୁ ସାସ୍ତ୍ର ଏଣ୍ତେସ୍ ଇନାତ୍, “ମି ସାତ୍ରୁ ବାଙ୍ଗାଁ ମାରିଙ୍ଗ୍ଁ, ୱାନିଙ୍ଗ୍ଁ ଉଣ୍ତେଙ୍ଗ୍ଁ ସିଦୁ; ଏର୍କି ମାରିଙ୍ଗ୍ଁ ଉଟ୍ପିସ୍କିଦୁ । ଇବେଣାନ୍ ୱାନ୍ ସେମାର୍ ଆନା ସନାନ୍ ।” 21 ଅସତ୍ ତାନ୍ ଆରାମାଟ୍; ୱିଜୁ ଅସତ୍ ବିସୟ୍କୁ ନେଗିପାଣିଦାନ୍ ଜିଣାଦୁ । |
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020