మార్కు 4 - ମାପୁରୁଦି ସତ୍ ବାକ୍ୟ ପୁନି ନିୟମ୍ୱିତୁ ୱିତ୍ନି ଲୋକ୍ତି କାତା ( ମାତିଉ ୧୩:୧-୯ ; ଲୁକ ୮:୪-୮ ) 1 ଜିସୁ ଗାଲିଲି ସାମ୍ଦୁର୍ ପାଡ଼ି ମାରିଡ଼େସି ଶିକ୍ଷା ସିଦେଙ୍ଗ୍ ଆରାମ୍ କିତାନ୍, ୱାନି ଲାକ୍ତୁ ନାଣ୍ତ ଲୋକୁ ଉଣ୍ତାତାର୍ ଆକା, ୱାନ୍ ସାମ୍ଦୁର୍ତୁ ମାର୍ଇ ଉନ୍ଡ୍ରି ଡଙ୍ଗାଁଦୁ ସଲ୍ସି ବାସ୍ତାନ୍ ମାରି ଲୋକୁ ୱିଜେରେ ସାମ୍ଦୁର୍ ପାଡ଼ି ତେବାତାର୍ । 2 ଜିସୁ କାତାଦାଣ୍ତ୍ ଏସୋ ସିକିୟା ସିନିୱାଲେନେ ୱାନ୍ ୱାରିଙ୍ଗ୍ ଇର୍ଆନ୍, 3 “ୱେଣ୍ତ୍ରୁ, ଅରେନ୍ ୱିତୁ ୱିତ୍ନିକାନ୍ ୱିତ୍ତେଙ୍ଗ୍ ସତାନ୍ । 4 ୱାନ୍ କିଡ଼ିଇଦୁ ୱିତୁ ୱିତ୍ନିୱାଲେ ଏସ ୱିତୁ ସାରି ପାଡ଼୍କାଦୁ ଆର୍ତେ ଆକା ପଟିଙ୍ଗ୍ ୱାଜି ଆୟାୱିଜୁ ୱିତୁ ତିର୍ଏ । 5 ମାରି ଏସ ୱିତୁ ଉଣା ସିକାଲାମାନି ପିଡ଼ିପି ବୁମିଦୁ ଆର୍ତାତ୍ । ମାରି ନାଣ୍ତ ସିକାଲା ସିଲେତାତ୍ ଆକା ୱିତୁ ଦାପ୍ରେ ନେରିତାତ୍ । 6 ମାତର୍ ୱେଡ଼ା ସତାତ୍ ଆକା ଗାଜା ୱେତା ସର୍ଆତ୍ ମାରି ୱେଲା ଲୋଇ ସାର୍ଏତା ମାର୍ଆତ୍ ଆକା ୱାର୍ତା ସର୍ଆତ୍ । 7 ମାରି ଏସୋ ୱିତୁ ସାମ୍କା ଦୁପା ଲୋଇ ଆର୍ତାତ୍, ମାରି ସାମ୍ମାରାକ୍ ପିରିତେନୋ ତାମେ ମୁସ୍କୁ ତିଗାତେ ମାରି ଆୟା ମାରାତୁ ଉଣ୍ତ୍ରିବା ପାଡ଼ୁ ଆସ୍ଏତାତ୍ । 8 ମାତର୍ ଏସୋ ୱିତୁ ନେଗି ବୁମିଦୁ ଆର୍ତାତ୍, ଆୟା ବାଡିଦୁ ଗାଜା ଆଜି ପିରିତାଦୋ ତିରିସ୍ ଗୁଣୁ, ସାଟେ ଗୁଣୁ ମାରି ସୟେ ଗୁଣୁ ସାନ୍ଦି ପାଡ଼ୁ ଆସ୍ତାତ୍ ।” 9 ଆବେ ଜିସୁ ଇର୍ଆନ୍, “ଆମାୱାନିଙ୍ଗ୍ ୱେନ୍ଡ୍ରେଙ୍ଗ୍ ଗିତଣିଙ୍ଗ୍ମାନେ, ୱାନ୍ ୱେନିନ୍ ।” କାତାଦି ଉଦେସ୍ ( ମାତିଉ ୧୩:୧୦-୧୭ ; ଲୁକ ୮:୯-୧୦ ) 10 ଜିସୁ ଅରେନ୍ନେ ମାନିୱାଲେ ବାର ଲୋକୁ ଶିଶୁର୍ ମାରି ୱାରିୱାଲେ ମାନିଲୋକ ଜିସୁମାନୁ ୱାଜି ୱେନ୍ବାତାର୍ “ନିନୁ ଏନ୍ଧା କାତାଦାନ୍ ମାଟା ୱେର୍ସିନି ?” 11 ଆବେଟ୍ ଜିସୁ ୱାରିଙ୍ଗ୍ ଇର୍ଆନ୍, ମାପୁରୁଦି ରାଜିଦି ମାର୍ଗିତି ମାଟା ବୁଜାଦେଙ୍ଗ୍ ଉଣ୍ତିଙ୍ଗ୍ ମିଙ୍ଗିଁ ବପୁ ପୁଟ୍ତାମାନାତ୍, ମାତର୍ ଆୟା ଆତ୍ରେଣି ଲୋକାଙ୍ଗ୍ ଇୟାୱିଜୁ ବିସୟ କାତାଦାନ୍ ୱେର୍ତେଙ୍ଗ୍ ଆଜିନାତ୍ । 12 ଆୟା ଉଣ୍ତିଙ୍ଗ୍ ୱାର୍ ୱେନ୍ଜି ୱେନ୍ଜି ନେସ୍ତେଙ୍ଗ୍ ଆଟ୍ଏର୍, ମାରି ୱେନ୍ବୁ ୱେନ୍ବୁ ବୁଜାଏର୍, ଜଦି ନେସ୍ନାର୍ ମାରି ବୁଜାନାର୍ ମାରି ମାପୁରୁତି ଲାକ୍ତୁ ଡ଼େସିୱାନାର୍ ମାରି ୱାରିଙ୍ଗ୍ କେମା କିନାନ୍ । ଜିସୁ ୱିତ୍ ୱିତ୍ତି ଅର୍ତ ବୁଝାକିତାନ୍ ( ମାତିଉ ୧୩:୧୮-୨୩ ; ଲୁକ ୮:୧୧-୧୫ ) 13 ଜିସୁ ମାରି ସିସୁରିଙ୍ଗ୍ ଇର୍ଆନ୍, “ଇୟା କାତା ମିର୍ବା ବୁଝାଦେଙ୍ଗ୍ ଆଟ୍ଇଜିନିଦେର୍ ? ଆଇ ୱିଜୁ କାତା ଏଣ୍ତେସ୍ ବୁଝାନିଦେର୍ ? 14 ୱିତ୍ନିକାନ୍ ୱିତୁ ଅର୍ତାତ୍ ମାପୁରୁତି ବାକ୍ୟ ୱିତ୍ନାନ୍ । 15 ଆମାକାର୍ ମାପୁରୁଦି ବାକ୍ୟ ୱେନାର୍, ମାତର୍ ୱେର୍ହି ଦାପ୍ରେନେ ଶୟତାନ୍ ୱାନାତ୍ ନୋ ୱାରିମାନୁ ୱିତାତିମାନି ବାକ୍ୟଦିଙ୍ଗ୍ ଡଂଆ କିନା ଅନାତ୍, ୱାରୁ ସାର୍ଦୁ ବାକ୍ୟ ୱିତାତି ବୁମିଦି ୱାଜା । 16 ଆୟାୱାଜା, ଏର୍କି ବାକ୍ୟ ୱେର୍ଇଦାପ୍ରେ ୱେଡ଼ିକାଦାନ୍ ଆକା ୱାରି ମନ୍ ଲୋଇ ଇଡ୍ନାର୍, 17 ମାତର୍ ୱାରିମାନୁ ୱେଲା ସାଗ୍ଏତ୍ଆକା ସାଣେକ୍ନେ ତିର୍ ତେବାନାର୍, ୱେନ୍କା ବାକ୍ୟ ଉଣ୍ତିଙ୍ଗ୍ ଦୁଃକ୍ ମାରି ନିଦା ମାଟା ୱାତିଙ୍ଗ୍ ଆୟାଦାପ୍ରେ ବିସ୍ବାସ୍ ଡ଼ିସ୍ନାର୍, ୱାରୁ ପିଡ଼ିପି ବୁମିଦୁ ଆର୍ତିମାନି ୱିତ୍ତି ୱିତୁଦି ୱାଜା । 18 ମାରି ଆମାକାର୍କି ବାକ୍ୟ ୱେନ୍ନାର୍, ମାତର୍ ଦୁନିଆଦି ସିନ୍ତା, ଡାବୁଙ୍ଗୁଁ ଟାକେଙ୍ଗ୍ଣି ମାୟା ମାରି ଆଇ ୱିଜୁ ବିସୟତୁ ଆସା ମନ୍ତୁ ଡ଼ୁଗ୍ନାଦ ବାକ୍ୟଦିଙ୍ଗ୍ ତିଗାନାତ୍ ମାରି ଆକା ପାଡ଼ୁ ସିଲିକା ଆନାତ୍ । ୱାର୍ ସାମ୍ ମାରାକା ଲୋଇ ଆର୍ତି ୱିଜୁ ୱାଜା । 19 ମାତର୍ ଦୁନିଆଦି ସିନ୍ତା, ଦନ୍ଲବ୍ ମାରି ଆଇ ଆସା ୱାରି ମନ୍ତିଙ୍ଗ୍ ତିର୍ଜିମାନିଙ୍ଗ୍ ଆୟା ମାଟା ୱାରିମାନୁ ପିର୍ଏତ୍ । 20 ମାରି, ଆମାକାର୍ କି ବାକ୍ୟ ୱେନାରୋ ଆକା ମନ୍ ଲୋଇ ଇଡ୍ନାର୍, ୱାର୍ ଏନ୍ ତିରିସ୍ ଗୁଣୁ, ସାଟେ ଗୁଣୁ ମାରି ସହେ ଗୁଣୁ ପାଡ଼ୁ ଆସ୍ନାର୍ ଆୟା ଲୋକୁ ନେଗି ବୁମିଦୁ ୱିତ୍ତି ୱିତୁତି ୱାଜା ।” ଅଡି ଆଡ୍ଗି ଦିଆ ( ଲୁକ ୮:୧୬-୧୮ ) 21 ଜିସୁ, ମାରିଡ଼େସି ୱାରିଙ୍ଗ୍ ଇର୍ଆନ୍, “ଏନ୍ ଏସ୍କାଙ୍ଗ୍ ଇନିକା ଦିୱା କାସିସ୍କିଜି ଅଡି ଆଡ୍ଗି କି ଖାଟେଲ୍ ଆଡ୍ଗି ଇଡ୍ନାନ୍ ? ଆକା ଲୋକୁ ଦିୱା କାସିସ୍କିଜି ଦିଆ ଇଡ୍ନି ବାଡିଦୁ ଇଡ୍ଏର୍ ନୋ ?” 22 ଇରିଙ୍ଗ୍ ତର୍ଇ ଇସାବ୍ତାନ୍ ଏମେକାବା ମାର୍ଗ୍ଏତ୍; ଆମାକା ମାର୍ଗିତା ମାନାତ୍, ଆକା ତର୍ଦେଙ୍ଗ୍ ଇଜିନେ ମାର୍ଗିତା ମାନାତ୍ । 23 ଜଦି “ଆମାୱାନିଙ୍ଗ୍ ୱେନ୍ଡ୍ରେଙ୍ଗ୍ ଗିତଣିଙ୍ଗ୍ମାନେ, ୱାନ୍ ୱେନିନ୍ ।” 24 ଜିସୁ ୱାରିଙ୍ଗ୍ ଇର୍ଆନ୍, “ଇନିକା ୱେନ୍ଜିନିଦେର୍, ଆୟା ଉଣ୍ତିଙ୍ଗ୍ ଜାଗାର୍ତା । ମିର୍ ଏଣ୍ତେସ୍ କିଜି ଆଇ ଲୋକ୍ତିଙ୍ଗ୍ ଲେକିସ୍ କିଜି ସିନିଦେର୍, ଆୟାୱାଜା ପ୍ରବୁ ମିଙ୍ଗିଁ ନାଣ୍ତ ଲେକିସ୍ କିଜି ସିନାନ୍ । 25 ଏମେ ଲୋକ୍ତିନ୍ଧି ମାନାତ୍, ୱାନିଙ୍ଗ୍ ପୁଟ୍ନାତ୍; ମାରି ଆମାୱାନିନ୍ଧି ସିଲେତ୍, ୱାନିବାନୁ ଆମାକା ମାନାତ୍, ଆକାବା ମାପୁରୁ ୱାନିମାଣ୍କୁ ଅନାନ୍ ।” ୱିତୁ ଗାଜା ଆଜି ପିର୍ନି କାତା 26 ଜିସୁ ମାରିଡ଼େସି ଇର୍ଆନ୍, “ମାପୁରୁତି ରାଜି ଇୟାୱାଜା । ଅରେନ୍ ଲୋକୁ ନିଜେଦି ବୁମିଦୁ ୱିତୁ ୱିତ୍ନାନ୍; 27 ୱାଣ୍ତ୍ରୁ ନାଡ଼ା ସୁଜ୍ନାନ୍ ମାରି ୱେଡ଼େ ନିଂନାନ୍, ମାରି ଆୟା ୱିତୁ ଏଣ୍ତେସ୍ ଗାଜା ଆତାଦୋ ପିର୍ତାତ୍, ଆକା ୱାନ୍ ନେସ୍ଏପ୍ । 28 ବୁମି ନିଜେ ପାଡ଼ୁ ତାପିସ୍କିନାତ୍, ଆଗ୍ଡ଼ି ଆକୁ, ୱେନ୍କା ସେରେନ୍, ତାନି ୱେନ୍କା ସେରେନ୍ତୁ ବର୍ତି ପାଡ଼୍କୁ । 29 ଆବେଟ୍ ସେରେନ୍ ପାଣ୍ତିତି ଦାପ୍ରେ ୱାନ୍ ଡେରେଙ୍ଗ୍ କୁଲିଙ୍ଗ୍ ଆତେ ଇଜି କଏର୍ଙ୍ଗୁଁ ଆସ୍ନା ସନାନ୍ । ସାର୍ସୁ ପାଡ଼ୁଦି କାତା ( ମାତିଉ ୧୩:୩୧-୩୨ ; ଲୁକ ୧୩:୧୮-୧୯ ) 30 “ଜିସୁ ମାରି ଇର୍ଆନ୍, ମାଡୁ ମାପୁରୁଦି ରାଜିଦିଙ୍ଗ୍ ଆମାତାନିୱାଲେ ତୁସ୍ନାଟ୍ ?” ବା ଇକା ଏମେ କାତା ୱେର୍ସି ଆକା ବୁଝାକିନାଟ୍ ? 31 ମାପୁରୁଦି ରାଜି ଆକା ଉଣ୍ତ୍ରି ସାର୍ସୁ ପାଡ଼ୁଦି ୱାଜା; ବୁମିଦୁ ୱିତ୍ତିୱାଲେ ଆକା ଦୁନିଆଦି ୱିତୁ ପାଡ୍କାଣ୍ ଇସ୍ରିକାତ୍, 32 ମାତର୍ ୱିତ୍ତି ୱେନ୍କା ଆକା ପିର୍ଜି ନିଂଇନାଦ ୱିଜୁ କୁସେଙ୍ଗାଁ ମାଣ୍କୁ ପେରିକାତ୍ ଆନାତ୍, ମାରି ତାନି କମେଙ୍ଗ୍ ଇୟାୱାଜା ପେରିକେଙ୍ଗ୍ ଆନେ ଯେ, ବାଦଡ଼୍ତି ପଟିଙ୍ଗ୍ ମାରାତି ସିତ୍ଡ଼ିଦୁ ତେବାଦେଙ୍ଗ୍ ଆଟ୍ନେ । 33 ଜିସୁ ଇୟାୱାଜା ନାଣ୍ତ କାତାଦାନ୍ ଲୋକା ବୁଜାନି ଶକ୍ତି ଇସାବ୍ତାନ୍ ୱାରିମାନୁ ବାକ୍ୟ ୱେର୍ସି ମାର୍ଆନ୍, 34 ଜିସୁ କାତା ଇନ୍ଏଣ୍ତା ଇନିକାବା ଲୋକାଙ୍ଗ୍ ଇନ୍ଏଜି ମାର୍ଆନ୍ । ମାତର୍ ଜିସୁ ଆଇ ଲୋକୁ ସିଲିୱାଲେ ୱାନି ସିସୁରିଙ୍ଗ୍ ୱିଜୁମାଟା ବୁଝାକିଜି ମାର୍ଆନ୍ । ଜିସୁ ଗାଲିପିରୁ ୱାନିତାନିଙ୍ଗ୍ ତେବାକିତାନ୍ ( ମାତିଉ ୮:୨୩-୨୭ ; ଲୁକ ୮:୨୨-୨୫ ) 35 ଆୟା ନାଣ୍ଡିଙ୍ଗ୍ ମିଲିମିଲିକା ଜିସୁ ସିସୁରିଙ୍ଗ୍ ଇର୍ଆନ୍, “ରାଦୁ, ସାମ୍ଦୁର୍ତୁ ଆୟା ପାଡ଼ି ସନାଟ୍ ।” 36 ଆବେଟ୍ ୱାନି ସିସୁର୍ ଲୋକାଙ୍ଗ୍ ଡ଼ିସ୍ତାରୋ, ଜିସୁ ଆଗ୍ଡ଼ି ଆମା ଡଙ୍ଗାଁଦୁ ବାସ୍ତା ମାର୍ଆନ୍ ଆବେ ୱାର୍ ଏକ୍ତାର୍ ମାରି ଜିସୁଙ୍ଗୁଁ ଅର୍ସେ ଅତାର୍, ମାରି ଆବେ ଆଇ ଡଙ୍ଗ୍ଗେଙ୍ଗ୍ ବା ମାର୍ହେ । 37 ଆୟାୱେନ୍କା ସାମ୍ଦୁର୍ତୁ ଉଣ୍ତ୍ରି ଗାଲିପିରୁ ୱାତାତ୍, ମାରି ଉଲ୍କା ଏର୍ ଆଟ୍ତେଆକା ଡଙ୍ଗାଁଦୁ ଏରୁ ପୁରୁନ୍ ଆଦେଙ୍ଗ୍ ଆରାମ୍ଆତେ । 38 ଜିସୁ ଜାହାଜ୍ଦି ଲୋଇ ଉନ୍ଡ୍ରି ବାକ୍ରାଦି ୱେନ୍କା ତରନ୍ ସର୍ଆନ୍ନୋ ତାଲା ଟାଟ୍ନି ପିଡା ତାଲାଆଡ୍ଗି ଇଟ୍ଟାନ୍ନୋ ଶୁଜ୍ଜିମାର୍ଆନ୍; ସିସୁର୍ ଜିସୁଙ୍ଗୁଁ ନିକ୍ସି ଇର୍ହାର୍, “ଏ ଗୁରୁ, ମାପ୍ ସାତାପ୍, ନିନ୍ ଇନିକା ଅଡ଼୍ବିଇ ନୋ ?” 39 ଆବେଟ୍ ଜିସୁ ନିଂଇତାନ୍ନୋ ଗାଲିଦିଙ୍ଗ୍ ଆଦ୍ରିସ୍ କିଜି ଉଲକାଏର୍ତିଙ୍ଗ୍ ଇର୍ଆନ୍, “ତିର୍ ଆଆ” ତେବାଆ । ଆବେଟ୍ ଗାଲି ଉଣାଆତାତ୍ ମାରି ୱିଜୁ ତିର୍ଆତାତ୍ । 40 ଆୟାୱେନ୍କା ଜିସୁ ସିସୁରିଙ୍ଗ୍ ଇର୍ଆନ୍, “ମିର୍ ଇନ୍ଦାନିଙ୍ଗ୍ ନିସା ତିଲାଜିନିଦେର୍ ? ଇକା ଇନିକା ! ଇୟାସାନ୍ଦି ମି ବିସ୍ବାସ୍ ସିଲେତ୍ ନୋ ?” 41 ଆବେଟ୍କୁ ସିସୁର୍ ନାଣ୍ତ ତିଲାତାରୋ ୱାରି ୱାରି ଲୋଇ ୱାର୍ଗିଜି ସାତାର୍, “ଇୟା ଲୋକ୍ ଏନ୍ ଜେ, ଗାଲି ନି ଏରୁ ବା ୱାନି ମାଟା ମାନାନେ ?” |
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020