మార్కు 16 - ମାପୁରୁଦି ସତ୍ ବାକ୍ୟ ପୁନି ନିୟମ୍ଜିସୁ ସାତିମାଣାନ୍ ଡ଼େସି ନିଙ୍ଗିଁତାନ୍ ( ମାତିଉ ୨୮:୧-୮ ; ଲୁକ ୨୪:୧-୧୨ ; ଜୋହନ ୨୦:୧-୧୦ ) 1 ରମ୍ନି ନାଣ୍ଡିଙ୍ଗ୍ ଜିଣାତାତ୍ଆକା ମଗ୍ଦଲିନି ମରିୟମ, ଜାକୁବରି ଆଇସି ମରିୟମ୍ ମାରି ଶଲୋମୀ ରକମ୍ ରକମ୍ତି ବାସ୍ନା ନିୟୁ କଟେ, ଏଣ୍ତେସ୍କି ୱାକ୍ ସଲ୍ସି ୱାନି ସାତି ମାଡ଼ାଦିଙ୍ଗ୍ ଉସ୍ତେଙ୍ଗ୍ ଆଟ୍ନେ । 2 ମାରି, ଆଦିୱାର୍ତୁ ନାଡ଼ାକାଦେ ୱାକୁ ଗୁଟାଦୁ ସର୍ହେ, ଆୟାୱାଲେ ୱେଡ଼ା ସତାମାର୍ଆତ୍ । 3 ସାର୍ଦୁ ୱାକୁ ୱାର୍ଗିସାଜି ମାର୍ହେ, “ଏନ୍ ମା ଉଣ୍ତିଙ୍ଗ୍ ଗୁଟାଦି ସାରିଦୁ କେର୍ପ୍ତି ମାନି କାଲୁ କୁତ୍ନା ସିନାନ୍ ?” ଇରିଙ୍ଗ୍ ଆକା ନାଣ୍ତ ପେରିକା ମାର୍ଆତ୍ । 4 ଆୟାୱାଲେ ୱାକ୍ ସୁଡ଼୍ତେ, ଆୟା ଗୁଟାଦୁ କେର୍ପ୍ତି ମାର୍ହି କାଲୁଦିଙ୍ଗ୍ କୁତ୍ତା ମାନାର୍ । 5 ୱାକ୍ ଗୁଟା ଲୋଇ ଡ଼ୁଗିତେନୋ ଅଡ଼ିନିଆଙ୍ଗିଁ ଆରାତି ଅରେନ୍ ମୁରୁଲିଙ୍ଗ୍ ଉଣେରି ପାଡ଼ାକା ବାସ୍ତି ମାରିକା ସୁଡ଼ୁତେନୋ ନାଣ୍ଡ ତିଲାତେ ସର୍ହେ । 6 ଆବେଟ୍ ୱାଣ୍ତ୍ରୁ ୱାନିକାଙ୍ଗ୍ ଇର୍ଆନ୍, “ତିଲାମାଟ୍,” ମିର୍ କ୍ରୁସଦୁ ସାତି ମାର୍ହି ନାଜରିତିୟ ଜିସୁଙ୍ଗୁଁ ପଇଜିନିଦେର୍; ୱାଣ୍ତ୍ରୁ ନିଙ୍ଗିଁତାମାନାନ୍, ୱାନ୍ ଇବେ ସିଲେନ୍; ସୁଡ଼ୁଦୁ, ଇୟା ବାଡିଦୁ ୱାର୍ ଜିସୁଙ୍ଗୁଁ ଇଟ୍ଟା ମାର୍ଆର୍ । 7 ମାତର୍ ମିର୍ ସଲ୍ସି ୱାନି ସିସୁରିଙ୍ଗ୍ ମାରି ପିତର୍ତିଙ୍ଗ୍ ଇୟା କାବୁର୍ ୱେର୍ତୁ, ୱାନ୍ ମି ଆଗ୍ଡ଼ି ଗାଲିଲିଦୁ ସଲ୍ସିନାନ୍; ୱାନ୍ ମିଙ୍ଗିଁ ଏଣ୍ତେସ୍ ଇର୍ଆ ମାର୍ଆନ୍, ଆୟାୱାଜାନେ ମିର୍ ୱାନିଙ୍ଗ୍ ଆବେ ସୁଣିଦେର୍ । 8 ଆବେଟ୍ ଆଇମେକ୍ ସତେନୋ ଗୁଟାଦାନ୍ ଉରୁକ୍ସି ସର୍ହେ, ଇରିଙ୍ଗ୍ ୱାକୁ ତିଲାଜି ତିର୍ଗ୍ଜି ମାର୍ହେ ମାରି କାବାଆତେ ସର୍ହେ ମାର୍ହେ, ମାରି ଏଙ୍ଗ୍ ଇନିକା ଇନ୍ଉତେ, ଏଣ୍ତେସ୍ ୱାକ୍ ତିଲାତେ ମାର୍ହେ । ଜିସୁ ନାଣ୍ତ ଲୋକାଙ୍ଗ୍ ତରାୟଆତାନ୍ ( ମାତିଉ ୨୮:୯-୧୦ ; ଜୋହନ ୨୦:୧୧-୧୮ ) 9 ଆଦିୱାର୍ତି ନାଣ୍ତିଙ୍ଗ୍ ନାଡ଼ାକାଦେ ଜିସୁ ସାତି ମାଣାନ୍ ମାରିଡ଼େସି ନିଙ୍ଗିଁଜି, ଆମାତାନି ମାଣାନ୍ ସାତ୍ଗୋଟା ଦୁବେଙ୍ଗ୍ ପେରିତା ମାର୍ଆନ୍, ଆୟା ମଗ୍ଦଲିନି ମରିୟମ୍ତିଙ୍ଗ୍ ୱିଜେରିଙ୍ଗ୍ ଆଗ୍ଡ଼ି ତରାତାନ୍ । 10 ୱାଦ୍ ସର୍ହାଦୋ, ଏମେକେଙ୍ଗ୍ ତାନି ସଙ୍ଗ୍ ଆତେ ମାର୍ହେ, ସିସୁରିଙ୍ଗ୍ କାବୁର୍ ସିତାତ୍; ୱାର୍ ୱିଜେରେ ଦୁଃକ୍ କିଜି ମାରି ଆଡ଼୍ବାଜି ମାର୍ଆର୍ । 11 ଜିସୁ ସାତି ମାଣାନ୍ ଜିତାମାନାନ୍ ମାରି ତାନିଙ୍ଗ୍ ତରାତା ମାନାନ୍, ଆୟା ମାଟା ୱେନ୍ଜି ସିସୁର୍ ବିସ୍ବାସ୍ କିଏତାର୍ । ଜିସୁ ରିଏର୍ ସିସୁରିଙ୍ଗ୍ ତରାତାନ୍ ( ଲୁକ ୨୪:୧୩-୩୫ ) 12 ଇୟାୱିଜୁ ଗଟାତି ୱେନ୍କା ୱାରି ଲୋଇ ରିଏର୍ ଉଣ୍ତ୍ରି ନାର୍ତୁ ସନିୱାଲେ ଜିସୁ ସାର୍ଦୁ ଆଇ ମୁର୍ତି ଆଜି ୱାରିଙ୍ଗ୍ ତରାୟ୍ଆତାନ୍ । 13 ମାରି ୱାର୍ ସର୍ଆର୍ରୋ ଆଇ ସିସୁରିଙ୍ଗ୍ ଇୟା ମାଟା ଇର୍ହାର୍, ମାତର୍ ୱାରି ମାଟାଦିଙ୍ଗ୍ ବା ୱାର୍ ମାନାଏତାର୍ । ଜିସୁ ଏଗାର୍ ଲୋକାଙ୍ଗ୍ ତରାତାନ୍ ( ମାତିଉ ୨୮:୧୬-୨୦ ; ଲୁକ ୨୪:୩୬-୪୯ ; ଜୋହନ ୨୦:୧୯-୨୩ ; ପ୍ରେରିତ ୧:୬-୮ ) 14 ସାରାସାରି ୱେନ୍କା ଏଗାର୍ ଲୋକୁ ସିସୁର୍ ଉଣ୍ତେଙ୍ଗ୍ ବାସ୍ତି ମାର୍ଇ ୱାଲେ ଜିସୁ ୱାରିଙ୍ଗ୍ ତରାୟ୍ଆତାନ୍, ୱାର୍ ୱେର୍ତି ମାଟାଦିଙ୍ଗ୍ ୱାର୍ ବିସ୍ବାସ୍ କିଏତାର୍ ମାରି ୱାର୍ ତାମେ ଜିବନ୍ ଆଟୁୱା କିତାର୍, ଆୟା ଉଣ୍ତିଙ୍ଗ୍ ଜିସୁ ୱାରିଙ୍ଗ୍ ଲାଗାତାନ୍ । 15 ମାରି, ଜିସୁ ସିସୁରି ଲାକ୍ତୁ ୱାଜି ଇର୍ହାନ୍, “ମିର୍ ସାରା ଦୁନିଆଦୁ ସଲ୍ସି ୱିଜୁ ଲୋକ୍ଜାତିଦୁ ସୁସମାଚାର୍ ପ୍ରଚାର୍ କିଦୁ । 16 ଏନ୍ ବିସ୍ବାସ୍ କିଜ ଡୁବନ୍ ଅନାନ୍, ୱାଣ୍ତ୍ରୁ ରକିୟା ପଇନାନ୍; ମାତର୍ ଏନ୍ ଅବିସ୍ବାସ୍ କିନାନ୍, ୱାନିଙ୍ଗ୍ ମାପୁରୁ ଦଣ୍ଡ୍ ସିନାନ୍ । 17 ମାରି, ବିସ୍ବାସ୍ସି ଲୋକା ଇୟାୱିଜୁ ସିନେଙ୍ଗ୍ ଆନେ, ୱାର୍ ନା ଦର୍ତାନ୍ ଦୁବେଙ୍ଗ୍ ପେର୍ନାର୍, ପୁନି ପୁନି ବାସାଦୁ ମାଟା ଇନାର୍, 18 କିକାଙ୍ଗ୍ ସାରାସ୍କୁ ଆସ୍ନାର୍, ମାରି ଇନି ୱିସାମ୍ତି ମାୟାମ୍ ଉଟିଙ୍ଗ୍ ବା ୱାରି ଇନିକା ନାସ୍ଟୁ ଆଏତ୍; ୱାର୍ ନବ୍ଆତି ଲୋକା ମୁସ୍କୁ କିୟୁ ଇଟ୍ତିଙ୍ଗ୍ ୱାର୍ ନେଗେନ୍ଆନାର୍ ।” ଜିସୁ ମୁସ୍କୁପୁର୍ ସର୍ଆନ୍ ( ଲୁକ ୨୪:୫୦-୫୩ ; ପ୍ରେରିତ ୧:୯-୧୧ ) 19 ସିସୁରିଙ୍ଗ୍ ଇୟାୱିଜୁ ମାଟା ଇର୍ଇ ୱେନ୍କା ପ୍ରବୁ ଜିସୁ ମୁସ୍କୁପୁର୍ ସର୍ଆନ୍ନୋ ମାପୁରୁଦି ଉଣି କିୟୁ ତରିଣ୍ତ୍ ବାସ୍ତାନ୍ । 20 ମାତର୍ ସିସୁର୍ ଆୟା ବାଡିଦାଣ୍ତ୍ ଡ଼େସିୱାଜି ସାରା ଦୁନିଆଦୁ ଜିସୁଦି ସୁସମାଚାର୍ ପ୍ରଚାର୍ କିତାର୍, ମାରି ପ୍ରବୁ ୱାରିୱାଲେ ଅର୍ସେ ମାନ୍ଜି ଆୟା ସିନେଣ୍କୁ ଆୟା ବାକ୍ୟ ସତ୍ଇଜି ୱେଙ୍ଗିଁସ୍ଏତାନ୍ । |
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020