మత్తయి 23 - ମାପୁରୁଦି ସତ୍ ବାକ୍ୟ ପୁନି ନିୟମ୍ଦର୍ମଗୁରୁ ମାରି ପାରୁସିର୍ ବିରଦ୍ତାନ୍ ଜିସୁଦି ଜାଗାର୍ତାମାନି ମାଟା ( ମାର୍କ ୧୨:୩୮-୩୯ ; ଲୁକ ୧୧:୪୩ ; ୨୦:୪୫-୪୬ ) 1 ଜିସୁ ସିସୁରିଙ୍ଗ୍ ମାରି ୱିଜୁଲୋକାଙ୍ଗ୍ ଇର୍ହାନ୍, 2 ଦାର୍ମୁଗୁରୁ ମାରି ପାରୁସିର୍ ମୋସାଦି ନିୟମ୍ତିଙ୍ଗ୍ ସିକିୟା ସିଦେଙ୍ଗ୍ ଅଦିକାର୍ ପୟ୍ତିମାନି ୱେର୍ନିକାର୍, 3 ଆଦେଙ୍ଗ୍ ୱାର୍ ଆମାକା କିଦେଙ୍ଗ୍ ୱେର୍ସିନାର୍, ଆକା କିଦୁ । ମାତର୍ ୱାରି ପାଣି ଇସାବ୍ତାନ୍ ପାଣି କିମାଟ୍ । ଇରିଙ୍ଗ୍ ୱାର୍ ନିଜେ ୱେର୍ସିମାନି ସିକିୟା ଇସାବ୍ତାନ୍ ପାଣି କିଏର୍ । 4 ୱାରି ସିକିୟାୱିଜୁ ଲୋକା ମୁଟାମ୍ ମୁସ୍କୁ ନାଣ୍ତ ବଜୁ ୱାଜା ତିଗ୍ନାସିନାର୍, ମାତର୍ ଆୟାୱିଜୁ ବଜୁ ପିଣ୍ତିଦେଙ୍ଗ୍ଇଜି ନିଜେଦି ଡ଼ାସ୍କାଦାନ୍ ବା ଅଡ଼ପ୍ବା ସାକା କିଏର୍ । 5 ୱାର୍ ଲୋକାଙ୍ଗ୍ ତର୍ତେଙ୍ଗ୍ଁ ଇଜି ୱିଜୁ ପାଣି କିନାର୍ । ସୁଡ଼ୁଦୁ, ୱାର୍ ସାସ୍ତ୍ର ପଦ୍ ରାସାତିମାନି ଏସି ଏସି ମାଟେଙ୍ଗ୍ ମୁଜୁଦୁ ନି ରେକାଦୁ ତରାତାମାନାର୍ । ମାରି ସୁଡ଼ୁଦୁ, ୱାର୍ ଆରାନିମାନି ପେରି ପେରି ୱାତିଦି ଜାଲିଙ୍ଗ୍ ୱିଜୁ ଏସ ନିରିକା । 6 ୱାର୍ ବଜିଙ୍ଗାଁ ନେଗି ବାଡି ମାରି ପାର୍ତନାକିନି ଇଲ୍କାଙ୍ଗ୍ ପେରି ବାଡି ଅଦିକାର୍ କିଦେଙ୍ଗ୍ ନେଗେନ୍ଅଡ଼୍ବିନାର୍ । 7 ମାରି ସାତାସାଉକାଦୁ ମାଡ଼ିସ୍କିନିକା ପୟ୍ଦେଙ୍ଗ୍ ମାରି ଲୋକା ମାଣାନ୍ ଏ ଗୁରୁ, ଇଜି ମାନାଦେଙ୍ଗ୍ ନେଗେନ୍ଅଡ଼୍ବିନାର୍ । 8 ମାତର୍ ମିଙ୍ଗିଁ ଏନ୍ ଗୁରୁ ଇଜି କୁକ୍ନିକା ଟିକ୍ ସିଲେ । ଇରିଙ୍ଗ୍ ମିର୍ ୱିଜିଦେର୍ ନିଜେନିଜେଦି ତଡ଼ାନ୍କୁ ମାରି ମି ଗୁରୁ କେବଲ୍ ଅରେନ୍ନେ । 9 ମାରି ଦୁନିଆଦୁ ମିର୍ ଏଙ୍ଗ୍ବା ବୁବା ଇଜି ମାନାନିକା ଟିକ୍ ସିଲେ, ଇରିଙ୍ଗ୍ ମି ବୁବା ଅରେନ୍ନେ, ୱାନ୍ ମୁସ୍କୁପୁର୍ତୁ ମାନାନ୍ । 10 ମିଙ୍ଗିଁ ମାଲିକ୍, ଇଜି ଏନ୍ବା କୁକ୍ମାକିନ୍, ଇରିଙ୍ଗ୍ ମି ଅରେନ୍ମାତର୍ ମାଲିକ୍ ଆଜିନାନ୍ ମସିହ । 11 ମି ଲୋଇରାନ୍ ଏନ୍ ୱିଜେରିମାଣାନ୍ ପେରିକାନ୍, ୱାନ୍ ମି ସେବା କିପିନ୍ । 12 ଏନ୍ ନିଜେଦିଙ୍ଗ୍ ମୁସ୍କୁ ପେରାନାନ୍, ୱାନିଙ୍ଗ୍ ଆଡ୍ଗି କିନାର୍ ମାରି ଏନ୍ ନିଜେଦିଙ୍ଗ୍ ଆଡ୍ଗି କିଆନାନ୍, ୱାନିଙ୍ଗ୍ ମୁସ୍କୁ ପେରିସିକିନାର୍ । ସାଲାକି ଦାର୍ମୁଲୋକାଙ୍ଗ୍ ଜିସୁ ସେମାର୍କିତାନ୍ ( ମାର୍କ ୧୨:୪୦ ; ଲୁକ ୧୧:୩୯-୪୨ , ୪୪ , ୫୨ ; ୨୦:୪୭ ) 13 ଏ ଦାର୍ମୁଗୁରୁ ନି ପାରୁସିର୍ ମି ୱେନ୍କାରି ଦସ୍ ଏସା ବୟ୍ଙ୍କାର୍ ! ଏ ସାଲାକି ଦାର୍ମୁଦଲ୍, ମୁସ୍କୁପୁର୍ରାଜିଦି ଡ଼ୁଗୁନି ସେର୍ଲା କେର୍ତିମାନିଦେର୍ । ମିର୍ ନିଜେ ଆବେ ଡ଼ୁଗୁଇଜିନିଦେର୍ ମାରି ଆମାକାର୍ ଡ଼ୁଗୁଦେଙ୍ଗ୍ ବଦାକିଜିନାର୍, ୱାରିଙ୍ଗ୍ ସାରି ଡ଼ିସ୍ଇଜିନିଦେର୍ । 14 ଏ କପଟି ଦାର୍ମୁଗୁରୁ ନି ପାରୁସିର୍, ମି ଦସ୍ ଏସା ତାଗ୍ଇକାଆନାତ୍ । ଇରିଙ୍ଗ୍ ମିର୍ ସାଲାକିଦାନ୍ ନିର୍ଇ ପାର୍ତାନା କିନି ଦାପେ ଦାପେ ରାଣ୍ତି ଆଇମେକା ଇଲୁକୁ ୱିଜୁ ଡ଼ିବିସ୍ସୋ ଅନିଦେର୍; ଆଦେଙ୍ଗ୍ ମିର୍ ନାଣ୍ତ ଦଣ୍ଡ୍ ପଇନିଦେର୍ । 15 ଏ କପଟି ଦାର୍ମୁଗୁରୁ ନି ପାରୁସିର୍, ମି ଦସ୍ ଏସା ତାଗ୍ଇକାଆନାତ୍ । ମିର୍ ସାମୁଦୁର୍ ନାସି ଆଇ ଦେସ୍କାଙ୍ଗ୍ ସୋଲ୍ସି ଅରେନ୍ୱାନିଙ୍ଗ୍ ମି ଦାର୍ମୁଦୁ ମିସାକିଦେଙ୍ଗ୍ ଇଜି ପୟ୍ଜିବୁଲାଜିନିଦେର୍ । ମାତର୍ ଆୟାୱାଜା ଅରେନ୍ୱାନିଙ୍ଗ୍ ପୟ୍ତିଙ୍ଗ୍, ୱାନିଙ୍ଗ୍ ନରକଦୁ ଦଣ୍ଡ୍ ପୟ୍ଦେଙ୍ଗ୍ ମିମାଣାନ୍ ଦୁଇଗୁଣୁ ନାଣ୍ତ ସାକା କିଜିନିଦେର୍ । 16 ଏ କାଣା ସାରିବୁଲାନିକାର୍, ମି ଦସ୍ ଏସ ତିଲାନିକା । ମିର୍ ସିକିୟା ସିଜିମାନିଦେର୍, ଏନ୍ ମନ୍ଦିର୍ ଦର୍ତାନ୍ ପାରାମାଣ୍ କିତିଙ୍ଗ୍, ଆକା ୱାନ୍ କିଦେଙ୍ଗ୍ କୁସାମାତ୍ ସିଲେ; ମାତର୍ ମନ୍ଦିର୍ତୁ ମାନି ବାଙ୍ଗାଁରାମ୍ ଦର୍ତାନ୍ ଏନ୍ ପାରାମାଣ୍ କିତିଙ୍ଗ୍ ୱାନିଙ୍ଗ୍ ଆକା କିଦେଙ୍ଗ୍ ପଡ଼ାନାତ୍ । 17 ଏ କାଣା ବୁଦି ସିଲିକିଦେରା, ବାଙ୍ଗାଁରାମ୍ ପେରିକା ନୋ ବାଙ୍ଗାଁରାମ୍ତିଙ୍ଗ୍ ପବିତ୍ର କିଜିମାନି ମନ୍ଦିର୍ ପେରିକା ? 18 ମିର୍ ବା ସିକିୟା ସିଜିମାନିଦେର୍, ଅରେନ୍ ଲୋକୁ ବେଦି ଦର୍ତାନ୍ ପାରାମାଣ୍ କିତିଙ୍ଗ୍, ୱାନ୍ ଆକା କିଦେଙ୍ଗ୍ କୁସାମାତ୍ ସିଲେ । ମାତର୍ ବେଦି ମୁସ୍କୁ ଇଡିନିମାନି ପୁଜାସିନି ଦର୍ତାନ୍ ପାରାମାଣ୍ କିତିଙ୍ଗ୍, ଆକା ନିୟମ୍ସିଲେତ୍ । 19 ମିର୍ ଏସା କାଣାର୍, ଆମାକା ପେରି ପୁଜାସିନିକା ନୋ ପୁଜାସିନିତାନିଙ୍ଗ୍ ପବିତ୍ର କିଜିମାନି ବେଦି ? 20 ମାରି ଏନ୍ ବେଦି ଦର୍ତାନ୍ ପାରାମାଣ୍ କିତିଙ୍ଗ୍, ୱାନ୍ ବେଦି ମାରି ଆୟା ମୁସ୍କୁ ମାନି ୱିଜୁ ପୁଜାସିନି ସାମାନ୍କା ଦର୍ତାନ୍ ପାରାମାଣ୍ କିନାନ୍ । 21 ଏନ୍ ମନ୍ଦିର୍ ଦର୍ତାନ୍ ପାରାମାଣ୍ କିତିଙ୍ଗ୍ ୱାନ୍ ମନ୍ଦିର୍ ମାରି ଆବେନୁ ବାସାଜିମାନି ମାପୁରୁ ଦର୍ତାନ୍ ପାରାମାଣ୍ କିନାନ୍ । 22 ମାରି, ଏନ୍ ମୁସ୍କୁପୁର୍ତି ଦର୍ତାନ୍ ପାରାମାଣ୍ କିତିଙ୍ଗ୍, ମାପୁରୁଦି ରାଜାଗାଦି ମାରି ତାନିମୁସ୍କୁ ବାସ୍ତିମାନି ମାପୁରୁ ଦର୍ତାନ୍ ପାରାମାଣ୍ କିନାନ୍ । 23 ଏ କପଟି ଦାର୍ମୁଗୁରୁ ନି ପାରୁସିର୍, ମି ଅବସ୍ତା ବେସି ତାଗ୍ଇକାଆନାତ୍ ! ମିର୍ ମାପୁରୁଦି ଉଦେସ୍ଦାନ୍ ପୋଦିନା, ପାନ ମଊରି ମାରି ଜିରାଦି ବା ଦସ୍ବାଗ୍ତାନ୍ ଉଣ୍ତ୍ରି ବାଗ୍ ମାପୁରୁଙ୍ଗ୍ଁ ଦାନ୍ ସିନିଦେର୍; ମାତର୍ ନ୍ୟାୟ୍ ବିସାର୍, ଦୟା, ବିସ୍ବାସ୍ ଇୟାୱିଜୁ ନିୟମ୍ତି ପେରି ପେରି ବିସୟ୍କୁ ୱେଡ଼ା କିଜିନିଦେର୍ । ନିୟମ୍ତି ଇୟା ବିସୟ୍କୁ ଆଗ୍ଡ଼ି ଅବ୍ୟାସ୍ କିନିକା ମାନାତ୍ । 24 ଏ କାଣା ସାରିଦୁବୁଲାନିକାର୍, ମିର୍ ଇନିକା ଉଣିୱାଲେ ଆନାତ୍ ଆବେ ୱିଜା ଆର୍ନାମାନାତ୍ ଇଜି ତାନିଙ୍ଗ୍ ଜଲପ୍ନିଦେର୍, ମାତର୍ ଉଟ୍ତିଙ୍ଗ୍ ଡ଼ିଙ୍ଗିଁନିଦେର୍ । 25 ଏ କପଟି ଦାର୍ମୁଗୁରୁ ମାରି ପାରୁସିର୍, ଏସା ବୟଙ୍କାର୍ ମି ସାରାସାରି ବୁଲାନିକା । ମିର୍ ଡୁବାଇ ନି ସାଡ଼ାୱାଦି ଆତେରେ ତରିନ୍ ନେଗେନ୍ ନୋର୍ଜିମାନିଦେର୍, ମାତର୍ ଆୟାୱାନିକା ଲୋଇ ଗିଦ୍ରି ନି ଆକାର୍ ବର୍ତି ଆତାମାନାତ୍ । 26 “ଏ କପଟି ଦାର୍ମୁଗୁରୁ ମାରି ପାରୁସିର୍, ଆଗ୍ଡ଼ି ଡୁବାଇତି ଲୋଇରିକା ନେଗେନ୍ ନର୍ଦୁ, ଏଣ୍ତେସ୍ ଆବେଣି ଆତ୍ରେଦିକା ବା ନେଗେନ୍ ନୋର୍ଆୟ୍ଆନାତ୍ ! 27 “ଏ କପଟି ଦାର୍ମୁଗୁରୁ ନି ପାରୁସିର୍ ! ମିର୍ ଏସା ନାଣ୍ତ ଦସ୍ ବଗାନିଦେର୍ । ମିର୍ ୱିଜୁ ଆତେରେ ତରିନ୍ ସୁନ୍ତିରିପାତିମାନି ମୁସ୍ତିବାଡିଦି ୱାଜା । ଆକା ଆତେରେ ସୁନ୍ଦର୍ ତର୍ନାତ୍, ମାତର୍ ଲୋଇ ପେଡେକ୍ ନି ସାବ୍ତି ମାଡ଼ାଦାନ୍ ବର୍ତି । 28 ଆୟାୱାଜା ମିର୍ ବା ଆତେରେ ଲୋକା ଆଗ୍ଡ଼ି ନେଗେନ୍ ତର୍ନିଦେର୍, ମାତର୍ ମି ଲୋଇରିକା ସାଲାକି ନି ପାପ୍ତୁ ବର୍ତି । ଜିସୁ ୱାରି ଦଣ୍ତବଗାନିକା ବିସୟ୍ତାନ୍ ୱେର୍ତାନ୍ ( ଲୁକ ୧୧:୪୭-୫୧ ) 29 “ଏ କପଟି ଦାର୍ମୁଗୁରୁ ନି ପାରୁସିର୍ ! ମି ଉଣ୍ତିଙ୍ଗ୍ ଇକା ଏସା ବୟ୍ଙ୍କାର୍ । ବାବବାଦିରି ଉଣ୍ତିଙ୍ଗ୍ ମିର୍ ସୁନ୍ଦର୍ତି ମୁସ୍ନିବାଡି ତିଆର୍କିଜିନିଦେର୍ ମାରି ଦାର୍ମୁଲୋକାରି ଏତ୍କିନି ମୁଣ୍ତା ୱିଜୁ ରସ୍ସିନିଦେର୍ । 30 ମାରି ମିର୍ ଇଜିନିଦେର୍, ଜଦି ମି ପୁର୍ବେଦିଡକ୍ରାଦାଦାରି ବେଡ଼ାଦୁ ମିର୍ ତେବାତିଙ୍ଗ୍ମାନ୍ଦି, ଆର୍ତିଙ୍ଗ୍ ୱାରି ୱାଜା କିଇତିଦେର୍ମାନ୍ଦି ମାରି ବାବବାଦିରିଙ୍ଗ୍ ଡାକ୍ଇତିଦେର୍ମାନ୍ଦି । 31 ଇୟା ମାଟା ୱେର୍ନି ମାଣ୍କୁ ସତ୍ ଇଜି ମାନାଜିନିଦେର୍ ଜେ ମିର୍ ବାବବାଦିରିଙ୍ଗ୍ ସାୟାମାର୍ଗା ଡାକ୍ତିୱାରି କୁଟୁମ୍ । 32 ଆର୍ତିଙ୍ଗ୍ ମିର୍ ଆଗ୍ଡ଼ି ସାଦୁ, ମି ପୁର୍ବେଦିଡକ୍ରାଦାଦାରି ଆରାମ୍ କିତି ପାଣିଦିଙ୍ଗ୍ ପୁରା କିଦୁ । 33 ଏ ସାରାସ୍କୁ ! ଏ ବିସ୍ମାନି ସାରାସ୍ତି କଡ଼ର୍ ! ମିର୍ ନରକ ଦଣ୍ତ୍ତାନ୍ ରକ୍ଷାପୟ୍ନାପ୍ ଇଜି ଆସାକିଜିନିଦେର୍ ? 34 ଆଦେଙ୍ଗ୍ ନାନ୍ ୱେର୍ସିନା; ନାନ୍ ମି ଲାକ୍ତୁ ବାବବାଦିର୍, ଗୁରୁର୍ ମାରି ବୁଦିମାନିୱାରିଙ୍ଗ୍ ପୋକ୍ତାନା; ୱାରି ଲୋଇରାନ୍ ଏଙ୍ଗ୍ ଏଙ୍ଗ୍ ସାୟାମାର୍ଗା ଡାକ୍ନିଦେର୍, ଏସ ଲୋକାଙ୍ଗ୍ କ୍ରୁସଦୁ ସାୟାମାର୍ଗା ଡାକ୍ନିଦେର୍ ମାରି ଆଇୱାରିଙ୍ଗ୍ ପାର୍ତନାକିନି ଇଲ୍କାଙ୍ଗ୍ କର୍ଡା ଡାକ୍ସି ଉନ୍ଡ୍ରି ଗାଡ଼୍ତାନ୍ ମାରି ଉନ୍ଡ୍ରି ଗାଡ଼୍ତୁ ପେର୍ନିଦେର୍ । 35 ଆମା ଦାର୍ମୁ ହେବଲ୍ତି ସାତି ମାଣାନ୍ ଆମା ବେରିକିୟଦି ମାରିସି ଜିକରିୟଙ୍ଗ୍ ମିର୍ ମନ୍ଦିର୍ତି ପବିତ୍ର ବାଡିଦୁ ନି ପୁଜାସିନି ବେଦି ନାଡ଼୍ମି ସାୟାମାର୍ଗା ଡାକ୍ତିଦେର୍, ୱାନି ସାତି ସାନ୍ଦି ଦୁନିଆଦୁ ଏସଲୋକ୍ ୱିଜୁ ଦାର୍ମୁଦି ଲୋକାଙ୍ଗ୍ ସାୟାମାର୍ଗା ଡାକ୍ତିମାନିଦେର୍ । ଆୟା ଦୋସ୍ସିଲି ଲୋକା ସାତିମାନି ଦଣ୍ଡ୍ ମି ମୁସ୍କୁ ୱାନାତ୍ । 36 ନାନ୍ ମିଙ୍ଗିଁ ସତ୍ ୱେର୍ସିନା, ଇୟାୱିଜୁ ଲୋକାଙ୍ଗ୍ ସାୟାମାର୍ଗା ଡାକ୍ତି ଉଣ୍ତିଙ୍ଗ୍ ଇୟା ଜଗ୍ତି ଲୋକୁ ଦଣ୍ଡ୍ ବଗାନିଦେର୍ । ଜିରୁସାଲାମ୍ତି ଉଣ୍ତିଙ୍ଗ୍ ଜିସୁଦି ଜିବନ୍ନୋନିକା ( ଲୁକ ୧୩:୩୪-୩୫ ) 37 “ଏ ଜିରୁସାଲାମ୍, ଏ ଜିରୁସାଲାମ୍ ! ମିର୍ ବାବବାଦିରିଙ୍ଗ୍ ସାୟାମାର୍ଗାଡାକ୍ସିନିଦେର୍ ମାରି ମାପୁରୁ ପୋକ୍ତାତି କାବୁର୍ ଅନିତାନି ୱାରିଙ୍ଗ୍ କାଲ୍କୁ ପୋକ୍ସି ଡାକ୍ସିନିଦେର୍ । କରୁ ତାନି ରେକା ଆଡ୍ଗି ପିଲେକାଙ୍ଗ୍ ଆସ୍ସି ଇଡ୍ନି ୱାଜା, ମି ଲୋକାଙ୍ଗ୍ ନା ରେକା ଆଡ୍ଗି ପିଡ଼୍କିନି ଉଣ୍ତିଙ୍ଗ୍ ନାନ୍ ଏସ ଦେବେଙ୍ଗ୍ ବଦାକିତା । ମାତର୍ ମିର୍ ନାଙ୍ଗିଁ ଆକା କିଦେଙ୍ଗ୍ ସିଇତିଦେର୍ । 38 ଆଦେଙ୍ଗ୍ ମି ମନ୍ଦିର୍ ୱିର୍ଜାଜି ମାରି ୱାରିକା ଆନାତ୍ । 39 ନାନ୍ ମିଙ୍ଗିଁ ୱେର୍ସିନା, ‘ପ୍ରବୁଦି ଦର୍ତାନ୍ ଏନ୍ ୱାଜିନାନ୍, ୱାନ୍ ଦନ୍ୟ,’ ମିର୍ ଇୟା ମାଟା ଇନ୍ଇ ସାନ୍ଦି ଇଲେଇରାନ୍ ନାଙ୍ଗିଁ ମାରି ସୁଡ଼ୁଦେଙ୍ଗ୍ ଆଟ୍ଇଦେର୍ ।” |
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020