యోహాను 18 - ମାପୁରୁଦି ସତ୍ ବାକ୍ୟ ପୁନି ନିୟମ୍ଜିସୁ ସର୍ପେଆତାନ୍ ( ମାତିଉ ୨୬:୪୭-୫୬ ; ମାର୍କ ୧୪:୪୩-୫୦ ; ଲୁକ ୨୨:୪୭-୫୩ ) 1 ଜିସୁ ଇୟା ପାର୍ତନା ୱିସ୍ଇ ସିସୁରି ୱାଲେ କିଦ୍ରୋଣ୍ ଜଲାଦି ଆୟାପାଡ଼୍କା ସୋର୍ହାର୍ । ଆବେନୁ ଉନ୍ଡ୍ରି ଡଡି ମାର୍ହାତ୍, ମାରି ୱାନ୍ ନି ୱାନି ସିସୁର୍ ଆବେନୁ ଡ଼ୁଗିତାର୍ । 2 ଆମା ଜିହୁଦା ଜିସୁଙ୍ଗୁଁ ସାତ୍ରୁରି କିୟୁଦୁ ସର୍ପେ କିତାନ୍, ୱାନ୍ ବା ଆୟାବାଡି ନେସ୍ତା ମାର୍ହାନ୍, ଇରିଙ୍ଗ୍ ଜିସୁ ନାଣ୍ତ ଦେବେଙ୍ଗ୍ ନିଜେଦି ସିସୁରି ୱାଲେ ଆୟାବାଡିଦୁ ସୋଲ୍ସିମାର୍ହାର୍ । 3 ମାରି, ଜିହୁଦା ସନ୍ୟରିଦଲ୍ ମାରି ପେରି ଜାଜକର୍ ମାରି ପାରୁସିରିମାଣୁକୁ ମନ୍ଦିର୍ କାପ୍କିନିୱାରିଙ୍ଗ୍ ଅସି ଦିୱା, ମସାଲ୍ ମାରି ସାଜୁମାଜୁ ଆସ୍ସି ଆବେନୁ ୱାତାର୍ । 4 ଆବେଟ୍ ଜିସୁ, ୱାନି ଉଣ୍ତିଙ୍ଗ୍ ଆମା ଆମାକା ଗଟାଦେଙ୍ଗ୍ ସୋଲ୍ସିନାତ୍, ଆୟାୱିଜୁ ନେସ୍ତାନ୍ନୋ ଆଗ୍ଡ଼ି ସୋଲ୍ସି ୱାରିଙ୍ଗ୍ ୱେନ୍ବାତାନ୍, “ମିର୍ ଏଙ୍ଗ୍ ପୟ୍ଜିନିଦେର୍ ?” 5 ୱାର୍ ୱାନିଙ୍ଗ୍ ଇର୍ହାର୍, “ନାଜରିୟତିୟ ଜିସୁଙ୍ଗୁଁ ।” ଜିସୁ ୱାରିଙ୍ଗ୍ ଇର୍ହାନ୍, “ନାନ୍ ଆୟା ଜିସୁ ।” ଆମା ଜିହୁଦା ୱାନିଙ୍ଗ୍ ସାତ୍ରୁରି କିୟୁଦୁ ସର୍ପେ କିତାନ୍, ୱାନ୍ ବା ୱାରି ୱାଲେ ନିର୍ଆମାର୍ହାନ୍ । 6 ଜିସୁ ଏସ୍ତିୱାଲେ ୱାରିଙ୍ଗ୍ ଇର୍ହାନ୍, “ନାନ୍ ଆୟାକାନ୍,” ନାସ୍ତିୱାଲେ ୱାର୍ ୱେନ୍କା ଗୁସାଜିସୋଲ୍ସି ବୁମିଦୁ ଆର୍ତାର୍ । 7 ଆବେଟ୍ ଜିସୁ ୱାରିଙ୍ଗ୍ ମାରି ଅର୍ସୁ ୱେନ୍ବାତାନ୍, “ମିର୍ ଏଙ୍ଗ୍ ପୟ୍ଜିନିଦେର୍ ?” ୱାର୍ ଇର୍ହାର୍, ନାଜରିୟତିୟ୍ ଜିସୁଙ୍ଗୁଁ । 8 ଜିସୁ ଇର୍ହାନ୍, “ନାନ୍ନେ ଆୟାକାନ୍,” ଇକା ତୋ ନାନ୍ ମିଙ୍ଗିଁ ୱେର୍ତା । “ଜଦି ମିର୍ ନାଙ୍ଗିଁ ପୟ୍ଜିନିଦେର୍, ଆରିଙ୍ଗ୍ ଇୟାୱାରିଙ୍ଗ୍ ସନ୍ଡ଼୍ରେଙ୍ଗ୍ ଡ଼ିସ୍ତୁ ।” 9 ୱାନ୍ ଇକା ଇର୍ହାନ୍, ଏଣ୍ତେସ୍ ୱାନ୍ ଇର୍ହିମାର୍ଇ ଇୟା ବାକ୍ୟ ପୁରା ଆନାତ୍, ନିନ୍ ନାଙ୍ଗିଁ ଆମାୱାରିଙ୍ଗ୍ ସିତିମାନି, ୱାରି ମାଣ୍କୁ ନାନ୍ ଅରେନ୍ୱାନିଙ୍ଗ୍ ବା ଆରାକିଏ । 10 ସିମୋନ ପିତର୍ ଲାକ୍ତୁ ଉନ୍ଡ୍ରି କାଆଣ୍ତା ମାର୍ହାତ୍, ଆୟା କାଆଣ୍ତା ସୋପ୍ତାନ୍ନୋ ୱିଜେରିଙ୍ଗ୍ ପେରିଜାଜକରି ସାକର୍ତିଙ୍ଗ୍ କାତ୍ତାନ୍ ମାରି ଆୟା ସାକର୍ତି ଉଣେରି ଗିତ୍ଣି କୟ୍ତାପୋକ୍ତାନ୍; ଆୟା ସାକର୍ତି ଦର୍ ମାଲ୍କ । 11 ଆବେଟ୍ ଜିସୁ ପିତରତିଙ୍ଗ୍ ଇର୍ହାନ୍, “ନିନ୍ କାଣ୍ତାଦିଙ୍ଗ୍ ଇଡ଼୍ନିବାଡିଦୁ ଇଡିଆ; ବୁବା ନାଙ୍ଗିଁ ଏମେ ଡୁବାଇ ସିତାମାନ୍ନାନ୍, ନାନ୍ ଇନିକା ଆବେଣ୍କୁ ଉଣୁଏନୋ ?” ହାନାନ୍ଦି ଆଗ୍ଡ଼ି ଜିସୁ ( ମାତିଉ ୨୬:୫୭-୫୮ ; ମାର୍କ ୧୪:୫୩-୫୪ ; ଲୁକ ୨୨:୫୪ ) 12 ଇୟା ୱେନ୍କା ରମିୟ ସନ୍ୟରିଦଲ୍, ପେରି ସେନାପତିର୍, ମାରି ଜିହୁଦିରିଙ୍ଗ୍ କାପ୍କିନିକାର୍ ଜିସୁଙ୍ଗୁଁ ଆସ୍ସି ତର୍ତାର୍ 13 ମାରି ୱାନିଙ୍ଗ୍ ଆଗ୍ଡ଼ି ହାନାନଦି ଲାକ୍ତୁ ଅତାର୍, ଇରିଙ୍ଗ୍ ୱାନ୍ ଆୟା ବାର୍ସେକ୍ତି ୱିଜେରିଙ୍ଗ୍ ପେରିଜାଜକ୍ କୟାପାଦି ପତେଲ୍ସି ମାର୍ହାନ୍ । 14 ଇୟା କୟାପା ଆଗ୍ଡ଼ି ଜିହୁଦି ନେତାର୍ ୱେର୍ତା ମାର୍ହାନ୍, ୱିଜୁ ଲୋକା ନେଗି ଉଣ୍ତିଙ୍ଗ୍ ଅରେନ୍ ସାନିକା ନେଗେତ୍ । ଜିସୁଙ୍ଗୁଁ ପିତର୍ ନେସେଏ ଇଜି ଇର୍ହାନ୍ ( ମାତିଉ ୨୬:୬୯-୭୦ ; ମାର୍କ ୧୪:୬୬-୬୮ ; ଲୁକ ୨୨:୫୫-୫୭ ) 15 ସିମୋନ ପିତର୍ ନି ମାରି ଅରେନ୍ ସିସୁ ଜିସୁଦି ୱାଲେ ୱାଲେ ସୋଲ୍ସିମାର୍ହାନ୍ । ଆୟା ସିସୁ ୱିଜେରିଙ୍ଗ୍ ପେରିଜାଜକ୍ଦିଙ୍ଗ୍ ନେସ୍ତିକାନ୍ ମାର୍ହାନ୍ ମାରି ଜିସୁଦି ୱାଲେ ୱିଜେରିଙ୍ଗ୍ ପେରିଜାଜକଦି ଦୁଆର୍ତୁ ଡ଼ୁଗିତାର୍; 16 ମାତର୍ ପିତର୍ ଆତେରେ ଡେୱା ଲାକ୍ତୁ ନିର୍ଆ ମାର୍ହାନ୍ । ମାରି, ଆୟା ଏମେ ଆଇ ସିସୁ ୱିଜେରିଙ୍ଗ୍ ପେରିଜାଜକଦିଙ୍ଗ୍ ନେସ୍ତିକାନ୍ ମାର୍ହାନ୍, ୱାନ୍ ଆତେରେ ସୋର୍ର୍ହାନ୍ନୋ ଡେୱାଦୁ କାପ୍କିନିୱାନିଙ୍ଗ୍ ୱେର୍ସି ପିତରତିଙ୍ଗ୍ ଦୁଆର୍ ଲୋଇ ତାତାର୍ । 17 ଆବେଟ୍ ଆୟା ଡେୱାଦୁ କାପ୍କିନି ସାକର୍ ପିତରତିଙ୍ଗ୍ ଇର୍ହାତ୍, “ନିନ୍ ବା ଇନିକା ଇୟା ଲୋକାଦି ସିସୁରି ଲୋଇରାନ୍ ଅରେନ୍ ଆଇନୋ ?” ପିତର୍ ଇର୍ହାନ୍, “ନାନ୍ ସିଲେ ।” 18 ପିନିଦି ଉଣ୍ତିଙ୍ଗ୍ ସାକର୍ ନି କାପ୍କିନିକାର୍ ସିସୁ କାସ୍ସିକିଜି ଆବେନୁ ନିର୍ଆରୋ ସିସୁ କାୟାଜି ମାର୍ହାର୍; ପିତର୍ ବା ୱାରି ୱାଲେ ନିର୍ଆନୋ ସିସୁ କାୟାଜି ମାର୍ହାନ୍ । ଜିସୁଙ୍ଗୁଁ ପେରିଜାଜକ୍ଦି ୱେନ୍ବାନିକା ( ମାତିଉ ୨୬:୫୯-୬୬ ; ମାର୍କ ୧୪:୫୫-୬୪ ; ଲୁକ ୨୨:୬୬-୭୧ ) 19 ଆୟାଦାପ୍ରେ ୱିଜେରିଙ୍ଗ୍ ପେରିଜାଜକ୍ ଜିସୁଙ୍ଗୁଁ ୱାନି ସିସୁରି ବିସୟ୍ତାନ୍ ମାରି ୱାନି ସିକିୟା ବିସୟ୍ତାନ୍ ୱେନ୍ବାତାନ୍ । 20 ଜିସୁ ୱାନିଙ୍ଗ୍ ଇର୍ହାନ୍, “ନାନ୍ ଦୁନିଆ ଲାକ୍ତୁ ନେସ୍ନିୱାଜା ମାଟା ଇର୍ଆମାନା; ଏମେମାନୁ ୱିଜେରେ ଜିହୁଦିର୍ ଉନ୍ଡ୍ରେମାନୁ ଆନାର୍, ଇୟାୱାଜା ପାର୍ତନାକିନି ଇଲ୍କାଙ୍ଗ୍ ମାରି ମନ୍ଦିର୍ତୁ ନାନ୍ ୱିଜୁଦିନ୍ ସିକିୟା ସିତାମାନା; ନାନ୍ ଇନି ବିସୟ୍ ଆଡ଼ାକ୍ସି ୱାଜା ଇନ୍ଏ । 21 ନାଙ୍ଗିଁ ଏନ୍ଦା ୱେନ୍ବାଜିନି ? ନାନ୍ ୱାରିଙ୍ଗ୍ ଇନିକା ଇର୍ହାମାନା, ଏମେକାର୍ ୱେର୍ଆମାନାର୍, ୱାରିଙ୍ଗ୍ ୱେନ୍ବାଆ; ସୁଡ଼ୁଆ, ନାନ୍ ଆମା ଆମାକା ଇର୍ଆମାନା, ୱାର୍ ଆୟାୱିଜୁ ନେସ୍ନାର୍ ।” 22 ଜିସୁ ଇୟା ମାଟା ଇନିୱାଲେ ଜିସୁଦି ଲାକ୍ତୁ ନିର୍ଇ ମାର୍ଇ କାପ୍କିନିକାନ୍ ଅରେନ୍ ଜିସୁଙ୍ଗୁଁ ସାପାଡ଼ା ଡାକ୍ସି ଇର୍ହାନ୍, “ନିନ୍ ୱିଜେରିଙ୍ଗ୍ ପେରି ଜାଜକଙ୍ଗ୍ ଏଣ୍ତେସ୍ ଉତର୍ ୱେର୍ସିନି ?” 23 ଜିସୁ ୱାନିଙ୍ଗ୍ ଇର୍ହାନ୍, “ଜଦି ନାନ୍ ବୁଲ୍ ଇର୍ଆ, ଆର୍ତିଙ୍ଗ୍ ୱିଜେରି ଆଗ୍ଡ଼ି ବୁଲ୍ତି ସାକି ସିଦାଟ୍; ମାତର୍ ଜଦି ନେଗେନ୍ ଇର୍ହା, ଆର୍ତିଙ୍ଗ୍ ଏନ୍ଦା ନାଙ୍ଗିଁ ଡାକ୍ସିନି ?” 24 ଆବେଟ୍ ହାନାନ ଜିସୁଙ୍ଗୁଁ ତରାତିମାନି ଡ଼ାସାନେ ୱିଜେରିଙ୍ଗ୍ ପେରିଜାଜକ୍ କୟାପାଦି ଲାକ୍ତୁ ପୋକ୍ତାନ୍ । ଜିସୁଙ୍ଗୁଁ ପିତର୍ ମାରିଡ଼େସି ନେସେଏ ଇଜି ଇର୍ହାନ୍ ( ମାତିଉ ୨୬:୭୧-୭୫ ; ମାର୍କ ୧୪:୬୯-୭୨ ; ଲୁକ ୨୨:୫୮-୬୨ ) 25 ଆବେଟ୍ ସିମୋନ ପିତର୍ ନିର୍ଆରୋ ସିସୁ କାୟାଜି ମାର୍ହାର୍ । ଆବେଟ୍ ୱାର୍ ୱାନିଙ୍ଗ୍ ୱେନ୍ବାତାର୍, “ନିନ୍ ବା ଇନିକା ୱାନି ସିସୁରି ଲୋଇରାନ୍ ଅରେନ୍ ଆଇନୋ ?” ପିତର୍ ନେସେଏ ଇଜି ଇର୍ହାନ୍, “ନାନ୍ ସିଲେ ।” 26 ୱିଜେରିଙ୍ଗ୍ ପେରିଜାଜକଦି ସାକର୍କା ଲୋଇରାନ୍ ଅରେନ୍, ଅର୍ତାତ୍ ପିତର୍ ଆମାୱାନି ଗିତଣି କୟ୍ତାପୋକ୍ତା ମାର୍ହାନ୍, ଆୟା ସାକର୍ତି ନିଜେଲୋକ୍ ଇର୍ହାନ୍, “ନାନ୍ ଇନିକା ନିଙ୍ଗିଁ ୱାନି ୱାଲେ ଡଡିଦୁ ସୁଡ଼ୁଏ ମାର୍ହା ନୋ ?” 27 ଆବେଟ୍ ପିତର୍ ମାରିଡ଼େସି “ନେସେଏ” ଇଜି ଇର୍ହାନ୍, ମାରି, ଆୟାଦାପ୍ରେ କରୁ କେଡ଼ିତାତ୍ । ଜିସୁଙ୍ଗୁଁ ପିଲାତ୍ତି ଆଗ୍ଡ଼ି ତାତାର୍ ( ମାତିଉ ୨୭:୧-୨ , ୧୧-୧୪ ; ମାର୍କ ୧୫:୧-୫ ; ଲୁକ ୨୩:୧-୫ ) 28 ୱେନ୍କା ୱାର୍ ଜିସୁଙ୍ଗୁଁ କୟାପାଦି ଇଲ୍ତାନ୍ ଅସି ରମିୟ ରାଜାଦି ମେଡ଼୍ଇଲୁତୁ ଅତାର୍; ନାସ୍ତିୱାଲେ କରୁ କେଡ଼େପି ଆତାମାର୍ହାତ୍; ମାରି, ଜିହୁଦି ନେତାର୍ ଏଣ୍ତେସ୍ ତାଗ୍ଇକା ଆଏଣ୍ଗା ନିସ୍ତାର୍ ପଣ୍ତୟ୍ତି ବୋଜି ଉନ୍ଣ୍ତେଙ୍ଗ୍ ଆଟ୍ନାର୍, ଇୟାଉଣ୍ତିଙ୍ଗ୍ ନିଜେ ମେଡ଼େଇଲୁ ଲୋଇ ଡ଼ୁଗ୍ଏତାର୍ । 29 ମାରି, ରାଜା ପିଲାତ୍ ୱାରି ଲାକ୍ତୁ ସୋସି ୱାଜି ୱେନ୍ବାତାନ୍, “ଇୟା ଲୋକ୍ତି ବିରଦ୍ତାନ୍ ମି ମାଟା ଇନିକା ?” 30 ୱାର୍ ୱାନିଙ୍ଗ୍ ଇର୍ହାର୍, “ଇୟାକାନ୍ ଜଦି ଦସ୍କିତିକାନ୍ ଆଏତାନ୍ ମାନ୍ଦି, ଆର୍ତିଙ୍ଗ୍ ମାପ୍ ୱାନିଙ୍ଗ୍ ନି କିୟୁଦି ସର୍ପେ କିଏତାପ୍ ମାନ୍ଦି ।” 31 ଆବେଟ୍ ପିଲାତ୍ ୱାରିଙ୍ଗ୍ ଇର୍ହାନ୍, “ମିର୍ ୱେନିଙ୍ଗ୍ ଅସ ମି ନିୟମ୍ତାନ୍ ୱେନି ବିସାର୍ କିଦୁ ।” ଜିହୁଦିର୍ ୱାନିଙ୍ଗ୍ ଇର୍ହାର୍, “ଏଙ୍ଗ୍ ସାନିଦଣ୍ତ୍ ସିନି ମା ଅଦିକାର୍ ସିଲେତ୍ ।” 32 ଜିସୁ ଏଣ୍ତେସ୍ ନାନି ସାନିଦଣ୍ତ କିଦେଙ୍ଗ୍ ସୋଲ୍ସିନାନ୍, ଆବେଣି ସିନା ସିଜି ୱାନ୍ ଆମା ବାକ୍ୟ ଇର୍ହାମାର୍ହାନ୍ ଆକା ଏଣ୍ତେସ୍ ପୁରା ଆନାତ୍, ଇୟାଉଣ୍ତିଙ୍ଗ୍ ୱାର୍ ଇକା ଇର୍ହାର୍ । 33 ମାରି, ପିଲାତ୍ ମେଡ଼୍ଇଲୁ ଲୋଇ ଡ଼ୁଗିତାନ୍ନୋ ଜିସୁଙ୍ଗୁଁ କୁକ୍ତାନ୍ନୋ ୱାନିଙ୍ଗ୍ ୱେନ୍ବାତାନ୍, “ନିନ୍ ଇନିକା ଜିହୁଦିର୍ ରାଜା ?” 34 ଜିସୁ ୱାନିଙ୍ଗ୍ ଇର୍ହାନ୍, “ନିନ୍ ଇନିକା ନିଜେଦାନ୍ ଇକା ଇଜିନି, ନୋ ଆଇକାର୍ ନା ବିସୟ୍ତାନ୍ ନିଙ୍ଗିଁ ଇକା ୱେର୍ତାମାନାର୍ ?” 35 ପିଲାତ୍ ଇର୍ହାନ୍, “ନାନ୍ ଇନିକା ଅରେନ୍ ଜିହୁଦି ? ମି ନିଜେଦି ଲୋକୁ ମାରି ପେରି ଜାଜକର୍ ନିଙ୍ଗିଁନା କିୟୁଦୁ ସର୍ପେ କିତାମାନାର୍; ନିନ୍ ଇନିକା କିତିମାନି ?” 36 ଜିସୁ ଇର୍ହାନ୍, “ନା ରାଜି ଇୟା ଦୁନିଆଦି ବିସୟ୍ ଆଏତ୍; ଜଦି ନା ରାଜି ଇୟା ଦୁନିଆଦି ବିସୟ୍ତାନ୍ ଆତାତ୍ମାନ୍ଦି, ଆର୍ତିଙ୍ଗ୍ ନାନ୍ ଏଣ୍ତେସ୍ ଜିହୁଦି ନେତାର୍ କିୟୁଦୁ ସର୍ପେ ଆଏତାମାନ୍ଦି, ଆୟାଉଣ୍ତିଙ୍ଗ୍ ନାୱାଲେ ବୁଲାନିକାର୍ ଜୁଦ୍ କିତାର୍ମାନ୍ଦି, ମାତର୍ ନା ରାଜି ସତ୍ତାନ୍ନେ ଇୟା ଦୁନିଆ ବିସୟ୍ତାନ୍ ସିଲେ ।” 37 ଆବେଟ୍ ପିଲାତ୍ ୱାନିଙ୍ଗ୍ ୱେନ୍ବାତାନ୍, “ଆର୍ତିଙ୍ଗ୍ ନିନ୍ ଇନିକା ଅରେନ୍ ରାଜା ନୋ ?” ଜିସୁ ଇର୍ହାନ୍, “ନିନ୍ତୋ ଇଜିନି, ନାନ୍ ଅରେନ୍ ରାଜା । ନାନ୍ ଏଣ୍ତେସ୍ ସତ୍ତି ତରିନ୍ ସାକି ସିନା, ଇୟାଉଣ୍ତିଙ୍ଗ୍ ନାନ୍ ଜନମ୍ ଆତାମାନା ମାରି ଦୁନିଆଦୁ ୱାତାମାନା । ଏନ୍ ସତ୍ତି ମାରିନ୍, ୱାନ୍ ନା ମାଟା ୱେନ୍ନାନ୍ ।” 38 ପିଲାତ୍ ୱାନିଙ୍ଗ୍ ଇର୍ହାନ୍, “ସତ୍ ଇନିକା ?” ଇକା ଇନ୍ଜି ୱାନ୍ ମାରି ଜିହୁଦିଲୋକା ଲାକ୍ତୁ ଆତ୍ରେ ସୋର୍ଆନ୍ନୋ ୱାରିଙ୍ଗ୍ ଇର୍ହାନ୍, ନାନ୍ ଦଣ୍ତ୍ସିନି ଉଣ୍ତିଙ୍ଗ୍ ୱେନିମାନୁ ଇନି ଦୋସ୍ ପୟ୍ଏଜିନା । ଜିସୁଙ୍ଗୁଁ ସାନିଦଣ୍ତତି ଆଦେସ୍ ସିତାର୍ ( ମାତିଉ ୨୭:୧୫-୩୧ ; ମାର୍କ ୧୫:୬-୨୦ ; ଲୁକ ୨୩:୧୩-୨୫ ) 39 ମାତର୍ ନାନ୍ ଜେ ନିସ୍ତାର୍ ପଣ୍ତୟ୍ତିୱାଲେ ମି ଉଣ୍ତିଙ୍ଗ୍ ଅରେନ୍ୱାନିଙ୍ଗ୍ ଡ଼ିସ୍ସିକିନିକା, ଇକା ମି ରିତି ମାନାତ୍; ମାରି, ଜିହୁଦିର୍ ରାଜେଙ୍ଗ୍ ନାନ୍ ମି ଉଣ୍ତିଙ୍ଗ୍ ଡ଼ିସ୍ନା ସିନାପ୍ ଇଜି ଇନିକା ମି ବଦା ? 40 ଆବେଟ୍ ୱାର୍ ମାରିଡ଼େସି ଆଉଲି ଆଜି ଇର୍ହାର୍, ଇୟା ଲୋକତିଙ୍ଗ୍ “ସିଲେ, ମାତର୍ ବାରବ୍ବାଙ୍ଗ୍ ଡ଼ିସ୍ଆ ।” ଇୟା ବାରବ୍ବା ଅରେନ୍ ଡଙ୍ଗାଁର୍ଏନ୍ ମାର୍ହାନ୍ । |
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020