యోహాను 11 - ମାପୁରୁଦି ସତ୍ ବାକ୍ୟ ପୁନି ନିୟମ୍ଲାଜାର୍ତି ସାନିକା 1 ବେତନିୟା ନାର୍ତି ଲାଜାର୍ ଦର୍ତିକାନ୍ ଅରେନ୍ ଲୋକୁ ନବ୍ ଆତାମାର୍ହାନ୍; ମରିୟମ୍ ମାରି ତାନି ତାଙ୍ଗିଁସି ମାର୍ତା ଆୟା ନାଟ ମାନ୍ଞ୍ଜି ମାର୍ଏ । 2 ଇକାତ୍ ଆୟା ମରିୟମ୍, ଏମେକାତ୍ ପ୍ରବୁଦି ପାଦାମ୍କାଙ୍ଗ୍ ନିୟୁ ୱାକ୍ସି ନିଜେଦି କୁକୁଟିଦାନ୍ ୱାନି ପାଦାମ୍କୁ ତେଲିତାମାର୍ହାତ୍, ତାନି ତଡ଼ାସି ଲାଜାର୍ ନବ୍ ଆତାମାର୍ହାନ୍ । 3 ଆଦେଙ୍ଗ୍ ଆୟା ତାଙ୍ଗିଁକ୍ ଜିସୁଦି ଲାକ୍ତୁ କାବୁର୍ ପକ୍ତେ, “ପ୍ରବୁ ସୁଡ଼ୁଆ, ଆମାୱାନିଙ୍ଗ୍ ନିନ୍ ଜିବନ୍ନୋନି, ନି ସଙ୍ଗ୍, ୱାନ୍ ନବ୍ ଆତାମାନାନ୍ ।” 4 ମାତର୍ ଜିସୁ ଆକା ୱେନ୍ଜି ଇର୍ହାନ୍, “ଇୟା ନବ୍ ସାନି ଉଣ୍ତିଙ୍ଗ୍ ସିଲେ, ମାତର୍ ମାପୁରୁଦି ଦନ୍ୟବାଦ୍ତି ଉଣ୍ତିଙ୍ଗ୍, ଏଣ୍ତେସ୍ ଆୟାବାଣାନ୍ ମାପୁରୁଦି ମାରିନ୍ ବା ଦନ୍ୟବାଦ୍ ପଇନାନ୍ ।” 5 ଜିସୁ ମାର୍ତା, ୱାନି ତାଙ୍ଗିଁ ମରିୟମ୍ ନି ଲାଜାର୍ତିଙ୍ଗ୍ ଜିବନ୍ ନଜି ମାର୍ହାନ୍ । 6 ମାରି, ଲାଜାର୍ ନବ୍ ଆତାମାନାନ୍ ଇଜି ଏସ୍ତିୱାଲେ ୱାନ୍ ୱେର୍ଆନ୍, ନାସ୍ତିୱାଲେ ୱାନ୍ ଏମେ ବାଡିଦୁ ମାର୍ହାନ୍, ଆୟାବାଡିଦୁ ମାରି ରିନେନ୍ ତେବାତାନ୍ । 7 ତାନିୱେନ୍କା ୱାନ୍ ସିସୁରିଙ୍ଗ୍ ଇର୍ହାନ୍, “ସାଦୁ, ମାଡ୍ ଜିହୁଦା ରାଜିଦୁ ଡ଼େସି ସନାଟ୍ ।” 8 ସିସୁର୍ ଜିସୁଙ୍ଗୁଁ ଇର୍ହାର୍, “ଏ ଗୁରୁ, ଜିହୁଦିର୍ ଏସ ଦିନ୍ ଆଗ୍ଡ଼ି ନିଙ୍ଗିଁ କାଲ୍କାଣ୍ ଡାକ୍ତେଙ୍ଗ୍ଁ ବଦା କିଜିମାର୍ହାର୍, ମାରି ନିନ୍ ମାରିଡ଼େସି ଆବେ ସଲ୍ସିନି ?” 9 ଜିସୁ ଇର୍ହାନ୍, “ୱେଡ଼େ ଇନିକା ବାର ଗନ୍ଟା ସିଲେତ୍ ? ଏନ୍ ୱେଡ଼େ ବୁଲାତିଙ୍ଗ୍ ତାକାଏନ୍, ଇରିଙ୍ଗ୍ ୱାର୍ ଇୟା ଦୁନିଆଦି ଜାୟ୍ ସୁଣାନ୍; 10 ମାତର୍ ନାଡ଼ା ବୁଲାତିଙ୍ଗ୍ ୱାନ୍ ତାକାନାନ୍, ଇରିଙ୍ଗ୍ ୱାରିମାନୁ ଜାୟ୍ ସିଲେତ୍ । 11 ଜିସୁ ଇୟାୱିଜୁ ମାଟା ଇର୍ଇ ୱେନ୍କା ୱାରିଙ୍ଗ୍ ମାରି ଇର୍ହାନ୍, ମା ତଡ଼୍ ଲାଜାର୍ ସୁଜ୍ଜିନାନ୍, ମାତର୍ ୱାନିଙ୍ଗ୍ ସୁସ୍କାଣ୍କାଣ୍ ନିକ୍ତେଙ୍ଗ୍ ଇଜି ନାନ୍ ସଲ୍ସିନା ।” 12 ଆବେଟ୍ ସିସୁର୍ ଜିସୁଙ୍ଗୁଁ ଇର୍ହାର୍, “ପ୍ରବୁ, ଜଦି ଲାଜାର୍ ସୁସ୍ତାମାନାନ୍, ଆରିଙ୍ଗ୍ ୱାନ୍ ନେଗେନ୍ ଆନାନ୍ ।” 13 ଜିସୁ ଲାଜାର୍ତି ସାନି ବିସୟ୍ତାନ୍ ଇର୍ହାନ୍, ମାତର୍ ୱାନ୍ ସୁସ୍କାଣ୍କାଙ୍ଗ୍ ସୁସ୍ତି ବିସୟ୍ତାନ୍ ଇର୍ହାନ୍ ଇଜି ସିସୁର୍ ଅଡ଼୍ବିତାର୍ । 14 ମାରି, ଜିସୁ ନାସ୍ତିୱାଲେ ୱାରିଙ୍ଗ୍ ବୁଜାନିୱାଜା ଇର୍ହାନ୍, “ଲାଜାର୍ ସାତାମାନାନ୍ । 15 ମାରି, ନାନ୍ ଜେ ଆୟାବାଡିଦୁ ସିଲେତା, ଇୟାଉଣ୍ତିଙ୍ଗ୍ ମି ଉଣ୍ତିଙ୍ଗ୍ ୱେଡ଼ିକା ଆଜିନା, ଏଣ୍ତେସ୍ ମିର୍ ବିସ୍ବାସ୍ କିନିଦେର୍; ମାତର୍ ସାଦୁ, ମାଡ୍ ୱାନିଙ୍ଗ୍ ସୁଡ଼ୁଦେଙ୍ଗ୍ ସନାଟ୍ ।” 16 ଆବେଟ୍ ତୋମା ଆମାୱାନିଙ୍ଗ୍ ଦିଦୁମ ଇଜି ଇନାର୍, ୱାନ୍ ୱାନି ତଡ଼୍ ସିସୁରିଙ୍ଗ୍ ଇର୍ହାନ୍, “ସାଦୁ, ମାଡ୍ ବା ଗୁରୁୱାଲେ ସଲ୍ସି ୱାନିୱାଲେ ସାନାଟ୍ ।” ଜିସୁ ଜିନିକାନ୍ ମାରି ଜିବନ୍ 17 ଜିସୁ ବେତନିଆଦୁ ଇତାନ୍ନୋ ୱେର୍ଆନ୍ ଜେ, ଲାଜାର୍ ନାଲ୍ନେନ୍ ଆତାତ୍ ଦୁକି ଗୁଟାଦୁ ମୁସ୍ତାର୍ନି । 18 ବେତନିୟା ଜିରୁସାଲାମ୍ ଲାକ୍ତୁ ମାର୍ହାତ୍, ମୁନ୍ଡ୍ରି କିଲମିଟର୍ତାନ୍ ଉଣା; 19 ମାରି, ଜିହୁଦିର୍ ମାଣୁକୁ ନାଣ୍ତ ଲୋକୁ ମାର୍ତା ନି ମରିୟମ୍ତିଙ୍ଗ୍ ତାନି ତଡ଼ାନ୍ ସାତି ବିସୟ୍ତାନ୍ ସୁକୁ ସିଦେଙ୍ଗ୍ ଇଜି ତାମେ ଲାକ୍ତୁ ୱାତାମାର୍ହାର୍ । 20 ଆବେଟ୍ ଜିସୁ ୱାଜିନାନ୍ ଇଜି ଏସ୍ତିୱାଲେ ମାର୍ତା ୱେର୍ଆତ୍, ନାସ୍ତିୱାଲେ ୱାଦ୍ ଜିସୁଙ୍ଗୁଁ ବେଟ୍ବୁଡ଼ାଦେଙ୍ଗ୍ ସର୍ହାତ୍, ମାତର୍ ମରିୟମ୍ ଇନ୍ଡ୍ର ବାସ୍ତା ତେବାତାତ୍ । 21 ମାର୍ତା ଜିସୁଙ୍ଗୁଁ ଇର୍ହାତ୍, “ପ୍ରବୁ, ଜଦି ନିନ୍ ଇବେ ମାର୍ଇମାନ୍ଦି, ଆତିଙ୍ଗ୍ ନା ତଡ଼ାନ୍ ସାଏତାନ୍ମାନ୍ଦି । 22 ମାତର୍ ଇଲେଇବା ନାନ୍ ନେସ୍ନା, ନିନ୍ ମାପୁରୁଙ୍ଗୁଁ ଆମାକା ଲସ୍ନି, ମାପୁରୁ ଜେ ଆକା ନିଙ୍ଗିଁ ସିନାନ୍ ।” 23 ଜିସୁ ତାନିଙ୍ଗ୍ ଇର୍ହାନ୍, “ନି ତଡ଼ାନ୍ ଜିବନ୍ ପୟ୍ଜି ନିଙ୍ଗିଁନାନ୍ ।” 24 ମାର୍ତା ଜିସୁଙ୍ଗୁଁ ଇର୍ହାତ୍, “ୱାନ୍ ଜେ ୱିଜ୍ନି ଦିନ୍ତୁ ମାରିଡ଼େସି ନିଙ୍ଗିଁନି ୱାଲେ ନିଙ୍ଗିଁନାନ୍, ଇକା ନାନ୍ ନେସ୍ନା ।” 25 ଜିସୁ ତାନିଙ୍ଗ୍ ଇର୍ହାନ୍, “ନାନ୍ ମାରିଜିନିକାନ୍ ମାରି ଜିବନ୍; ଏନ୍ ନାବାନ୍ ବିସ୍ବାସ୍ କିନାନ୍, ୱାନ୍ ଜଦିବା ସାନାନ୍, ମାତର୍ ୱାନ୍ ମାରିଡ଼େସି ଜିନାନ୍ । 26 ମାରି ଏନ୍ ଜିନାନ୍ ମାରି ନାବାନ୍ ବିସ୍ବାସ୍ କିନାନ୍, ୱାନ୍ ଏସାଙ୍ଗ୍ବା ସାଏନ୍; ଇକା ଇନିକା ବିସ୍ବାସ୍ କିଜିନି ?” 27 ମାର୍ତା ଜିସୁଙ୍ଗୁଁ ଇର୍ହାତ୍, “ହୁଁ ପ୍ରବୁ, ଆମାୱାନିଦି ଦୁନିଆଦୁ ୱାନିକା ମାର୍ହାତ୍, ନିନ୍ ଜେ ମାପୁରୁଦି ମାରିନ୍ ଆୟା ମସିହ, ଇକା ନା ବିସ୍ବାସ୍ ।” ଜିସୁ ଆଡ଼୍ବାତାନ୍ 28 ଇକା ଇର୍ଇ ୱେନ୍କା ମାର୍ତା ସଲ୍ସି ତାନି ତାଙ୍ଗିଁ ମରିୟମ୍ତିଙ୍ଗ୍ ନେସ୍ଇୱାଜା କୁକ୍ସି ଇର୍ହାତ୍, “ଗୁରୁ ୱାତାନ୍ନି ମାରି ନିଙ୍ଗିଁ କୁକ୍ସିନାନ୍ ।” 29 ମରିୟମ୍ ଇକା ୱେନ୍ଜି ବେଗି ନିଙ୍ଗିଁଜି ଜିସୁ ଲାକ୍ତୁ ସର୍ହାତ୍ । 30 ଜିସୁ ନାସ୍ତିୱାଲେ ନାର୍ ଲୋଇ ରେଏନ୍ ମାର୍ହାନ୍, ମାତର୍ ମାର୍ତା ୱାନିଙ୍ଗ୍ ଏମେ ବାଡିଦୁ ବେଟ୍ବୁଡ଼ାତା ମାର୍ହାତ୍, ଆୟା ସାନ୍ଦି ୱାନ୍ ଆୟା ବାଡିଦୁ ମାର୍ହାନ୍ । 31 ମାରି, ଏମେ ଜିହୁଦିର୍ ୱାନିୱାଲେ ଇନ୍ଡ୍ର ମାନ୍ଜି ମରିୟମ୍ତିଙ୍ଗ୍ ସୁକୁ ସିଜିମାର୍ହାର୍, ୱାର୍ ମରିୟମ୍ତିଙ୍ଗ୍ ବେଗି ନିଙ୍ଗ୍ଜି ସହସି ସନିକା ସୁଡ଼ୁଜି, ୱାଦ୍ ଦୁକି ଲାକ୍ତୁ ଆଡ଼୍ବାଦେଙ୍ଗ୍ ଇଜି ସଲ୍ସିନାତ୍, ଇକା ଅଡ଼୍ବିଜି ତାନି ୱେନ୍କା ୱେନ୍କା ସର୍ହାର୍ । 32 ଆବେଟ୍ ଜିସୁ ଏମେ ବାଡିଦୁ ମାର୍ହାନ୍, ମରିୟମ୍ ଆୟା ବାଡିଦୁ ଇଗା ସଲ୍ସି ୱାନିଙ୍ଗ୍ ସୁଡ଼ୁଜି ୱାନି କାଲ୍କା ଆଡ୍ଗି ମାଡ଼ିସ୍ କିଜି ଇର୍ହାତ୍, “ପ୍ରବୁ, ଜଦି ନିନ୍ ଇବେ ଇଗା ୱାତିମାନ୍ଦି, ଆତିଙ୍ଗ୍ ନା ତଡ଼ାନ୍ ସାଏତାନ୍ମାନ୍ଦି ।” 33 ମାରି, ଜିସୁ ତାନିଙ୍ଗ୍ ମାରି ତାନି ୱାଲେ ୱାତିମାନି ଜିହୁଦିରିଙ୍ଗ୍ଁ ଆଡ଼୍ବାନିକା ସୁଡ଼ୁଜି ଆତ୍ମାତୁ ଆଡ଼୍ବାଜି, ମାରି ପାଣି ପୁରା କିଦେଙ୍ଗ୍ ଇଜି ନାଣ୍ତ ବଦାଦାନ୍ ୱେନ୍ବାତାନ୍, 34 ୱାନିଙ୍ଗ୍ ଏମେ ଇଟ୍ଟି ମାନିଦେର୍ ? ୱାର୍ ୱାନିଙ୍ଗ୍ ଇର୍ହାର୍, “ପ୍ରବୁ, ୱାଜି ସୁଡ଼ୁଆ ।” 35 ଜିସୁ ଆଡ଼୍ବାତାନ୍ । 36 ଆବେଟ୍ ଜିହୁଦିର୍ ଇର୍ହାର୍, ସୁଡ଼ୁଦୁ, ୱାନ୍ ୱାନିଙ୍ଗ୍ ଏଣ୍ତେସ୍ ଜିବନ୍ନୋଜି ମାର୍ହାନ୍ । 37 ମାତର୍ ୱାରି ଲୋଇ ଏନ୍ ଏନ୍ ଇର୍ହାର୍, “ଇୟା ଏମେକାନ୍ ଆୟା କାଣାଦି କାଣୁକୁ ସୁଡ଼ିସ୍ କିଏନ୍ ମାର୍ହାନ୍ ନୋ ? ୱାନ୍ ଇନିକା ଲାଜାର୍ତି ସାନିତାନେଙ୍ଗ୍ ବା ତେବାକିଦେଙ୍ଗ୍ ଆଟ୍ଏତାନ୍ମାନ୍ଦି ?” ଜିସୁ ଲାଜାର୍ତିଙ୍ଗ୍ ସାତିମାଣାନ୍ ନିକ୍ତାନ୍ 38 ଆବେଟ୍ ଜିସୁ ମାରିଡ଼େସି ଆତ୍ମାଦୁ ଆଡ଼୍ବାଜି ଦୁକିଗୁଟା ଲାକ୍ତୁ ୱାତାନ୍; ଆକା ଉଣ୍ତ୍ରି ସାର୍ରା, ମାରି ତାନି ଦୁଆର୍ ଆଗ୍ଡ଼ି ଉଣ୍ତ୍ରି କାଲୁ ମାର୍ହାତ୍ । 39 ଜିସୁ ଆଦେସ୍ ସିତାନ୍, “ଇୟା କାଲୁ ଗୁସାକିଦୁ ।” ସାତି ଲୋକ୍ତି ତାଙ୍ଗିଁସି ମାର୍ତା ଜିସୁଙ୍ଗୁଁ ଇର୍ହାତ୍, “ପ୍ରବୁ, ୱାନ୍ କାପୁ ଆଜିମାନାନ୍, ଇରିଙ୍ଗ୍ ୱାନିଙ୍ଗ୍ ମୁସ୍ତାର୍ ନାଲ୍ନେନ୍ ଆତାନ୍ନି ।” 40 ଜିସୁ ତାନିଙ୍ଗ୍ ଇର୍ହାନ୍, “ଜଦି ନିନ୍ ବିସ୍ବାସ୍ କିନି, ଆରିଙ୍ଗ୍ ମାପୁରୁଦି ମହିମା ସୁଣି, ଇକା ଇନିକା ନାନ୍ ନିଙ୍ଗିଁ ଇନ୍ଏତା ?” 41 ଆବେଟ୍ ୱାର୍ କାଲୁ ଗୁସାକିତାର୍ । ମାରି, ଜିସୁ ମୁସ୍କୁ ସୁଡ଼ୁଜି ଇର୍ହାନ୍, “ବୁବା, ନିନ୍ ନା ପାର୍ତନା ୱେର୍ଇ ଇଜି ନାନ୍ ନିଙ୍ଗିଁ ଦନ୍ୟବାଦ୍ ସିଜିନା । 42 ନିନ୍ ଜେ ୱିଜୁୱାଲେ ନା ପାର୍ତନା ୱେନ୍ଜମାନି, ଇକା ନାନ୍ ନେସ୍ତାମାନା; ମାତର୍ ଏମେ ଲୋକୁ ୱିଜେରେ ସାରିବେଡ଼୍ତି ନିର୍ହାମାନାର୍, ନିନ୍ ନାଙ୍ଗିଁ ପକ୍ତିମାନି ଇଜି ୱାର୍ ଏଣ୍ତେସ୍ ବିସ୍ବାସ୍ କିନାର୍, ଇୟାଉଣ୍ତିଙ୍ଗ୍ ୱାରି ଉଣ୍ତିଙ୍ଗ୍ ନାନ୍ ଇକା ଇର୍ଆ ।” 43 ୱାନ୍ ଇକା ଇଜି ନାଣ୍ତ ଆଉଲି ଆଜି କୁକ୍ତାନ୍, “ଲାଜାର୍ ସହସ ରାଆ ।” 44 ୱାନ୍ ସତାୱାତାନ୍; ୱାନି କିୟୁ ନି ପାଦାମ୍ ଦୁକିଦି ପାଗେଣାନ୍ ତର୍ତାମାର୍ହାର୍, ମାରି ୱାନି ମକମି ଉଣ୍ତ୍ରି ପାସିଆ କେର୍ପ୍ତା ମାର୍ହାର୍ । ଜିସୁ ୱାରିଙ୍ଗ୍ ଇର୍ହାନ୍, “ୱେନି ଗାଟି କୁତ୍ସି ସନ୍ଡ଼୍ରେଙ୍ଗ୍ ସାରି ସିଦୁ ।” ଜିସୁଦି ବିରଦ୍ତାନ୍ ୱାର୍ଗିତାର୍ ( ମାତିଉ ୨୬:୧-୫ ; ମାର୍କ ୧୪:୧-୨ ; ଲୁକ ୨୨:୧-୨ ) 45 ମାରି, ଜିହୁଦିର୍ ମାଣ୍କୁ ନାଣ୍ତ ଅର୍ତାତ୍ ଏମେକାର୍ ମରିୟମ୍ ଲାକ୍ତୁ ୱାତାମାର୍ହାର୍ ମାରି ଜିସୁଦି ପାଣି ସୁଡ଼ୁଜି, ୱାର୍ ୱାନିମାନୁ ବିସ୍ବାସ୍ କିତାର୍; 46 ମାତର୍, ୱାରି ମାଣାନ୍ ଏନ୍ ଏନ୍ ପାରୁସିର୍ ଲାକ୍ତୁ ସଲ୍ସି, ଜିସୁ ଆମାକା ଆମାକା କିତାମାର୍ହାନ୍, ଆୟାୱିଜୁ ୱାରିଙ୍ଗ୍ ୱେର୍ତାନ୍ । 47 ଆବେଟ୍ ପେରି ଜାଜକର୍ ନି ପାରୁସିର୍ ପେରିମିଟିଙ୍ଗ୍ କିଜି ଇର୍ହାର୍, “ମାଡ୍ ଇନିକା କିନିକା ? ଇୟା ଲୋକୁ ତୋ ନାଣ୍ତ କାବାଆନି ପାଣି କିଜିନାନ୍ । 48 ଜଦି ମାଡ୍ ୱାନିଙ୍ଗ୍ ଇୟାୱାଜା ଡ଼ିସ୍ନାସିନାଟ୍, ଆରିଙ୍ଗ୍ ୱିଜେରେ ୱାନିମାନୁ ବିସ୍ବାସ୍ କିନାର୍, ମାରି ରମିୟଅଦିକାରି ଲୋକୁ ୱାଜି ମା ମନ୍ଦିର୍ ନି ଜାତିଦି ୱିଜେରିଙ୍ଗ୍ ନାସ୍ଟୁ କିନାର୍ ।” 49 ମାତର୍ ୱାରିମାଣ୍କୁ ଆୟା ବାର୍ସେକ୍ତି ଉଣ୍ତିଙ୍ଗ୍ ଆସ୍କିଆଇଆତିମାନି ୱିଜେରିଙ୍ଗ୍ପେରି ଜାଜକ କୟାପା ୱାରିଙ୍ଗ୍ ଇର୍ହାନ୍, “ମିର୍ ଇନିକା କାବାର୍ !” 50 ମିର୍ ଇନିକା ବୁଜାଦେଙ୍ଗ୍ ଆଟ୍ଇଜିନିଦେର୍, ୱିଜୁ ଜାତି ନାସ୍ଟୁ ଆନି ବାଦ୍ଲୁ ଅରେନ୍ ଲୋକୁ ସାନିକା ଟିକ୍ମାନାତ୍ । 51 କୟାପା ନିଜେଦି ମନ୍ତାନ୍ ଇକା ଇନ୍ଏନ୍ ମାର୍ହାନ୍, ମାତର୍ ୱାନ୍ ଆୟା ବାର୍ସେକ୍ତି ୱିଜେରିଙ୍ଗ୍ପେରି ଜାଜକ ମାର୍ହାନ୍ଆକା ଇୟା ବବିସତ୍ତି ମାଟା ୱାନି ୱେୟୁଦାନ୍ ସତାମାର୍ହାତ୍ । ଜିସୁ ୱେର୍ତା ମାର୍ହାନ୍ ଜେ ୱିଜୁ ଜିହୁଦି ଲୋକାଦି, 52 ଇନ୍ଙ୍ଗାଁ ଆନିଙ୍ଗାଁ ଆତିମାନି ମାପୁରୁଦି ଲୋକାଙ୍ଗ୍ ଉଣ୍ତ୍ରେ କୁଟୁମ୍ତୁ ଉଣ୍ତାକିନି ଉଣ୍ତିଙ୍ଗ୍ ଜିସୁ ସାନାନ୍ । 53 ଆବେଟ୍ ଆୟା ନାଣ୍ତିରାନ୍ ଜିହୁଦି ନେତାର୍ ଜିସୁଙ୍ଗୁଁ ସାୟାମାର୍ଗାଡାକ୍ତେଙ୍ଗ୍ ଇଜି ଉପାୟ୍ କିତାର୍ । 54 ମାରି, ଜିସୁ ଜିହୁଦିର୍ ମାନୁ ମାରି ତରାୟ୍ଆଜି ବୁଲାସାଲା କିଏତାନ୍, ମାତର୍ ୱାନ୍ ଆୟାବାଡିଦାନ୍ ସହସି ସଲ୍ସି ସୁନ୍ସାନ୍ ରାଜିଦି ଏପ୍ରୟିମ୍ ଦର୍ତି ଉଣ୍ତ୍ରି ଗାଡ଼୍ତୁ ସର୍ହାନ୍, ମାରି ୱାନ୍ ସିସୁରିୱାଲେ ଆବେ ତେବାତାନ୍ । 55 ଜିହୁଦିର୍ ନିସ୍ତାର ପଣ୍ତୟ୍ ଲାକ୍ତୁ ମାର୍ହାତ୍, ମାରି ରାଜିଦାନ୍ ନାଣ୍ତ ଲୋକୁ ନିଜେ ନିଜେଦିଙ୍ଗ୍ ନେଗେଣ୍ତ୍ କିଦେଙ୍ଗ୍ ଇଜି ନିସ୍ତାର୍ ପଣ୍ତୟ୍ ଆଗ୍ଡ଼ିରାନ୍ନେ ଜିରୁସାଲାମ୍ତୁ ସର୍ହାର୍ । 56 ଆବେଟ୍ ୱାର୍ ଜିସୁଙ୍ଗୁଁ ପୟ୍ବୁ ପୟ୍ବୁ ମନ୍ଦିର୍ତୁ ନିର୍ଇ ମାର୍ଇୱାଲେ ୱାର୍ୱାର୍ ଇନ୍ଡ୍ରେଙ୍ଗ୍ ଆସ୍ତାର୍, ମିର୍ ଇନିକା ଅଡ଼୍ବିଜିନିଦେର୍ ? ୱାନ୍ ପଣ୍ତୟ୍ତୁ ୱାନାନ୍ ନୋ ରେଏନ୍ ? 57 ପେରି ଜାଜକର୍ ନି ପାରୁସିର୍ ଆଦେସ୍ ସିତାମାର୍ହାର୍ ଜେ ଜଦି ଏନ୍ ଜିସୁ ଏମେମାନୁ ମାନାନ୍ ଇଜି ନେସ୍ନାମାନାନ୍, ଆରିଙ୍ଗ୍ ଇୟା କାବୁର୍ ଦାପ୍ରେ ନେତାରିଙ୍ଗ୍ ୱେର୍ନା ସିନାର୍ । ଆତିଙ୍ଗ୍ ୱାର୍ ଜିସୁଙ୍ଗୁଁ ଆସ୍ନାର୍ । |
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020