ఎబ్రి 9 - ମାପୁରୁଦି ସତ୍ ବାକ୍ୟ ପୁନି ନିୟମ୍ଆଡ୍ଗିପୁର୍ ନି ମୁସ୍କୁପୁର୍ତି ପାର୍ତନା 1 ପାରତୁମ୍ତି ନିୟମ୍ତୁ ପାର୍ତନାଦି ସାରି ନି ଲୋକୁ ତିଆର୍କିତି ଉଣ୍ତ୍ରି ସେବା କିନି ଇଲୁ ବିସୟ୍ତାନ୍ ରାସାତା ମାର୍ହାତ୍ । 2 ଆୟାଇସାବ୍ତାନ୍ ଉଣ୍ତ୍ରି ପାର୍ତନା କିନି ଗୁଡ଼ା ତିଆର୍ ଆତାମାର୍ହାତ୍ । ଆବେନ୍ ମାନି ପାର୍ତୁମ୍ତି ବାକ୍ରା ପବିତ୍ର ବାଡି ଇନ୍ଜିମାର୍ହାର୍ । ଇୟା ଲୋଇ ଦିୱା ଇଡ୍ନି ବାଡି, ଉନ୍ଡ୍ରି ଟେବୁଲ୍ ମାରି ଟେବୁଲୁ ମୁସୁକୁ ମାପୁରୁଦି ଉଦେସ୍ତାନ୍ ପୁଜା ସିତିମାର୍ଇ ରୁଟି ମାର୍ହାତ୍ । 3 ପାର୍ଦା ୱେନ୍କା ଏମେ ମାରିଉଣ୍ତ୍ରି ବାକ୍ରା ମାର୍ହାତ୍, ତାନିଙ୍ଗ୍ ମହାପବିତ୍ର ବାଡି ଇନ୍ଜିମାର୍ହାର୍ । 4 ଆବେନ୍ ଉନ୍ଡ୍ରି ବାଙ୍ଗାଁରାମ୍ତି ଦୁପୁଣି ବେଦି ମାରି ବାଙ୍ଗାଁରାମ୍ତି ତିଆର୍ଆତି “ନିୟମ୍ ପେଡ଼ା” ମାର୍ହାତ୍ । ଇୟା ପେଡ଼ା ଲୋଇ “ମାନ୍ନା” ମାନି ଉନ୍ଡ୍ରି ବାଙ୍ଗାଁରାମ୍ତି ସାଟି, ହାରୋଣତି କାୟ୍ତି ବାଡିଗା ମାରି ମାପୁରୁଦି ମାଟା ରାସାତି ରୁଣ୍ତି କାଲୁକୁ ପାଟା ମାର୍ହେ । 5 ସିନ୍ଦୁକପେଡ଼ା ମୁସୁକୁ ମାପୁରୁଦି ଆବେନ୍ମାନ୍ଜି ତରାୟ୍ଆନି ୱାଜା ରେକେଙ୍ଗ୍ମାନି ରୁଣ୍ତି ଲୋକ୍ଦି ମୁର୍ତି ମାର୍ହାତ୍ । ଇୟାକାର୍ “ପାପ୍କେମା” ବାଡି ମୁସୁକୁ ରେକେଙ୍ଗ୍ ଅସାର୍ କିଜି ତେବାତାମାର୍ହାର୍, ମାତର୍ ଇଲେଇ ଇୟା ୱିଜୁଦି ବିସୟ୍ ନେଗେନ୍ତାନ୍ ୱେର୍ତେଙ୍ଗ୍ ଦରକାର୍ ସିଲେ । 6 ଆବେନ୍ ଇୟାୱାଜା ନିୟମ୍ ମାନାତ୍ ଯାଜକର୍ ୱିଜୁଦିନ୍ ଗୁଡ଼ାଦି ପାର୍ତୁମ୍ ବାକ୍ରାଦୁ ଡ଼ୁଗ୍ଜି ୱାରି ସେବା ପାଣି ପୁରା କିନାର୍ । 7 ମାତର୍ ମାରିଉନ୍ଡ୍ରି ବାକ୍ରା ଲୋଇ କେବଲ ପେରିଜାଜକଦି ସୋନି ଅଦିକାର୍ ମାନାତ୍, ୱାନ୍ ଆବେ ବାର୍ସେକ୍ତିଙ୍ଗ୍ ଅରୁସୁ ମାତ୍ର ସନାନ୍ । ୱାନ୍ ନିଜେଦି ଉଣ୍ତିଙ୍ଗ୍ ମାରି ଲୋକୁ ନେସ୍ଏଣ୍ତା କିତିମାନି ପାପ ଉଣ୍ତିଙ୍ଗ୍ ମାପୁରୁଦି ଉଦେସ୍ତାନ୍ ପୁଜା ସିଦେଙ୍ଗ୍ ଅର୍ସେ ନେତେର୍ ଆସ୍ସି ସନାନ୍ । 8 ଇୟାୱିଜୁ ବିସୟ୍ତାନ୍ ପବିତ୍ର ଆତ୍ମା ଇୟା ମାଟା ନେଗେନ୍ତାନ୍ ସିକିୟା ସିତାମାନାତ୍ ଜେ, ପାର୍ତୁମ୍ତି ବାକ୍ରା ମାନି ସାନ୍ଦି, ମହାପବିତ୍ର ବାଡିଦୁ ସନି ସାରି ରେଆଏତ୍ । 9 ଇଲେଇତି ବେଡ଼ା ସୁଡ଼୍ଜି ଇକା ଉନ୍ଡ୍ରି କାତା ୱାଜା । ତେନି ଅର୍ତ ଆଜିନାତ୍, ମାପୁରୁଦି ଉଦେସ୍ତାନ୍ ପୁଜାସିତିମାନିକା ମାରି ପସୁବଲି ଉପାସ୍କିନିୱାନି ବୁଦିଦିଙ୍ଗ୍ ପୁରା କିଦେଙ୍ଗ୍ ଆଟ୍ଏତ୍ । 10 ଇରିଙ୍ଗ୍ ଆୟାୱିଜୁ କେବଲ ଉଣି କାଦି ମାରି ସୁଚିକିନି ଉଣ୍ତିଙ୍ଗ୍ ଆତ୍ରେରି ପାଣି ମାତ୍ର । ମାପୁରୁଦି ପୁନି ନିୟମ୍ତି ତିଆର୍ଆନି ସାନ୍ଦି ଆୟାୱିଜୁଦି ଦରକାର୍ ମାର୍ହାତ୍ । 11 ମାତର୍ ଇଲେଇ ଏମେ ୱିଜୁ ନେଗି ବିସୟ୍ ମାଡ୍ ପୋୟ୍ତିମାନିକା, ଆୟାୱିଜୁଦି ପେରିଜାଜକ ୱାଜା କ୍ରିସ୍ତ ୱାତାମାନାନ୍ । ୱାନ୍ ଏମେ ପାର୍ତନା ଗୁଡ଼ାଦୁ ପାଣି କିଜିନାନ୍, ଆକା ପେରିକା ମାରି ନାଣ୍ତ ବର୍ତିଦିକା । ଆକା ଲୋକୁ ତିଆର୍ କିତିକା ଆଏତ୍ । ମାରି ଆକା ଇୟା ଦୁନିଆଦି ସିନା ଆଏତ୍ । 12 କ୍ରିସ୍ତ ଆୟା ଗୁଡ଼ା ନାଡ଼୍ମିସିଜି ଆୟା ମହାପବିତ୍ର ବାଡିଦୁ ଉନ୍ଡ୍ରେଦେବାଦି ଉଣ୍ତିଙ୍ଗ୍ ଡ଼ୁଗିନି ୱାଲେ ଆବେନ୍ ବଲିସିନି ଉଣ୍ତିଙ୍ଗ୍ ଗରିଏଙ୍ଗ୍ଁ ସିଲେତିଙ୍ଗ୍ ଡ଼ାକା ନେତେର୍ ଆସ୍ସି ସଲ୍ଏନ୍ ମାର୍ହାନ୍ । ମାତର୍ ୱାନ୍ ନିଜେଦି ନେତେର୍ ଅସି ମା ଉଣ୍ତିଙ୍ଗ୍ ୱିଜୁଦିନ୍ତିଙ୍ଗ୍ ମୁକୁଡ଼ାନି ପାଣି କିତାନ୍ । 13 ପାଡ଼ିଇ ନିୟମ୍ତାନ୍ ଏମେକାର୍ ରିତିନିତି ପାଣି ମାନାଇ ଉଣ୍ତିଙ୍ଗ୍ ଅସୁଚି, ୱାରି ମୁସୁକୁ ଗରିଏଙ୍ଗ୍ଁ ସିଲେତିଙ୍ଗ୍ ଡ଼ାକା ନେତେର୍ ମାରି ଡ଼ାକା ନିର୍ ୱାକାତିଙ୍ଗ୍, ୱାରି ଅସୁଚି ଆକ ଆନାସନାତ୍ । 14 ଇକା ଜଦି ସତ୍ ଆନାମାନାତ୍, ଆର୍ତିଙ୍ଗ୍ କ୍ରିସ୍ତଦି ନେତେର୍ ମାରି ଏସ ନାଣ୍ତ ପାଣି ସିନିକା ଆଏତ୍ ? ୱିଜୁଦିନ୍ତି ଆତ୍ମାଦି ସାକାଦାନ୍ ୱାନ୍ ନିଜେଦିଙ୍ଗ୍ ମାପୁରୁଦି ଉଦେସ୍ତାନ୍ ଉନ୍ଡ୍ରି ଦସ୍ସିଲି ପୁଜା ୱାଜା ସିତାମାନାନ୍ । ୱାନି ଆୟା ନେତେର୍ ଦାନ୍ ତାଗ୍ଇ ରିତିନିତି ପାଣିଦାନ୍ ନେଗେନ୍ ଆଜି ମା ବୁଦି ଟିକ୍ଆନାତ୍ ମାରି ମାପ୍ ଜିବନ୍ମାନି ମାପୁରୁଦି ଟିକ୍ ସେବା କିଦେଙ୍ଗ୍ ସୁଜୋଗ୍ ପୋୟ୍ନାପ୍ । 15 ଇୟାଉଣ୍ତିଙ୍ଗ୍ କ୍ରିସ୍ତ ନେ ପୁନି ନିୟମ୍ ତିଆର୍ କିତାମାନାନ୍, ଏଣ୍ତେସ୍କି ଏମେକାର୍ ମାପୁରୁଦି ମାଡ଼ାନ୍ କୁକାୟ୍ଆତାମାନାର୍, ୱାର୍ ମାପୁରୁ ପାର୍ମାଣ୍ କିତିମାନି ଏସ୍କାଙ୍ଗ୍ୱିଜିଇ ଆସିର୍ବାଦ୍ ପୋଇନାର୍ । ପାର୍ତୁମ୍ ନିୟମ ପାଣିକିଜିମାନି ବେଡ଼ାଦୁ, ଲୋକୁ ଏମେ ୱିଜୁ ପାପ୍ ଦୋସ୍ କିତାମାର୍ହାର୍, କେବଲ କ୍ରିସ୍ତଦି ସାତିମାଡ଼ାନ୍ ୱାର୍ ଆବେଟ୍କୁ ମୁକ୍ଡ଼ାନିକା ପୋଇନାର୍ । 16 ଉଣ୍ତ୍ରି ସିନି ଆକୁଦି ନିୟମ୍ ଇସାବ୍ତାନ୍, ଆକା ପାଣି ଆନି ଉଣ୍ତିଙ୍ଗ୍ ନିୟମ୍ କିତିମାନି ଲୋକ୍ଦି ସାନିକା ପାର୍ମାଣ୍ ଆନିକା ଦରକାର୍ । 17 ଇରିଙ୍ଗ୍ ନିୟମ୍ କିତିମାନି ଲୋକ୍ ଜିନିମାନି ସାନ୍ଦି, ନିୟମ୍ତି ପାଣି ସିଲେତ୍; କେବଲ୍ ୱାନି ସାତି ୱେନ୍କାନେ ଆକା ଡାଟ୍ତି ପାଣି ଆନାତ୍ । 18 ଆୟାଉଣ୍ତିଙ୍ଗ୍ ପାର୍ତୁମ୍ ନିୟମ ବା ନେତେର୍ସିନି ମାଡ଼ାନ୍ ପାଣି ଆତାମାର୍ହାତ୍ । 19 ପାର୍ତୁମ୍ ମୋସା ନିୟମ୍ତି ଆଦେସ୍କୁ ଲୋକା ଲାକୁତୁ ୱେର୍ତାର୍ । ତାନିୱେନ୍କା ୱାନ୍ ଡ଼ାକ୍ ନି ଗରିଏଙ୍ଗାଁ ନେତେର୍ ଏରୁଦି ୱାଲେ ମିସାକିଜି ଏସୋବ କମା ମାରି ଏସ ରଙ୍ଗ୍ତି ମେଣ୍ତା ବୁରୁବୁସେଙ୍ଗ୍ ଦାନ୍ ନିୟମ୍ ବଇ ମାରି ଲୋକା ମୁସୁକୁ ଲଜିତାନ୍ । 20 ୱାନ୍ ଇର୍ହାନ୍, “ଏମେ ନିୟମ୍ ମାନାଦେଙ୍ଗ୍ ମାପୁରୁ ମିଙ୍ଗିଁ ଆଦେସ୍ ସିତାମାନାନ୍, ଇୟା ନେତେର୍ ଆୟା ନିୟମ୍ତିଙ୍ଗ୍ ଟାପ୍ ଡ଼େୟ୍ଜିନାତ୍ ।” 21 ମୋସା ଆୟା ଇସାପ୍ତାନ୍ ନେତେର୍ ଅସି ଗୁଡ଼ା ମାରି ପାର୍ତନାଦୁ ବ୍ୟବ୍ହାର୍ ଆଜିମାନି ୱିଜୁ ଜିନିସ୍ ମୁସୁକୁ ଲଜିତାନ୍ । 22 ମାରି ମୋସାଦି, ନିୟମ୍ ଇସାପ୍ତାନ୍ ୱିଜୁ ବିସୟ୍ ନେତେର୍ ମାଡ଼ାନ୍ ପବିତ୍ରଆନାତ୍ ମାରି ନେତେର୍ସିନି ମାଡ଼ାନ୍ ନେ ପାପ କେମା ଆନାତ୍ । କ୍ରିସ୍ତଦି ବଲିସିନିକା ପାପ୍ ଆକ କିନାତ୍ 23 ଆମା ବିସୟ୍ୱିଜୁ ମୁସ୍କୁପୁର୍ତି ମୁଲ୍ ବିସୟ୍ଦି ରୁପ୍ ମାତ୍ର, ଆୟାୱିଜୁ ନେତେର୍ତାନ୍ ପବିତ୍ର ଆନିକା ଦରକାର୍ ମାର୍ହାତ୍, ମାତର ମୁସ୍କୁପୁର୍ତି ବିସୟ୍ତି ଉଣ୍ତିଙ୍ଗ୍ ନେଗି ବଲିଦାନ୍ ଦରକାର୍ । 24 ଆମାକା ଲୋକା କିୟୁଦୁ ତିଆର୍ ଆଏତ୍, ଇୟାୱାଜା ଉଣ୍ତ୍ରି ପବିତ୍ର ବାଡିଦୁ କ୍ରିସ୍ତ ସୋର୍ହାମାନାନ୍ । ଆକା ଇନି ମୁଲ୍ ବିସୟ୍ଦି ରୁପ୍ ସିଲେ । ୱାନ୍ ମୁସ୍କୁପୁର୍ତୁ ନେ ସୋର୍ହାମାନାନ୍ । ଆବେନ୍ ୱାନ୍ ମା ଉଣ୍ତିଙ୍ଗ୍ ଇଲେଇ ମାପୁରୁଦି ଆଗ୍ଡ଼ି ସର୍ହାମାନାନ୍ । 25 ଜିହୁଦିରି ପେରିଯାଜକ ଏଣ୍ତେସ୍ ବାର୍ସେକ୍ତିଙ୍ଗ୍ ଅର୍ସୁ ଜାତୁ ନେତେର୍ ଅସି ମହାପବିତ୍ର ବାଡିଦୁ ସୋନାନ୍ । ଆୟାୱାଜା କ୍ରିସ୍ତ ନିଜେଦିଙ୍ଗ୍ ରିଜାମୁଜା ପୁଜା କିନି ଉଣ୍ତିଙ୍ଗ୍ ଆବେନ୍ ସୋଲ୍ଏନ୍ । 26 ଆର୍ତିଙ୍ଗ୍, ୱାନିଙ୍ଗ୍ ଦୁନିଆଦି ତିଆର୍ଆତି ବେଡ଼ାଦାନ୍ ନାଣ୍ତଦେବେଙ୍ଗ୍ ଦୁଃକ୍କାସ୍ଟୁ ବୋଗାଦେଙ୍ଗ୍ ପୋଡ଼ାତାତ୍ମାନ୍ଦି । ମାରି ୱାନ୍ ଜୁଗ୍ସେସ୍ଆନି ବେଡ଼ାଦୁ ନିଜେଦିଙ୍ଗ୍ ବଲି ୱାଜା ସିନି ମାଡ଼ାନ୍ କାଡ଼ା କାଡ଼ାଦିଙ୍ଗ୍ ପାପ୍ତି ସାକ୍ତି ମେଡ଼ିକ୍ନି ଉଣ୍ତିଙ୍ଗ୍ ୱାତାମାର୍ହାନ୍ । 27 ୱିଜେରେ ଉନ୍ଣ୍ତ୍ରେଦେବା ସାନାର୍ ମାରି ତାନିୱେନ୍କା ମାପୁରୁଦି ବିଚାର୍ଦି ଆଗ୍ଡ଼ି ନିନାର୍ । 28 ଆୟାୱାଜା ୱିଜୁଲୋକା ଉଣ୍ତିଙ୍ଗ୍ ପାପ୍ ଆକ କିଦେଙ୍ଗ୍ କ୍ରିସ୍ତ ଉନ୍ଣ୍ତ୍ରେ ଦେବାଦି ଉଣ୍ତିଙ୍ଗ୍ ବଲି ୱାଜା ସିଆୟ୍ ଆତାନ୍ । ୱାନ୍ ମାରିଉଣ୍ତ୍ରି ଦେବା ୱାନାନ୍ । ନାସ୍ତିୱାଲେ ମାରି ପାପ୍ତି ଜୁଦ୍ କିନି ଉଣ୍ତିଙ୍ଗ୍ ୱାନ୍ ରେଏନ୍ । ୱାନ୍ ୱାନାନ୍, ୱାନି ଉଣ୍ତିଙ୍ଗ୍ କାପ୍କିଜିମାନି ଲୋକାଙ୍ଗ୍ ଉଦ୍ଧାର୍ କିନି ଉଣ୍ତିଙ୍ଗ୍ ୱାନାନ୍ । |
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020