అపొస్తు 19 - ମାପୁରୁଦି ସତ୍ ବାକ୍ୟ ପୁନି ନିୟମ୍ଏପିସସ୍ତୁ ପାଉଲ 1 ଆପୋଲୋ କରନ୍ତିଦୁ ମାନିୱାଲେ, ପାଉଲ ଲୋଇ ତରିନ୍ ମାନି ରାଜିଙ୍ଗାଁ ବୁଲାଜି ଏପିସସ୍ତୁ ଇତାନ୍ । ଆବେନୁ ଏସ ସିସୁରିଙ୍ଗ୍ ପୟ୍ତାନ୍, 2 ୱାନ୍ ୱାରିଙ୍ଗ୍ଁ ୱେନ୍ବାତାନ୍, “ବିସ୍ବାସ୍ କିନି ସମୟ୍ତୁ ଇନିକା ମିର୍ ପବିତ୍ର ଆତ୍ମା ପୟ୍ତିମାର୍ହିଦେର୍ ?” ୱାର୍ ଇର୍ହାର୍ ସିଲେ, “ମାରି ପବିତ୍ର ଆତ୍ମା ଜେ ଏନ୍ ମାନାନ୍, ଆକାବା ମାପ୍ ୱେନ୍ଏପ୍ ।” 3 ପାଉଲ ୱେନ୍ବାତାନ୍, ଆର୍ତିଙ୍ଗ୍ଁ ମିର୍ ଏମେନାନି ଡୁବନ୍ ଆତିମାର୍ଇଦେର୍ ? ୱାର୍ ଇର୍ହାର୍, “ଜୋହନତି ଡୁବନ୍ ।” 4 ପାଉଲ ଇର୍ହାନ୍, “ଆମାକାର୍ ପାପ୍ତାନ୍ ମନ୍ଡ଼େପ୍ତା ମାର୍ହାର୍, ଜୋହନତି ଡୁବନ୍ ସିଜି ୱାନି ୱେନ୍କା ଏନ୍ ୱାନାନ୍, ଜିସୁଦିମାନୁ ବିସ୍ବାସ୍ କିଦେଙ୍ଗ୍ଁ ଆନାତ୍ ଇଜି ଲୋକାଙ୍ଗ୍ ଇଜିମାର୍ଆନ୍ ।” 5 ୱାର୍ ଇକା ୱେନ୍ଜି ପ୍ରବୁ ଜିସୁଦି ଦର୍ତାନ୍ ଡୁବନ୍ ଅତାର୍ । 6 ମାରି ପାଉଲ ୱାରି ମୁସ୍କୁ କିୟୁ ଇଟ୍ତାନ୍, ଆବେଟ୍ ପବିତ୍ର ଆତ୍ମା ୱାରି ମୁସ୍କୁ ୱାତାତ୍, ମାରି ୱାର୍ ଆଇ ବାସାଦାନ୍ ୱାର୍ଗିତାର୍ ମାରି ବାକ୍ୟ ପ୍ରଚାର୍ କିତାର୍ । 7 ୱାର୍ ୱିଜେରେ ବାର୍ ଲୋକୁ ମେମାରିର୍ ମାର୍ହାର୍ । 8 ୱେନ୍କା ପାଉଲ ଜିହୁଦିରି ପାର୍ତନା ଇଲୁଦୁ ଡ଼ୁଗୁଜି ମୁନ୍ଣ୍ତ୍ରି ଲେଜ୍କୁ ସାନ୍ଦି ସାହାସ୍ତାନ୍ ମାପୁରୁଦି ରାଜି ବିସୟ୍ତାନ୍ ୱେର୍ସି ବିସ୍ବାସ୍ କିବିସ୍ କିଦେଙ୍ଗ୍ଁ ସେସ୍ଟା କିଦେଙ୍ଗ୍ଁ ଆସ୍ତାନ୍ । 9 ମାତର୍ ଏସ୍ତିୱାଲେ ଏସ ଲୋକୁ ଆଟ୍ୱା ନି ବିସ୍ବାସ୍ କିଏନ୍ଣ୍ତା ଲୋକା ଆଗ୍ଡ଼ି ଆୟା ସାରି ବିସୟ୍ତାନ୍ ନିନ୍ଦା କିଦେଙ୍ଗ୍ଁ ଆସ୍ତାର୍, ନାସ୍ତିୱାଲେ ୱାନ୍ ୱାରିଙ୍ଗ୍ଁ ଡ଼ିସ୍ସି ସିସୁରିଙ୍ଗ୍ ୱେର୍ଏ କିତାନ୍, ମାରି ଦିନାମି ଟିରାନସ୍ ଇଲୁଦୁ ୱାର୍ଗିଜିସାଦେଙ୍ଗ୍ ଆସ୍ତାନ୍ । 10 ଇୟାୱାଜା ଦୁଇ ବାର୍ସୁ ସାନ୍ଦି ସାଲାତାତ୍; ଆବେଟ୍ ଆସିଆ ବାସାତିମାନି ଜିହୁଦି ଲୋକୁ ନି ଅଣଜିହୁଦି ଲୋକୁ ୱିଜେରେ ପ୍ରବୁଦି ବାକ୍ୟ ୱେର୍ହାର୍ । ସ୍କେବାଦି ମାରିସିର୍ 11 ମାପୁରୁ ପାଉଲ୍ତି ମାଣାନ୍ ସାମାନ୍ତି କାବାଆନି ପାଣି ୱିଜୁ କିତାନ୍ । 12 ଇୟାୱାଜା ଜେ ପାଉଲ ଆସ୍ସି ମାର୍ହି ରୁମାଲ୍ ନି ୱାତିଗନ୍ଦା ରଗିଲୋକାଙ୍ଗ୍ଁ ଲାକ୍ତୁ ଅତିଙ୍ଗ୍ଁ ୱାର୍ ନେଗେନ୍ ଆଜିମାର୍ହାର୍ ମାରି ୱାରି ମେନ୍ଦଲ୍ତାନ୍ ତାଗ୍ଇ ଦୁବେଙ୍ଗ୍ଁ ୱିଜୁ ସହସି ସଲ୍ସିମାର୍ହେ । 13 ଏସ ବୁଲାନି ଜିହୁଦି ଦୁବେଙ୍ଗ୍ଁ ପେର୍ନିକାର୍ ବା ପ୍ରବୁ ଜିସୁ ଦର୍ ଆସ୍ସି ଦୁବେଙ୍ଗ୍ଁ ଡ଼ିସିସ୍ କିଦେଙ୍ଗ୍ଁ ସେସ୍ଟା କିତାର୍ । ୱାର୍ ଦୁବେଆଙ୍ଗ୍ଁ ଇଜିମାର୍ହାର୍, “ପାଉଲ ପ୍ରଚାର୍ କିଜିମାନି ଜିସୁଦି ଦର୍ତାନ୍ ନାନ୍ ନିଙ୍ଗିଁ ଆଦେସ୍ ସିଜିନା ।” 14 ସ୍କେବା ଦର୍ତି ଅରେନ୍ ଜିହୁଦି ପେରି ଜାଜକତି ସାତ୍ଲୋକ୍ ମାରିସିର୍ ଇୟାୱାଜା କିଜିମାର୍ହାର୍ । 15 ମାତର୍ ଦୁବା ୱାନିଙ୍ଗ୍ଁ ଇର୍ହାତ୍, “ନାନ୍ ଜିସୁଙ୍ଗୁଁ ନେସ୍ନା ମାରି ପାଉଲ୍ତି ବିସୟ୍ତାନ୍ ନେସ୍ନା; ମାତର୍ ମିର୍ ୱିଜେରେ ଏର୍ ?” 16 ଦୁବା ଆସ୍ତି ଲୋକୁ ୱାରିଙ୍ଗ୍ଁ ନାଣ୍ତଦାନ୍ ରେଲ୍ଜି ୱାନିତରିନ୍ ଇଟ୍ତାନ୍ । ୱାରି ଆଙ୍ଗିଁପାସିୟା କିସ୍ତାପକ୍ତାତ୍, ୱାର୍ କାଣ୍ତିଆକାବ୍ରା ଆଜି ୱାନି ଇଲ୍ତାନ୍ ଉର୍କୁତେ । 17 ଏପିସସ୍ତୁ ବାସାନି ଜିହୁଦିଲୋକୁ ନି ଅଣଜିହୁଦିଲୋକ୍ ଇୟା ବିସୟ୍ତାନ୍ ୱେନ୍ଜି ତିଲାତାର୍ ମାରି ଆବେ ପ୍ରବୁ ଜିସୁଦି ଦର୍ ମାରି ନାଣ୍ତଦାନ୍ ମାନାନିକା ଆତାତ୍ । 18 ବିସ୍ବାସ୍ରି ମାଣାନ୍ ନାଣ୍ତ ଲୋକୁ ନିଜେଦି ୱିଜୁ ତାଗ୍ଇ ପାଣି ୱିଜେରରି ଆଗ୍ଡ଼ି ୱେକ୍ତାର୍ । 19 ଗୁଣିଆ ବିଦ୍ୟା ଅଜାନି ନାଣ୍ତ ଲୋକୁ ୱାରି ବଇଙ୍ଗ୍ଁ ୱିଜୁ ତାସି ଲୋକା ଆଗ୍ଡ଼ି ଉଣ୍ତା କିଜି ଆଡ଼୍କ୍ତା ପକ୍ତାର୍ । ୱାରି ଆୟା ବଇଙ୍ଗାଁ ଦାରା ମାର୍ହାତ୍ ପଚାସ୍ ହଜାର୍ ୱେଡି ଡାବୁଙ୍ଗୁଁ । 20 ଇୟାୱାଜା ପ୍ରବୁଦି ବାକ୍ୟ ନାଣ୍ତଦାନ୍ ୱେଙ୍ଗିତାସର୍ହାତ୍ ମାରି ନାଣ୍ତ ସାକ୍ତିସାଲି ଆତାତ୍ । ଏପିସସ୍ତୁ ଜାଟିଜଗ୍ଡ଼ା 21 ଇୟାୱିଜୁ ଗଟନା ୱେନ୍କା ପାଉଲ ମାସିଦନିଆ ନି ଆକାୟା ନାମ୍ଡ଼ିସିଜି ଜିରୁସାଲାମ୍ତୁ ସନ୍ଡ୍ରେଙ୍ଗ୍ଁ ଇଚ୍ଛା କିତାନ୍ । ୱାନ୍ ଇର୍ହାନ୍, “ଆବେ ସର୍ହି ୱେନ୍କା ନାନ୍ ଏଣ୍ତେସ୍ବା ରୋମ୍ତୁ ବା ସନା ।” 22 ଆଦେଙ୍ଗ୍ ୱାନ୍ ୱାନି ସେବାକିନି ରିଏର୍ ତଡ଼୍ ତିମତି ନି ଏରାଷ୍ଟତିଙ୍ଗ୍ ମାସିଦନିଆଦୁ ପକ୍ତାନ୍, ମାତର୍ ନିଜେ ଆସିଆ ଦେସ୍ତୁ ମାରି ଏସ ସମୟ ତେବାତାନ୍ । 23 ଇୟା ଲୋଇ ପ୍ରବୁ ତର୍ତିମାନି ସାରି ବିସୟ୍ତାନ୍ ଅସି ଏପିସସ୍ତୁ ନାଣ୍ତ ଜାଟିଜଗଡ଼ା ଆତାତ୍ । 24 ଦିମତ୍ରିୟ ଦର୍ତି ଅରେନ୍ ୱେନ୍ଣ୍ତି ତିଆର୍କିନିକାନ୍ ଆର୍ତ୍ତେମି ଦିୟାମ୍ ମନ୍ଦିର୍ତି ୱେନ୍ଣ୍ତି ବମା ରସ୍ସି ମାର୍ହାନ୍, ଇୟା ପର୍ନିମାଣାନ୍ ପାଣିକିନିକାର୍ ନାଣ୍ତ ଲାବ୍ ପୟ୍ଜିମାର୍ହାର୍ । 25 ଆୟାଉଣ୍ତିଙ୍ଗ୍ ୱାନ୍ ସାମାନ୍ ବେପାର୍କିନିୱାରିଙ୍ଗ୍ଁ ଉନ୍ଣ୍ତା କିଜି ଇର୍ହାର୍, “ଆଜ୍ଞାର୍, ଇୟା ବେପାର୍ ମାଙ୍ଗିଁ ମାଜନ୍ କିତାମାନାନ୍ ଇଜି ୱିଜେରେ ନେସ୍ନିଦେର୍ । 26 ଇଲେଇ ଇୟା ପାଉଲ ଇନିକା କିନାନ୍; ଆକା ମିର୍ ନିଜେ ସୁଡ଼ୁଦେଙ୍ଗ୍ ଆଟ୍ସିନିଦେର୍ ମାରି ୱେନ୍ଡ୍ରେଙ୍ଗ୍ଁ ଆଟ୍ସିନିଦେର୍ । ୱାନ୍ ଇଜିନାନ୍, ଲୋକୁ କିୟୁଦାନ୍ ତିଆର୍ଆତି ଦିୟାମ୍କୁ ୱିଜୁ ମୁଡ଼ୁକେ ଦିୟାମ୍କୁ ଆଉ, ମାରି ୱାନ୍ ଇବେ ଏପିସସ୍ ନି ୱିଜୁ ଆସିଆ ଦେସ୍ତୁ ନାଣ୍ତ ଲୋକାଙ୍ଗ୍ ଇୟା ବିସୟ୍ତାନ୍ ବାମ୍ରେକିଜିନାନ୍ । 27 ଆବେଟ୍ ମା ବେପାର୍ ନାସ୍ଟୁ ଆନି ମୁସ୍କୁ ମାନାତ୍ । କେବଲ୍ ଆକାନେ ସିଲେ, ଆମା ଦିୟାମ୍ ଆସିଆ ନି ୱିଜୁ ଦୁନିଆଦୁ ୱିଜେରି ମାଣାନ୍ ପୁଜା ପୟ୍ନାତ୍, ଆୟା ପେରି ଆର୍ତ୍ତେମି ଦିୟାମ୍ତି ମନ୍ଦିର୍ ୱେଙ୍ଗ୍ଁଜି ତେବାଏତ୍ ନି ମାରି ଆର୍ତ୍ତେମି ଦିୟାମ୍ତି ୱେଙ୍ଗିଁନିକା ନାସ୍ଟୁ ଆନାତ୍ ।” 28 ଲୋକୁ ଇୟା ମାଟା ୱେନ୍ଜି ରିସା ଆତାର୍ ମାରି ଆଉଲି ଆଜି ଇର୍ହାର୍, “ଏପିସିୟଦି ଆର୍ତ୍ତେମି ପେରିଦିୟାମ୍ତି ଜିଣାନିକା ଆପିତ୍ !” 29 ଇୟା ଜାଟିଜଗଡ଼ା ୱିଜୁ ଗାଡ଼୍ତୁ ୱେଙ୍ଗିଁତାସର୍ହାତ୍ । ରିସାଆତିମାର୍ହି ଲୋକୁ ପାଉଲ୍ତି ୱାଲେମାର୍ହି ମାସିଦୋନିଆଦି ଗାୟସ୍ ନି ଆରିସ୍ଟାର୍କସ୍ତିଙ୍ଗ୍ଁ ଆସ୍ସି ୱାରି ଜୁଜ୍କିନିବାଡିଦୁ ତର୍ତା ଅତାର୍ । 30 ପାଉଲ ନିଜେ ଲୋକା ଆଗ୍ଡ଼ି ନିନ୍ଡ୍ରେଙ୍ଗ୍ ବଦା କିତାନ୍, ମାତର୍ ବିସ୍ବାସିର୍ ୱାନିଙ୍ଗ୍ଁ ଇୟାକା କିଦେଙ୍ଗ୍ଁ ସିଏତାର୍ । 31 ଏସ ଲୋକ ଗାଡ଼୍ତି ନିଜେଦି ଅଦିକାରି ସଙ୍ଗ୍କୁ ପାଉଲ୍ତିଙ୍ଗ୍ଁ ଜୁଦ୍କିନିବାଡି ଲୋଇ ସଲ୍ଇ ଉଣ୍ତିଙ୍ଗ୍ଁ ମାଡ଼ିସ୍ କିଜି ଉନ୍ଣ୍ତ୍ରି ମାଟା ପକ୍ତାର୍ । 32 ଇୟା ସମୟ୍ ଲୋଇ ପୁରାମିଟିଙ୍ଗ୍ଁ ମାଡ୍ଗୋଲ୍ତୁ ପୁରା ଆତାତ୍ । ଲୋକୁ ଦଲ୍ ଦଲ୍ ଆଜି ନାଣ୍ତ ଆଉଲି ଆଜିମାର୍ହାର୍, ଇରିଙ୍ଗ୍ଁ ୱାରି ଲୋଇ ଏସ ଲୋକୁ ୱାରି ଉଣ୍ତାତି ମାର୍ହିକା ମାଟା ବା ନେସ୍ଏର୍ ମାର୍ହାର୍ । 33 ଲୋକା ଲୋଇ ଏସ ଲୋକୁ ଇର୍ହାର୍ ଜେ, ଆଲେକ୍ଜାଣ୍ତର୍ ଇୟାଉଣ୍ତିଙ୍ଗ୍ଁ ଦସ୍, ଇରିଙ୍ଗ୍ ଜିହୁଦି ଲୋକୁ ୱାନିଙ୍ଗ୍ଁ ଆଗ୍ଡ଼ି ନିଲ୍ପ୍ତା ମାର୍ହାର୍ । ଆଲେକ୍ଜାଣ୍ତର୍ କିୟୁ ପେର୍ଜି ଲୋକାଙ୍ଗ୍ ଆଲ୍ଜ ମାନ୍ଡ୍ରେଙ୍ଗ୍ଁ ଇଜି ଜୁଟ୍ତାନ୍ ମାରି ବିସ୍ବାସ୍ରି ତରିନ୍ ବାସଣ ସିଜି ବୁଜାକିଦେଙ୍ଗ୍ଁ ସେସ୍ଟା କିତାନ୍ । 34 ମାତର୍ ୱାନ୍ ଅରେନ୍ ଜିହୁଦି, ଇକା ନେସ୍ସି ୱାର୍ ୱିଜେରେ ଅର୍ସେ ଆଉଲି ଆତାର୍, “ଏପିସସ୍ତି ଆର୍ତ୍ତେମି ପେରିଦିୟାମ୍ତି ଜୟ୍ ଆପିତ୍ !” ଦୁଇ ଗଣ୍ଟା ଆସ୍ସି ଇୟାୱାଜା ଆଉଲି ଆଜିମାର୍ର୍ହାତ୍ । 35 ସାରାସାରି ଗାଡ଼୍ତି ପେରିକାନ୍ ଲୋକାଙ୍ଗ୍ ଆଲେଜ ମାନ୍ଡ୍ରେଙ୍ଗ୍ଁ ଇଜି ଇର୍ହାନ୍, “ଏପିସିୟଦୁ ବାସାନି ତଡ଼ାନ୍କୁ ୱିଜେରେ ନେସ୍ନାର୍ ଜେ, ଏପିସସ୍ ଗାଡ଼୍ତି ପେରି ଦିୟାମ୍ ଆର୍ତ୍ତେମି ମନ୍ଦିର୍ ନି ବାଦଡ଼୍ତାନ୍ ଆର୍ତି ୱାତିମାନି ପବିତ୍ର ବମାଦି ରକ୍ଷା ଆଜି ୱାଜିନାତ୍ । 36 ଇକା ଏନ୍ ସିଲେ ଇନ୍ଡ୍ରେଙ୍ଗ୍ଁ ଆଟ୍ଏନ୍ । ଆଦେଙ୍ଗ୍ ମିର୍ ୱିଜେରେ ଆଲେଜ ମାନ୍ଡ୍ରୁ । ଇନି ତାଗ୍ଇ ପାଣି କିମାଟ୍ । 37 ଇୟା ଲୋକୁ ମନ୍ଦିର୍ତାନ୍ ଇନିକା ଡଙ୍ଗାଁ କିଏର୍, ମାରି ମା ଦିୟାମ୍ତି ବିରଦ୍ତାନ୍ ଇନି ନିନ୍ଦା ମାଟା ଇନ୍ଏର୍ । ଆରିଙ୍ଗ୍ବା ମିର୍ ୱେରିଙ୍ଗ୍ଁ ଆସ୍ସି ତାତିମାନିଦେର୍ । 38 ଦିମତ୍ରିୟ ନି ୱାନି ପାଣିକିନିୱାରି ଏ ବିରଦ୍ତାନ୍ ଇନି ମାଟା ମାନାତ୍, ତାନି ବିସାର୍ କିଦେଙ୍ଗ୍ଁ ମା ପେରିକାର୍ ମାନାର୍ ମାରି ବିସାର୍ ଇଲ୍ତି ଟିକ୍ ଦିନ୍ ୱିଜୁ ମାନାତ୍ । ଆବେ ଆୟା ମାଟା ୱେର୍ତେଙ୍ଗ୍ ଆଦେଙ୍ଗ୍ ଆଟ୍ନାତ୍ । 39 ଜଦି ତେନିମାଣାନ୍ ମାରି ନାଣ୍ତ ଇନିକା ବଦା କିତିଙ୍ଗ୍ଁ, ଆର୍ତିଙ୍ଗ୍ଁ ଲୋକାମାଣାନ୍ ନିୟମ୍ ଆତିମାନି ଉନ୍ଣ୍ତ୍ରି ମିଟିଙ୍ଗ୍ଁତୁ ତାନି ପୁରା ଅଆୟ୍ ଆଦେଙ୍ଗ୍ଁ ଆଟ୍ନାତ୍ । 40 ନେର୍ ଆମାକା ଗଟାତାମାନାତ୍, ଆବେ ମା ବିରଦ୍ତାନ୍ ଜାଟିଜଗଡ଼ା ଗଟେକିନି ମାଟାଦି ଆସା ମାନାତ୍, ମାଡ୍ ଇୟାୱିଜୁ ଜାଟିଦାନ୍ ଇନି ଟିକ୍ ମାଟା ୱେର୍ତେଙ୍ଗ୍ଁ ଆଟ୍ଏପ୍ ।” 41 ଇୟାୱିଜୁ ମାଟା ଇଜି ୱାନ୍ ଲୋକାଙ୍ଗ୍ ସାନ୍ତି କିଜି ମିଟିଙ୍ଗ୍ଁ ବନ୍ଦ କିତାନ୍ । |
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020